从《我至叻》看港猪是怎样炼成的
《中英联合声明》1984年签订。当时已有大量流行曲反映香港人嘅不安同怀疑，对自我身分嘅困惑……但去到之后几年，香港人心又变咗。移民嘅移民，走唔到嘅留低，就开始接受现实，苦中作乐，甚至自欺欺人，扮睇唔到，明日愁来明日当。呢个年代，先系我最想讲嘅年代。
篇幅关系，今次唔写小故事，下次继续。
直入正题，讲时代曲，先讲时代再讲曲。固然我可以写阿妈蒸鱼之类嘅个人经历，但今次选择唔写对自己特别嘅歌，而系写大家都有共鸣嘅歌，讲到滥嘅，嗯，“集体回忆”。
每个人都觉得自己嘅年代最独特，我都唔例外。但客观事实系，三张尾嘅我，见证咗香港流行音乐登上顶峰，然后开到荼蘼盛极转衰。而在呢个谭咏麟恶斗张国荣，夹Band成风，以及四大天王嘅时代，最重要嘅事，冇得讲，一定系香港前途问题，中英谈判，八九六四，以及九七回归。
写呢篇文，希望借流行曲，话畀新一代听，呢个大时代，香港嘅精神面貌（Zeitgeist是也），系咩回事。
反映港人不安与困惑的那些歌
《中英联合声明》1984年签订。当时已有大量流行曲反映香港人嘅不安同怀疑，对自我身分嘅困惑，以及担心香港气数已尽，就咁玩完。例如达明一派1987年嘅《今夜星光灿烂》：
灯光里飞驰 失意的孩子</br> 请看一眼这个光辉都市</br> 再奔驰 心里猜疑</br> 恐怕这个璀璨都市 光辉到此
达明一派翌年仲有一首《今天应该很高兴》讲移民潮：
伟业独自在美洲 很多新打算</br> 玛莉现活在澳大利亚 天天温暖
呢首而家仲有不少人讲，旧年港产片《哪一天我们会飞》都有提到。
然后1989年，大家都知了，六四。相关嘅歌更多，1989年夏韶声嘅《妈妈我没有做错》：
妈妈我没有过错</br> 一起继续我与你</br> 不死的勇气
达明一派嘅《天问》：
纵怨天 天不容问</br> 叹众生 生不容问
沧海遗珠系同年圣诞黄沾主唱嘅《慈祥鹏过圣诞》：
慈祥鹏过圣诞</br> 问我要啲乜嘢玩</br> 我说畀个Passport我
最流行嘅系1992年Beyond嘅《长城》：
围着老去的国度</br> 围着事实的真相</br> 围着浩瀚的岁月</br> 围着欲望与理想
多得支联会年年搞维园晚会，好多年轻人都识呢堆歌。
但更有趣嘅系之后嘅事，唔想滥用“斯德哥尔摩症候群”，但去到之后几年，香港人心又变咗。移民嘅移民，走唔到嘅留低，就开始接受现实，苦中作乐，甚至自欺欺人，扮睇唔到，明日愁来明日当。呢个年代，先系我最想讲嘅年代。
移民不成 只能接受现实的一代
1991年，罗大佑嘅《皇后大道东》唱到街知巷闻，亦见证香港人已经接受现实，以戏谑嘅态度去应对：
到了那日同庆 个个要鼓掌</br> 硬币上那尊容 变烈士铜像
唔似上面提嘅歌咁多隐喻，林夕填嘅词全不避忌，但已经系用嬉笑嘅心情，夜行人吹口哨壮胆，话畀自己听，冇事嘅，唔使惊，换支旗啫。
于是，带到去今日我最想讲嘅𠮶首歌，我心中嘅时代曲。系陈百祥阿叻嘅《我至叻》。Yeah～～我至叻～～大家跟住唱。绝对唔好低估呢首歌，我写文时做实验，问公司两位90后助手，以上𠮶堆歌，佢哋全部都唔识，顶多系“好似有啲印象”。但我一讲《我至叻》，大家就识唱，跟住做埋手势。Like it or not，呢啲就系集体回忆，文化遗产。
由我懂性以嚟，就冇掩饰过我对阿叻嘅厌恶，老豆带我睇谭咏麟演唱会，到阿叻出场，我就话要去厕所。由中学作文讲到而家写博评，由ICQ闹到WhatsApp。早几年有认识阿叻嘅Private Banker出于好意，话我知其实阿叻真人点点点。不，呢个完全不重要，亦唔系我，或者大家要关心嘅嘢。
我最关心嘅，系阿叻，以及《我至叻》，背后代表嘅价值观。而家成日有人怀缅当年good old days嘅香港精神，揾一个人代表，必定系阿叻，《我至叻》就系时代金曲。
