从港版风之谷说起：香港人点解咁钟意揾快钱？
听闻系晚清先有“恭喜发财”呢句嘢……以前嘛，根本就冇财可发，恭乜鬼喜……香港人特别钟意揾快钱。因为揾到，又用得到。我哋有最方便嘅方法，第度嘅唔系话想揾就揾到。你估度度打工仔可以lunch出去买六合彩然后交收iPhone再返公司炒轮？
又先讲个故事。
宫崎骏1984年嘅动画《风之谷》，1988年先在香港上。冇入场睇过嘅，你人生就错过咗极美好嘅事情了。重点唔系有几好睇，而系，当年呢套《风之谷》香港版，被称为史上最烂翻译，事隔30年而家仲有人讲紧。而十分可惜地，新版嘅影碟已经重新配过音。旧版录影带同影碟相当难揾，新一代只能在我等老嘢口中知道传奇。正如郑伊健套《中华英雄》出碟时已经cut走咗结尾佢飞上月球嘅经典一幕。
当年港版《风之谷》有几传奇？除咗无中生有乱译一轮嘅粤语配音外，最经典系仲有大量“恭喜发财”、“逗利是”之类嘅对白。《风之谷》都有得恭喜发财？嚟到香港咪有。当时当贺岁片咁推，死未。
新一代应该好难想像呢啲事情。肯定嘅系，香港人日夜不忘发财嘅文化，就源远流长。
小弟教书年代，有位旧同事，电话嘅萤幕保护，系“六合常中”。结果畀老校发现咗，当众闹咗一镬，话灌输啲唔好嘅价值观比下一代云云㖞。天地良心，我旧同事人格高尚，亦系位好老师。呢个先系重点，唔好以为想中六合彩嘅只系师奶，其实香港地由小学生到CEO，个个都想揾快钱。
讨论“揾快钱”呢个课题其实唔易，好容易变咗“金钱万恶”vs“揾钱无罪”嘅二分法。一系就批评香港人肤浅云云（讲呢啲嘅多数都冇乜钱），一系就讲人性如此何罪之有，甚至话其实香港人都唔系咁（但解释唔到做乜卖亲iPhone公司都会好静）。反正饮醉咗嘅当然话自己冇醉，揾快钱嘅人唔会话自己揾快钱。
我嘅睇法？我都系炒过iPhone赚过一万几千嘅人，近年“从良”唔再炒，主要系因为冇乜水位同太多人争。我当然亦炒过股票炒过窝轮，唔止，我连月饼券都炒过。读者可以睁大眼话自己唔系咁，叫我篇文唔好拉你落水，但就算真系好多人咁讲，都改变唔到事实嘅。重点唔系“你”有冇揾快钱，nothing personal。
港人有几爱揾快钱 打开报纸就知
对，香港人梗系揾快钱啦。话唔系嘅，我真系怀疑我哋系咪活在平行时空。iPhone开卖前有晒攻略，教晒你抢边款（我钟意个抢字），有乜分别，要预备乜。开卖日个个在公司起坛作法咁，闩晒啲无谓程式（主要系公司嘅Word呀Excel之类），去定洗手间，提早做晒啲嘢。媒体有晒即时新闻不停更新livescore，详细过奥运。
同样地，每次六合彩累积到咁上下奖金，你会见到传媒专题报道，话你知点买易中啲，咩时间买易中啲，边间投注站易中啲之类。 我甚至见过访问梁思浩叫佢分享下“心得”。炒iPhone就话有心得啫，买六合彩都有秘笈分享，真系令我服到五体投地（又不过，卖下广告，本人都写过篇博评教你买六合彩。记住，唔会提高你中奖机会，但就减少你中奖同几百人分嘅机会。）
【学吓逆向思维】台湾农历七月避开刀？其实鬼节做手术存活率仲高
更不用讲嘅系，你走入书局，打开报纸电视收音机，全部都系financial pornography。新股点认购，有乜国策股，南海打仗有乜股票受惠。工作去过唔少金融城市，香港系唯一一个街边师奶都识乜嘢系“引伸波幅”嘅城市，咩伦敦纽约东京新加坡真系行埋一边。
有得发财 先有得恭喜
以上嘅种种，仲唔系“揾快钱”？绝对嘅句子比较难讲，但相对嘅比较就容易。你同我都心知肚明，点计都好，全世界嚟讲，都好少有人好似香港人，或华人，咁钟意又咁精于揾快钱。
唔好睇少《风之谷》一句“恭喜发财”，呢句嘢应该系华人社区独有（OK，其实越南有，中国传过去的。）就系呢句嘢话你知咩系血浓于水，或陶杰口中嘅小农DNA，将两岸三地，新加坡马来西亚印尼华人，以及欧美嘅移民后代，连埋一齐。鬼佬当然都入乡随俗，过年同我哋“恭喜发财”。但我好相信佢哋好难理解，亦少不免对呢种文化鄙视几分。
不过，“恭喜发财”就唔系小农时代开始，听闻系晚清先有呢句嘢。起源系洋务运动嘅广州，中国人多咗同外国通商，呢句嘢亦扬威国际。以前嘛，根本就冇财可发，恭乜鬼喜。
讲到呢度，就似乎开始明白，点解香港人特别钟意揾快钱。因为揾到，又用得到。我哋有最方便嘅方法，第度嘅唔系话想揾就揾到。你估度度打工仔可以lunch出去买六合彩然后交收iPhone再返公司炒轮？
最紧要唔系活得好 而系活得比人好
香港由头到尾都系一个商城，仲系一个“醒掌天下权，醉卧美人膝”嘅地方。你要吃喝玩乐酒色财气，统统都有。唔好以为幸福系必然，想像下你在东欧某个小国，再有钱都好，你都未必有得现场睇麦当娜，亦冇得落街食米芝莲三星，甚至等部iPhone都等几个月。畀你拎到部亮黑色iPhone都唔系可以拎去公司楼下散货啦。
好多人写过，近代中国多灾多难，华人颠沛流离，缺乏安全感，香港亦然。上次篇博评讲《我至叻》同《话知你97》都反映到呢种不安，今朝有酒今朝醉，有钱就有得命运自决嘅心态。
更重要系，香港地唔止纸醉金迷，仲要人口密度高，资讯又发达。咁会点？呢个就系一个样样都会同人比较嘅城市。由读书比读边间读边科用乜电话去边间做intern去边度exchange，比到做嘢写字楼边区去边旅行住乜酒店食乜，到比买楼住边区MPF供边间，老婆去边生仔个仔去边度Playgroup。系，literally到死𠮶日都仲可以比较请边个嚟念经包边个场烧假钱定真钱。
在我城，最紧要唔系活得好，而系活得比别人好。
唔想咁样？好简单啫。改变唔到环境就改变你心态嘛，接受佢啦。都系心理唔平衡嘅，学点醒屈原个渔父话斋，人人都醉就自己队冧埋自己啦。If you can't beat them，join them。
改变唔到心态又唔想同流合污但又睇唔顺眼嘅，更加简单，移民啦。唔系晦气说话，香港人乜都要比较令人好累，系我一个移民多年嘅亲戚讲嘅。你搬去台东包你冇地产霸权冇iPhone你炒。不过呢，要移民，首先就要有钱……对，我亲戚当年都卖咗层楼揾到快钱先移民英国的。
（文章纯属作者意见，不代表香港01立场。）