【独自音乐】说好的支持原来得个讲字　小肥：要畀钱就另一回事

不经不觉《独自音乐》来到第五个星期，今集找来一把熟悉的声音。他就是来自的歌手小肥（徐智勇）。小肥于2007年在香港出道，他当年在香港推出首张大碟《The First Album of Siufay》后，凭著歌曲《宠物》及《时光机》一鸣惊人。歌曲至今仍是在K房热唱的作品。在今集的《独自音乐》中，小肥会为大家现场演绎今年推出的其中两首新歌《差一点》及《冒雨》。摄影：江智骞

相信大家对歌手小肥的名字从不陌生，他出道至今曾唱出多首K歌。不经不觉小肥已在香港出道十年了，虽然差不多每一年都有新歌推出，但乐迷印象最深始终都是出道代表作《宠物》：“坦白讲《宠物》呢首歌的确令我滑哑。大大话话唱咗千次万次，不论我《宠物》唱过几多次，总之开头听到《宠物》嘅intro我系闷嘅，但入到歌嘅时候，我依然会投入。每次唱嘅时候见到现场气氛好好自然就会无咗𠮶种滑哑嘅感觉。我会谂，就算啲人唔识我小肥，但起码认识我两首歌《宠物》及《时光机》，作为一个歌手如果有两首歌被人认同已经算好有歌运。”小肥说。

谈到十年来听过最难听的说话，小肥表示：“其实我由澳门嚟香港做歌手之前有个组合叫C-PLUS。当时我哋好珍惜每一个出骚的机会，只要有机会，我哋可以唔计较收入，因为我哋enjoy个舞台。但系有一次我哋C-PLUS唱完一个骚，有一位女士就塞咗封利是俾我咃。跟住我又听到，𠮶一位女士嘅朋友问佢封咗几多钱利是，而𠮶位女士就话廿蚊啰。佢朋友就话廿蚊咁多！我当时心谂其实𠮶封利是我哋可以唔要。呢件事都几委屈。点解无啦啦要畀人眨值呢。”

小肥曾经得到不少支持的声音，不过支持与现实却不成正比：“有好多人曾赞我话我唱得几好叫我继续努力加油。但实际嘅支持真系好少。坦白讲我好怕喺香港开演唱会。因为上一次港澳同步开演唱会，澳门反应ok，香港就未如理想。我听过一啲意见就系话，如果小肥搞演唱会紧系好啦，如果有免费飞的话我都好乐意去睇。不过要比钱买就另一回事。大家好似一边认同我嘅实力叫我加油，但系实际上我喺大家心目中又无𠮶价值。”

要数小肥上一张专辑，已经是2014年的事。当时他还在太阳娱乐文化旗下歌手，直到完约后在中间这段真空期，小肥主力处理澳门演艺人协会的工作，在音乐上出产不多，原来当时他已开始为今年的Project开始工作：“其实今次呢个Project嘅发起人系Paco（黄柏高），当年系佢提议我揾Rubberband嘅阿伟做监制。”

小肥由初出道开始已经与Paco合作，无论Paco转会到其他唱片公司工作，他也会签小肥成为旗下歌手。不过这个合作关系直到太阳娱乐文化完约后并没有延续下去：“我同Paco当然系朋友啦，不过有时啲嘢唔系佢控制范围之内。旧公司（太阳娱乐）始终集中喺电影方面，相对投放喺音乐上嘅资源都会减少。所以Paco喺无办法之下放我走，我依家喺自己兄弟公司棋人娱乐制作有限公司（澳门）发展自己钟意嘅音乐。”

入行第十个年头的小肥，如果你有留意他的派台作品，你会发现他今年所推出的歌曲曲风为大家带来不少新鲜感：“我以前签大公司（金牌娱乐、金牌大风、太阳娱乐文化）嘅时候算系一个容易妥协嘅人。好似我第一张大碟《The First Album of Siufay》就系一张我完完全全听话嘅成品。不过之后我就除咗妥协之余都会尝试加入自己意见。到依家与康家俊监制合作，喺音乐上令我变得更大胆。”

的确今年的小肥一反传统，由今年三月开始连续10个月，每个月推出一首新歌派台，而且他打算把这10首歌变成大碟。这个做法绝对有别于以往一张专辑只力谷两至三首主打歌：“我相信喺香港乐坛无一个音乐团队会咁冒险，就算有人做过，都未必会一张碟10首歌，10首都派台。因为呢个做法系挑战各大音乐流行榜嘅制度。”

小肥续说：“今次呢个《睡前服》project有几个概念系入面，包括坦白、感恩。坦白系指我以前嘅歌其实好多都唔坦白，好多我都未经历过。我以前好多歌都讲爱情观，失恋。其实我边有咁多呢啲经历。我未试过分手分好似我啲歌入面讲到咁惨。简单啲讲我小肥喺爱情上唔系一只兵。但我又成日要唱一啲做兵嘅歌。不过我对我过去唱过嘅兵歌系有感恩嘅心，因为无呢啲兵歌边有人会识小肥呢。而今年我所做嘅每一首歌都系表达紧我所讲嘅嘢。每次首歌填词之前，６号@Rubberband仲有Tim Lui都会同我倾得好仔细。大家如果有留意我今年嘅歌，你会发现全部都系大家熟悉嘅人。例如：有Rubberband嘅阿伟帮我做唱片监制、方皓玟、Ellen（卢凯彤@17）、侧田、Rubberband６号仲有李拾壹等等。其实除咗呢班人帮我写歌合唱外，仲有好多第一次，所以今次系真系好新鲜。”