【任噏乐评】VR睇五月天演唱会好无聊　现场感用钱都买唔到呀！

“睇演唱会，识睇一定系睇Live！”相信好多人都会认同。无论咩风格嘅演唱会都好，亲身感受现场气氛先系享受。不过世事又岂能尽如人意呢，每个睇唔到Live嘅人都总有苦衷。

今时今日科技发达，睇唔到Live？唔紧要，有VR直播吖嘛！就好似上年12月王菲于上海举行《幻乐一场》演唱会咁，门票最贵去到7,800蚊人仔，就算最平都要1,800人仔，就算有心都未必“有力”去睇。当时谢霆锋出任大中华区业务主席的“数字王国”(547)，提供VR直播服务，收费都系30蚊人仔；就连当时霆锋都系一边食饭一边用VR直播睇阿菲开骚。

而“数字王国”㖊日举行发布会，将继续发展VR技术，并直播李荣浩今年9月及五月天2018年嘅演唱会。

你谂下，畀30蚊人仔就可以置身王菲上海演唱会，仲要同霆锋“咁高咁大”一齐用VR睇骚，抵晒啦！

VR直播的确可以打破地域限制，又可以解决一飞难求嘅问题，而且收费又唔费；不过真系冇feel啰！就算我畀番VIP票价，你点都畀唔到现场气氛我。

讲到口水都干，睇骚紧系食气氛㗎啦！如果唔系我同睇YouTube有咩分别啫？其他嘢唔讲，净系讲畀现场嘅低音打到成个人震晒都抵啦！而且去到现场全部观众好自然就连成一体，一齐跟Beat跳、跟住唱，而且我系同偶像喺同一个场地，佢每一句说话都好似只系对我讲咁。呢种临场感，点会系透过一个眼罩戴住耳筒感受到，唔通我戴住个眼罩喺屋企跳咩？

再者，如果VR直播不设重温，咁啱撞正返工行唔开嘅朋友就阴功猪喇，真系只可以睇DVD。

除咗心理上觉得唔好受，技术上亦有所限制。有内地网民喺上年12月畀咗30蚊人仔，体验一下VR直播王菲演唱会，发觉“声音画面都有问题”。就算镜头set得再近，王菲个样都好似打咗格咁，睇番普通720p画质都冇咁嬲。

就算用作直播嘅VR镜头能够拍摄4K影像，但用家未必有显示到4K嘅装置；就算有，网络速度亦会影响画质。除咗画质，话明系演唱会就梗系要听声啦。

现场收音，靠现场sound man去mix，之后透过网络，经过手机，再喺耳筒出，隔咁多层点都会打啲折扣。都未计你用咩价位嘅耳筒去听。

又再讲，如果为咗用VR睇演唱会时，有靓画靓声同临场感，而大洒金钱去买器材，我不如用呢笔钱睇十次骚好过啦。戴眼罩睇点都系虚拟，用脚行入现场先系实境呀！