【任噏乐评】谭顺生专辑唱k质素都收$129　唱腔老套似上世纪产物

谭顺生近期是非缠身，人格及操守备受质疑，但毕竟佢都系一个歌唱老师，又系歌手，仲要今个月中先出完碟。如果因为人格而抹杀佢嘅努力好似有啲唔公平，所以我决定买佢只碟，听下自称“超过10万小时教学经验”嘅佢到底咩嘢葫芦卖咩药！

我都未试过买碟买得咁心虚，行紧去CD铺途中我不断喺到谂，话晒自己都系一个后生仔，如果个店员问起我“点解会听谭顺生嘅？”，都唔知点答先甩到身，唔通我同佢讲“公司叫㗎”咩，所以我心入面做咗个决定，佢一问我，我就话买嚟孝敬长辈。

行到入CD舖，咦！谭顺生呢？我望匀几个“New Release”碟架都揾唔到佢只《想到旧年》，明明谭顺生之前喺记者会话只碟排第二㗎，应该好当眼㗎㖞！唔怪得啦，个榜系hmv嘅，有时都真系唔明各大CD舖嘅榜单系点计，Anyway呢样迟吓再同大家考究。

唉……死就死啦，顶硬上问店员有冇谭顺生只碟，个店员一听到我要揾谭顺生只碟，佢呆一呆，之后托一下眼镜上下打量我，再话：“Er…”，见佢个样咁为难，唔通呢只碟真系好卖到差唔多断市？不过佢跟手就带我去男歌手𠮶栏度揾，就连个店员都要揾咗几行先揾到谭顺生只碟，攞上手一望，129蚊？好似有啲贵㖞！不过为咗听Dr. Steve嘅靓声，呢铺点都要焗畀，等找钱期间我见到个店员尴尴尬尬咁阴阴咀笑，可能系我自己心虚啦，步出CD铺我𠮶阵仲想揾本杂志包实佢，费事俾人见到会一手抢走。

《想到旧年》CD全面睇

折腾一轮终于返到公司，心肝仔怦怦跳，即刻播碟！谭顺生不嬲以台风出众见称，你睇佢喺YouTube对住镜头唱都会手舞足蹈就知啦，今次佢出碟担正，仲唔爆seed？识睇一定系睇MV顺手听埋歌！老老实实，佢出9首歌，首首都有MV，仲要去9个唔同地方，仲要有live band傍住㖞！你估谭咏麟出碟咩？以HiFi发烧碟嚟计，佢都算落重本拍MV啰，唔知迟吓又会唔会出埋黑胶呢？

谭顺生啲表情真系世界级，感情十足，睇佢唱主打歌《明日话今天》就知。未入第一个副歌就已经表情多多，时而闭眼，时而佻望远方，仿佛满胸豪情热血要在顷刻间爆发，可想而知之后副歌有几气势磅礡。

言归正传，谭顺生今次身份系歌手，当然要讲返把声。谭顺生把声本身就沙沙地，一入咪简直就系倍大佢呢个“特质”，听落去把声唔够开扬；俾人一种佢不断挤压喉咙唱歌嘅感觉。亦由于过份挤压，太多声带拍打嘅声音，虽然可以话系有特色，但系唔悦耳。唔系音准有问题，而系呢个Tone未必个个接受到，可能有人听多两首会觉得吵耳㖭。

简单讲就系“摙”住把声咁唱，好多喉咙声，听完都觉得自己喉咙有啲痛。

不同歌曲演绎方法都不同，话唔定转首柔情啲嘅《恋爱预告》会好啲呢？点知一样系咁多喉咙声，令人难以投入歌曲甜蜜的气氛，更会自动联想到谭顺生肉紧嘅表情。再者，某啲尾音用气音去唱，而且音量急降hold唔住，实在分唔清唔到呢啲叫“有感情”定系“冇气上”。讲多次，真系唔关音准事，老老实实唱咗咁多年，又开班教学生，家阵仲要出碟，就算有问题都执走咗啦。

但系个唱腔，个Tone真系唔悦耳，好似一路听一路有沙纸磨紧你咁。好哋哋陈百强嘅《恋爱预告》唱到好似《恋爱讣告》咁，真系令人愕然。唯有系拎返陈百强嘅《深爱著你》出嚟听听，回下血先可以继续听落去。

回完血，听埋其他歌，发觉都系同一个问题，个Tone真系难以接受，听得耐真系好拮耳，而且戥佢辛苦。讲真㗎，真系好想同佢讲句“放松啲啦香港人”。依家讨论区都好兴打“勇者塔”，上文我都介绍咗两首歌，仲有埋MV截图睇，相信各位都好想知佢仲有咩绝招。有兴趣嘅“勇者”就打埋个塔佢啦！而买咗碟嘅朋友，祝福你！

谭顺生表情包！(按图放大)