【任噏乐评】刘子千有条件做第二个周杰伦！听完就知佢有料到

刘家昌与甄珍离婚多年，今年5月刘家昌于facebook发文大骂甄珍与儿子刘子千是“畜生”、又指“你会死的很难看”，言词狠毒。日前甄珍发千字文反𪮃刘家昌的指控，而且爆出刘家昌豪赌成性、离婚不断要钱、威胁刘子千唱《念你》等内幕。(传送门：甄珍大爆刘家昌不断索钱　不再沉默：希望他放过我和子千！)

被逼唱《念你》事件曝光后，有网民为刘子千平反，希望佢可以做番自己风格嘅音乐：“期待也欢迎你以第一张专辑的姿态回到乐坛，面对恶势力勇敢站出来，老天一定会替你与妈妈讨回公道！”又点名提到《玫瑰》、《占据》等等收录在第一张专辑《Mr.Why》的歌曲。

既然网民讲到刘子千第一张专辑《MR. Why》系沧海遗珠，又留言为佢平反，即管听一听，睇下系网民“逢黑必捧”定系真系有才华？

咦！刘子千真系有料到㖞！

先唔讲其他，刘子千包办《MR.Why》入面10首歌嘅作曲、编曲，你估咁易呀？仲要风格多变，Soul、R&B、Funk、Rock Ballad、情歌，等等都有。

你可能话，“𪠳！佢出生音乐世家，又出国读音乐，要做到有几难呀？”
公平啲，正常人都识讲嘢，要你用10种语气演绎10段唔同嘅讲辞，都唔系咁容易啦系咪？你估个个系吴亦凡识Freestyle咩！

你可能又会话，“要我即刻做实唔得㗎，你畀时间我练咪得啰！”
You got the point , man！玩音乐唔系真系得个“玩”字，要落苦功㗎，麻烦你打开只耳仔，咩都试下听啦。

专辑打头阵嘅《占据》已经听到刘子千嘅功架，净系讲声线，已经唔系《念你》𠮶只“鸭仔声”。歌曲冇intro，直入就系钢琴加刘子千人声，真假音转换做得到位，高音又唔会让人觉得刺耳，转音又唔系夹硬扭，起码听完你个脑唔会联想有个人面容扭曲喺你面前声嘶力歇唱先啦。

另外推介《住在动物园》，因为个音乐底够groovy，一听就想跟住郁，而且intro钢琴重复住同一句旋律catchy，好快就带你入局，听完就发现“原来刘子千唱快歌都得㖞！”

“这世界 各种人吃一样的米
发生什么都不稀奇
所以 不需要太为难自己
生活不过只是场游戏”

相信刘子千依家睇番呢几句歌词，一定百感交集。

其实唔系要捧到刘子千天上有地下无，因为佢只碟主打歌《MR. why》都几好笑。的而且确，舞曲风格嘅音乐底唔错嘅，起码唔系《念你》𠮶啲老套嘢先；不过佢一rap就好似总系同佢把声格格不入咁。睇埋个MV就仲大件事，睇到佢手揈揈个样，我第一时间谂起“加加减减，减减加加，加嚟加去，减嚟减去”。唔明请Click

拉匀嚟讲，《MR.Why》只碟睇到刘子千作为个唱人嘅实力，唱、作、编都能够一手包办 ，而且唔系“整罐头”; 不过正因为各种风格都有少少，个人风格唔够鲜明，唔似“方大同=Soul Boy”、“黄贯中=Rock友”，但可以好肯定讲“刘子千唔等于《念你》”。

睇埋刘子千唱Live，稳阵过好多人啦，系咪？