暖男爸爸│小暴龙Julian可爱爆红 妈妈：佢真系大个仔有哥哥风范
ViuTV剧集《暖男爸爸》自播出后，饰演阿荣（郑中基饰）儿子小暴龙哥的Julian（Juju）火速爆红。Juju原不是圈中童星，惟凭其可爱表情，令观众大呼超治愈！妈妈分享，虽然儿子只参与了八天的拍摄，但是次经验令儿子成长不少，社交能力有所增强，更难忘剧组上下的贴心照顾！
摄影：郑子峰
服装：FILA KIDS
场地提供：Wahaha Partyroom
8日拍摄令孩子成长 更具“哥哥”风范
Juju妈妈形容，5岁半的儿子性格好动，古灵精怪，原来在拍剧前，他是一名怕丑仔。“未拍剧前慢热啲、怕丑啲，见到陌生人会匿埋喺我后面，唔系太讲中文。”疫情关系Juju停课，他的表姑妈及表姑姐恰是《暖男爸爸》的服装指导，在她们引荐下便参与了剧集的试镜。“知道监制Peter（戚家基）都cast（试镜）过200个小朋友，但都唔啱，就介绍咗juju同表哥（大暴龙哥）一齐去做casting，都想俾佢见识下唔同嘅嘢。”
她忆述，剧集拍摄为期两个月，Juju参与了其中8日，过程令他成长不少。“而家识得同人团队合作，见到陌生人冇以前咁怕丑，肯去打招呼，肯讲中文，社交能力好咗，成长咗好多。好proud of（自豪）佢，唔系因为有人认得佢，而系我觉得佢真系大个仔咗！”
Juju：工作不是那么容易的！
妈妈又分享，现时Juju回到家中，与3岁的妹妹相处时，更具“哥哥”风范。“更识得照顾妹妹，感情好咗。有次Juju拍广告，临出门妹妹就想喊，佢就好成熟咁话‘我一阵间就返，Working is not that easy（工作不是那么容易的）！’，又话要买礼物送俾妹妹、妈妈，系好sweet（窝心），佢会觉得努力做嘢，就可以买嘢送俾钟意嘅人。”
“暖男爸爸”Ronald变魔术 强尼请食蛋挞
Julian妈妈坦言，拍摄期间气氛良好，台前幕后打成一片。“拍完剧之后同所有剧组员工都好好感情，大家都变咗好朋友。虽然我哋唔系圈中人，见到套剧回响咁好，都替佢哋好开心。”
她更难忘两位现实中的“暖男爸爸”，“Ronald（郑中基）戏里戏外都系一个非常之好嘅暖男爸爸，始终juju第一次拍摄，未必可以跟随全部指示，Ronald就好有耐心，成日陪佢玩、氹佢笑，变小魔术，佢笑返就继续拍。强尼哥哥又系好好，有日买咗蛋挞俾佢食，Juju又系好开心。”
她续指，Juju在片场虽不会“典地”、尖叫扭计，惟亦多得演员在非拍摄时间，也愿意花时间与Juju建立关系，配合剧组的细心照顾，才可令拍摄过程顺利。“譬如佢第一日开拍，有场戏系要佢揽住Mishy（李昭南，饰演推拿按摩师Nami），但佢系完全唔肯揽，拍到出晒汗。监制Peter就话‘唔紧要，调返转Mishy揽佢’，会宁愿改一改剧本，或者大人就一就，拍摄顺利系因为佢哋嘅功劳。”
转读国际学校 著重自由发挥
疫情以来，除了拍摄时间，Julian妈妈特意找了老师上门授课，内容却是以“玩”为主，“整吓cupcake（杯子蛋糕）、意粉”，她认为，Juju性格好动，在即将升小学之际，便决定让他从本地学校转到国际学校。“本来间学校都好好，读得好开心，但觉得疯狂做功课嘅模式未必好啱佢，今年我就同佢转咗国际学校，而𠮶间学校系以运动为主，我觉得要因应小朋友嘅个性、特质去拣学校，唔想佢哋嘅童年淹没系功课当中。”
她续指，从不会在学习上给予孩子压力。“数字1至10，佢成日捞乱6同9，但我觉得唔紧要丫，大个唔通唔识分6同9？我冇咩俾压力佢，我个仔中意睇图画，再运用自己嘅创意讲一堆嘢俾你听，希望俾佢玩同freestyle（自由发挥）多啲。”
平衡兄妹照顾时间 拍摄持开放心态
她分享，平常尤其著重培养Juju的自理能力及待人接物的态度。“就算对姐姐（外佣），都唔可以冇礼貌、郁手郁脚、呼呼喝喝，要识得尊重。咩都叫佢做下，自理能力一定要有，唔想到佢大个，煮个公仔面都唔识。我冇乜preference（偏好）想要佢做咩，如果揾到自己嘅爱好，就要尽全力做好件事。”
对于未来的拍摄机会，Juju妈妈坦言持开放心态。“唔希望剩系拍野，或者剩系读书，人生应该要有个平衡。对于拍摄工作，其实open mind（开放心态），但件事要有意义。而家每一日都有人approach（接触），每次都问咗Juju想唔想先。虽然我系佢妈妈，但唔可以强迫佢。我自己都唔想太多（拍摄工作），都要照顾妹妹，要攞个平衡。唔想因为套剧，将自己焦点完全落晒哥哥到。”
作为双职妈妈，她认为在照顾孩子以外，也要有私人时间。“同学仔妈咪都系我而家嘅好朋友，平时会带佢哋同啲同学仔一齐玩，妈妈就一齐食嘢。做妈妈都要get the balance（取个平衡），系好忙嘅，但都要有返自己me time（私人时间），当投入返凑小朋友，自己都会开心啲、正面啲。”
相关文章：暖男爸爸│暴龙哥妈妈离世现情绪问题 心理学家教路有咩要注意
按图即睇情绪影响