【心理追凶】卖鱼仔演过百次路人甲　方绍聪：我做得最好系呢份工

做无线艺员收入有几多，不用多说，那些艺训班出来的，除非家境富裕，否则有份兼职帮补生计是平常事，好像昨晚播出的《心理追凶Mind Hunter》，剧中以为自己误杀女友的舜仔（方绍聪饰），现实中他已在无线挨了7年，今次终于在《心》剧有重戏角色，但7年来方绍聪只可以狂做路人甲，收入微簿，年多前和朋友合资经营洗衣店，为了揾生意，方绍聪更主动到“一楼一”揾鳯姐洗毛巾。他接受《香港01》访问，说：“我哋主要喺洗毛巾，但当时冇生意，我同拍档讲，咁最大市场系性工作者啦，我就只身去砵兰街𠮶啲地方，一上去我话我嚟sell洗毛巾，啲凤姐就话：‘叫X冇任欢迎，如果sell嘢就唔该哂！’可能做惯二打六，我哋都俾导演X惯啦，人哋都好礼貌，所以呢间唔得，我咪去第二间啰，我同佢哋讲我哋平啲，而且有质素，有竞争先有进步嘛，结果最后有3间帮诊我哋，初时请唔到司机，我要洗埋仲要攞埋上去，其实都系揾食啫，演员只系我其中一个身份，我都要维生㗎。”

爆骚路人甲　多谢编导畀机会

未做洗衣铺前，方绍聪在无线多年来都系当闲角，剧集做路人甲，综艺节目当奖品先生，他说：“我做路人甲做到爆骚，做到每年差唔多100个骚，几乎每套剧嘅路人都系我，奖品先生都做咗好多年，好多人唔愿做，但我冇所谓，今次《心》剧有个多戏嘅角色，都系因为呢集嘅导演Calvin Leung，佢做助导𠮶阵成日揾我做路人，跟住佢升咗就畀呢个机会我，我好感激佢，另外做奖品先生，亦因为做得多，结果班幕后畀咗个机会我喺《Sunday扮嘢王》扮郭富城。”

演路人甲行簷篷　安全冇人理

29岁的方绍聪，大部份人叫他奶仔，他说：“细𠮶好肥，俾人叫肥奶，到大个出嚟做嘢，冇理由叫肥奶㗎，所以就改咗英文名Milkson，但电视台班阿姐又唔系好识读，所以叫我奶仔。”因为身型而改名，亦因为肥仔唛身型而入行，他说：“我报名读入训练班，我原本搭紧车去海洋公园返工哈老喂扮鬼，TVB突然打嚟叫我面试，我原本谂住唔去，因为我唔返工冇咗800蚊，但当时TVB𠮶条友话‘𠵱家成千人排队，你今日唔嚟就冇咗个机会。’我谂下又觉得好似讲得啱，我最后搭埋的士，成本好贵。原本只需要讲你叫咩名，面试编号就走得，但我唔甘心就咁就算，于是我喺珍姐同乐小姐面前话自己其实识跳舞，我仲即刻跳咗两嘢俾佢睇。到第二次面试，我再跳多次，其实我读IVE𠮶阵已经学跳舞，所以我想俾佢哋知道。”结果方绍聪在2009年成为24期艺训班，过关斩将先入到行，但在无线挨又怎会舒服，除了收入，被冷待亦是常事，他说：“记得有次拍《耀舞长安》，我哋几个训练班，要喺古装街的簷篷行，其实都好高㗎，挞落嚟都会死，当时梁烈唯都有份，我记得拍佢𠮶阵，有武师攞住张榻榻米傍住佢，但到我哋几个训练班上去，啲人走哂，好多人去食烟，好似冇人care我哋会唔会受伤咁….……”

因为“钟意”　再辛苦都挨落去

方绍聪有自知之明，他知道这条路难行，但仍坚持因为这是他最喜欢的工作，他说：“为钱人哋唔会喺TVB，如果为钱我乱做其他工都会多过喇，我拣艺员呢份工，因为我最钟意，同埋以我自己能力嚟计，我系做得最好，我可以做货车佬，我亦会做得好，但我冇钟意感觉，亦因为我钟意，就算40几度著住古装，我都可以响太阳谷（古装拍摄热点）做路人甲而唔觉得辛苦。因为我做完系开心嘅，只系呢个原因令我继续做落去。”