喜欢与否 阿叻就是那个时代的代表
阿叻在媒体上，电影中，以及MV入面（系，记得睇埋《我至叻》个MV）表现嘅，都系咁上下嘅嘢：恶俗，浮夸，符碌，口不择言，不可一世，反智，拜金，识少少扮代表。正面少少嘅系自信，相信命运在我手，敢作敢为，有成就（但主要都系钱）。个MV如果系大陆土豪？你一早掟爆电视。
阿叻就系赌片两大主角互抛浪头，侧边冷手执个热煎堆拎Pair 8赢到最后𠮶个。阿叻就系扮李嘉诚第3个仔李泽叻去泡林熙蕾𠮶个。佢唔代表你？可能系。个个都咁讲啦，边有人认自己钟意。但，佢代表𠮶个时代。
请循其本，1995年，佢只凭呢只歌，已经在红馆开7场演唱会，系史上最少歌嘅纪录。而我提提你，𠮶个年代，红馆开演唱会嘅唔系坤哥，系梅艳芳黎明陈慧娴张学友。咩人入场睇？断估唔系屋邨阿伯或新移民大妈。我好相信，当年堆观众，而家好多系企业入面嘅高层，或者系拎住10个8个单位，一亿几千万身家，full pay一层楼畀个仔做中学毕业礼物嘅𠮶班人，所谓的英殖港产精英。
睇下《我至叻》嘅歌词，反映系乜？系“灵活易适应 勤力手快又眼明 识睇时势兼淡定 买屋买车仲有钱剩”嘅香港smartass精神；系“闲闲地识讲中英 起楼起桥快夹精 鬼佬睇到都眼擎擎”嘅自信／自大；系“你话香港地最好 打工的好似做大佬 股票金融确系宝 连街边的阿婶都胆粗粗”嘅投机贪财纸醉金迷；系“将有会有乜 有乜唔做得 如果怕九七 实搲到头发都甩 上面咁多金掘 怕你手软唔去执”嘅乐观。
公平讲句，《我至叻》年代嘅阿叻，仲未系睇唔起后生仔，佢一样讲“后生仔多新意零食有Taste 衣着配搭够Sense”，不过我估正常人唔会忍到两分钟听到呢段。而《我至叻》仲系一首广东话歌词填得好好嘅“本土”之作，对，填词作曲嘅系区瑞强。民歌王子，笠住顶帽抱结他同你讲陌上归人嘅区瑞强，你嘅童年被毁未？
阿叻冇变过 变嘅只系香港人
唔服？个别例子？咁我讲多首歌。早少少，但一样值得讨论，就系歌神，许冠杰嘅《话知你97》，1990年嘅歌。许冠杰嘅地位形象，远比阿叻为好，但《话知你97》表达嘅心态，同《我至叻》其实相当相似。
许冠杰呢位香港之子，讲嘅系“我话知你97 其实使乜惊到求神又拜佛”嘅盲目安心；系“已经预冇法走得甩（又冇Short Cut） 移民外国 亦系听糟质”嘅无奈；系“咪匿响屋企 速速Call机 Call班知己 睇返出无厘头搅笑戏 卡拉OK 队樽拔兰地 High High地 高声乱唱 再去旺角打机”嘅消费主义；系“明日懒鬼理 最紧要依家Happy 话知佢死”嘅今朝有酒今朝醉；系“断估或者到咗97（实刮多笔） 人人暴发 My friend good luck”嘅金钱至上。 你睇呢一切一切，其实同《我至叻》，唔系好大分别，顶多系少咗浮夸恶俗。前途？政治？下一代？歌神冇提过啵。嗱，至少“我至叻”都仲讲“示威投诉任你噏 唔系犯法点都得 基本法去昅一昅 肯定唔会俾人屈”。
返到而家呢刻，将来系点我唔知，讲真我亦懒理，唔想理。但历史唔容我哋否认。香港人当然可以觉醒，但唔好忘记你嘅历史，甚至系你嘅共业。唔好以为回归之前香港啲中产点咁高风亮节关心政治。𠮶个年代讲“放认关争”、“认中关社”嘅，系死左仔，国粹派，系入唔到洋行做大班的。我港大同系师兄梁锦松就由国粹派变做美资Banker，然后做官娶埋国宝，又一英殖smartass（绝无不敬）的典范。
知道过去，就明白现在。今日个个讲“港猪”，港猪点嚟嘅，睇完呢篇文听完呢堆歌你应该知。当年嘅香港人，全无远见，揾钱至上，大大咁高估咗自己嘅影响力（大陆要跟我哋学嘢），亦远远低估咗中国经济政治军事外交嘅崛起，以为最后系人哋跟你𠮶套。
阿叻冇变过，变嘅只系香港人。而当年捧佢上神台嘅，一样系香港人，𠮶班畀人话系英殖年代有品味嘅香港人。
（文章纯属作者意见，不代表香港01立场。）