【专访】张智成性向受关注　大马学友：唔觉回答呢个问题系责任

一位不经不觉已经出道18年的歌手，香港的乐迷可能对他的名字感到陌生，但是过去18年，他所做的音乐是绝对有可听性，就算你现在才认识他也不紧要，因为他过去所做的音乐都是以质素为先，他是马来西亚人，在台湾出道，他在台湾被冠名为“R&B小王子”，，也曾因为翻唱歌神张学友的歌曲《倾城》，而被称为“马来西亚张学友”，他的名字叫张智成。虽然出道18年，但近年传媒似乎关心他的性向多于他的作品，对此张智成谓：“当你讲行左定行右，会好影响往后嘅人生！”摄影：梁碧玲服装：HARE, Collect Point场地：隆堡丽景酒店／Hotel Panorama by Rhombus

18年前，张智成曾想过放弃音乐，因为他在一次比赛的挫败，令他信心受损，但最后他再次站上舞台而且还得到了冠军，之后一唱就唱了18年，而且在过去18年的音乐路经历各种高低。今年是他入行18年，他推出了自己的个人大碟《18》记录过往的辛酸：“其实《18》想讲入行18年，虽然18年好似好老，但呢个数字反而提醒我要不断坚持我对音乐嘅要求，我做事唔可以以老卖老，唔可以因为入行18年而松懈。”

谈到大碟内的歌曲《瘀青》反映社会上各种欺凌问题，当中有友情，家庭，爱情，令不少网民看罢MV大有反思的作用，张智成表示：“我觉得呢首歌喺不同年龄层有不同感受，有别于我以往拍ＭＶ所用嘅文青感觉。我觉得依家呢个社会有好多不公嘅事，但往往无人肯去面对佢，所以我想用《瘀青》去表达出社会缺乏关心仲有爱。”

张智成虽然入行多年，但似乎他对音乐除了坚持，还非常执着：“我曾经因为挫败所以想放弃音乐，我会问自己点解会做音乐，但后来发现系音乐拣选我。我觉得自己系一个得失心好重嘅人，我相信努力系会换嚟我想要嘅成绩，可能我有咁嘅想法，所以我17岁嘅时候，参加过一个歌唱比赛，最后无入到决赛，我当时就谂唱歌真系唔适合我，之后再用准备咗7年时间，我再去参加唱片比赛，当时准备充足，最后成为全国冠军。不过我呢种得失心依然好重，所以成为歌手后成日有挫败感。有时我做得唔好，我都会谂我系唔系用咗其他人嘅机会呢，我做得唔好系唔系其他人会比我成功，我系一个好易自责嘅人，如果我觉得自己做得唔好我真系会选择离开，我系一个好自责嘅人，所以你有时你会见我行开两三年休息一下，我唔会好似其他人咁成日都会有存在感。”

“我觉得做呢行自我要求唔可以低，正如我读书我都对自己好有要求，做歌手是一种使命，所以一定要比其他人好得好，要求高系基本，世界上好多人嘅Talent（才能）都比你好都无机会，如果你对自己无要求，咁就会浪费自己嘅机会，连我咁嘅能力都可以行出嚟，我系好感恩，所以我一定做得更加好。”张智成续说。

“当你讲行左定行右，会好影响往后嘅人生”

谈到早前台湾金曲奖，香港歌手卢凯彤得奖后，公开性向，问到一直被传是同志的张智成，会否在人生重要时刻公开性向，他坦承说出他的看法：“我觉得公布自己嘅性取向系个人选择，如果你决定去将你自己私生活公开，你一定要接受之后所发生嘅事情，因为你一定会成为焦点。好多人会忘记一件事，就系当你讲出去你系行左定系行右，其实会好影响你往后嘅人生，而且亦会影响你身边人每一步嘅人生！所以我觉得呢啲咁私人嘅问题或者其他人问我嘅感情事，我可以话畀你听嘅就系，我觉得互相尊重。”

他续说：“坦白讲，其实人与人之间唔系性别之分，高矮肥瘦嘅人都会有被歧视嘅机会，所以我呢啲话题我会唔讨论，我唔觉得回答呢个问题系一种责任。如果我今日话你知我系一个同志，我可以选择好高调，或者我可以选择好低调，但我觉得高调与否唔代表啲乜嘢，如果有人选择用呢个方法去宣传佢嘅image（形象），呢个佢嘅决定，就好似蔡依林有自己嘅方式，周杰伦有自己嘅方式宣传自己嘅image，一切都只不过系image。但系你必须要知道你能唔能够handle到之后嚟嘅狂风暴雨（焦点），因为呢样（公开性向）系一样好大嘅挑战。如果有一日我同你讲我系变性人，咁我嘅未来永远都离不开呢个话题，甚至因为咁而成日会有人想偷拍你，就系因为讲咗出嚟。”

谈到同志平权问题张智成严肃表示：“我会支持任何人为佢自己嘅权益去做事，我会support佢哋，我会觉得佢哋好有勇气，但我会关心嘅一点就系我头先所讲嘅，接下来是怎样才是比较重要。”