被网民谈论身型 Kellyjackie：观众只会用眼睛欣赏歌手！
每次的《流行经典50年》都会令大家忆起儿时，年轻时的回忆。不过昨晚的《流行经典50年》就找来了当年凭著《他约我去迪士尼》一曲成名的Kellyjackie为演唱嘉宾。节目出街后Kellyjackie再次成为网民焦点，有网民说她是一曲歌后，有人说她身型变肥唔认得，更有人说她红歌唔红人。其实“有头发边个想做癞痢”，一首歌唱咗咁多年佢又会唔闷咩？而因为胃病做了手术导致她身型变肥你知唔知？Kellyjackie接受《香港01》访问时也大叹：“观众只会用眼睛欣赏歌手！”
Kellyjackie（陈晓琪）可以说是香港第一代的网络歌手。在2004年凭著网上发布的作品《他约我去迪士尼》一曲成名，当时更成为网上搜寻人气榜第1位。随著网上人气Kellyjackie马上便与当年的唱片公司签约成为正式歌手，不过其后却因与旧公司发生合约纠纷，所以令她的歌唱事业停滞不前，遇上人生的第一个低潮。
当Kellyjackie接受《香港01》访问时谈到过去低潮，她表示：“过咗去就由佢过去啦，只不过我觉得当时大家合作上有好多嘢需要时间去磨合得好啲，亦都要多谢佢哋（旧公司）曾经都有帮过我，曾经带过我去唔同嘅地方工作，好多谢佢哋曾经出现过嘅。亦都因为当时有呢件事（合约纠纷）发生，所以我唔可以唱其他歌（旧公司的歌），而只可以唱《他约我去迪士尼》，变咗呢首歌陪件我人生嘅低潮，加上我爷爷嫲嫲仲有公公相继离开，所以我𠮶几年都好难过，又抑郁所以暴瘦，所以我好收埋自己，唔会出去揾其他朋友，如果唔系有《他约我去迪士尼》我甚至唔会出去公开场合，所以我都想多谢我当初《他约我去迪士尼》最早放上网嘅钢琴版本创作班底，填词人海蓝、许愿庭，编曲人林柿。”
Kellyjackie续说：“我好相信一句说话，塞翁失马，焉知非福，当时好多人帮我，妈妈细佬好支持我，我亦好感恩，好多前辈好似米雪姐等，都好关心我同帮我，而且出手帮我介绍律师解决同旧公司嘅合约问题。而且我学识珍惜，当我未签依家公司嘅时候，而仲有人揾我唱歌我真系觉得好感恩，因为佢哋揾我唔系因为我系咩大公司歌手，而系真系钟意听Kellyjackie唱歌。”
Kellyjackie又谓：“我觉得自己好另类，观众会识我首歌，但又未必认得我，又唔知我做紧乜，而我又未死仲喺呢行生存，我虽然得一首歌，但亦都因为咁，所以大家每年都总会谂起我一次，其实都几好。”
《他约我去迪士尼》是Kellyjackie的成名作相信无人否认，但自她成名后，似乎暂时未有一首歌可以超越《他约我去迪士尼》的成绩：“当初只系想写首歌送畀我婆婆，所以有呢首《他约我去迪士尼》，全系由心意发，而入行之后写嘅每一首歌，都喺以自己心声出发而唔系要超越呢首歌，最紧要都系自己开心，我唔会因为受欢迎而随波逐流。有好多人都话我唱嚟唱去都系呢首歌，其实我当时只有呢首，我都想唱其他歌！”
由曾经因为抑郁而暴瘦，到最近在《流行经典50年》爆Mon亮相，Kellyjackie也明白自己身型会成为谈论的话题：“我之前胃病，加上新陈代谢慢，所以以致身型变肥，我打算完成嚟紧嘅慈善舞台剧之后会去揾中医调理一下，呢个都系我依家嘅一个小小嘅目标。我明白大家钟意睇瘦瘦靓靓嘅歌手，依家啲观众只会用眼睛欣赏歌手！身型上我会努力，但我希望大家都可以真系欣赏我嘅声音，亦都希望大家可以多啲留意每一位歌手用心做过嘅作品。如果有留意开我嘅歌迷会知道，我一路以来做音乐都系唔怕无回报，我嘅座右铭系：知足常乐，活在当下。希望大家除咗记得我唱过《他约我去迪士尼》，我嘅身型，都记得我Kellyjackie对音乐嘅一份坚持，追求梦想嘅勇气。”
最近忙于排练慈善舞台剧《谁来爱我》的Kellyjackie，问到她几时有新歌，她表示：“8月尾我将会推出一首电影主题曲，系一首自己作曲填词嘅作品，曲风会比较有型格啲，节奏感会重啲嘅一首歌，希望大家会钟意。”