【学吓逆向思维】台湾农历七月避开刀？其实鬼节做手术存活率仲高
照旧，先讲个故事。我第一次去台湾，系前女朋友请我去（爽！）。某次佢嘅台湾朋友同我哋一齐晚饭。小弟饭后食菠萝酥（唏，第一次去台湾嘛），顺手请埋佢朋友食，佢朋友婉拒我好意。点解？唔系台湾人唔食菠萝酥，而系因为，佢系做护士嘅，而台湾医护人员有不少禁忌，其中一个，就系唔食菠萝，特别系鬼月（农历七月）。因为菠萝台语谐音“旺来”，食完菠萝，就会忙到停唔到手咁话。呢幕就系我对台湾嘅第一印象。
中共讲无神论，众多高官私下拜神系另一回事，香港就叫做国际都会，新加坡国父李光耀话自己最憎风水星座之类。在华人社会中，台湾应该最怪力乱神，满天神佛。选总统都大把命理大师霸占报纸头条，台湾连股票电视台都玩扶乩，远比只系日日讲“水星逆行”、“荧惑守心”嘅香港行家有型。
迷信鬼月唔开刀 其实存活率仲高
然后早两星期，我在台湾百无聊赖睇新闻，睇到个故事：话说，不少台湾人，特别系中南部，有个传统迷信，就系鬼月唔好开刀。你以为冇乜受教育嘅先系咁？错啦，连大学教授，甚至医生本身都系咁。
于是乎，往往喺农历六月八月，就特别多人开刀，鬼月呢，就特别少。医院做过统计，话有时争成10%以上，都咪话唔明显。
以上种种，其实年年新闻都报。今年比较有趣嘅系，有人做统计，发现其实鬼月开刀，唔会特别易出事。唔止，原来鬼月开刀，存活率仲比六月八月高啲。
报道冇讲点解。但至少可以谂到两个原因：
︱第一，鬼月唔肯开刀，拖到八月嘅，往往病情只会恶化。迷信鬼月之说嘅其实有点自我矛盾。若果真系信鬼神之说，咁阎王要你鬼月死，点会extend到八月几？至于现实中有冇得“提早开刀”？有乜影响？就留比专业医护人员答。
︱第二，又令我谂起菠萝酥。个个六月八月开刀，医护人员日日旺来，多得你唔少。医护人员都系人，人当然会犯错，忙中特别易出错。七月鬼都唔多只，医护人员冇咁忙，出错机会应该细啲。
对付迷信 试试逆向思维
所以，真系人弃我取。金融界叫呢啲Contrarian逆向思维。人人踩到地底泥嘅股票我先买，人人仆去六月八月做手术，你记住避开；人人唔敢七月开刀，你记住去。咁样就即使唔赢在起跑线，都可以唔使咁快冲“终点线”。
留意，呢个世界上，可以话有两种迷信。一种真系信则有，不信则无。另一种呢？系自我实现预言，只要有人信，就会成真。
Contrarian，用落第一种迷信，比较简单。例如做手术。仲有乜例子？例如买六合彩。买六合彩都有得Contrarian？ 是真的。读者有福了，本人教埋你买六合彩。其中一个秘诀就系——记得，净系买31以上的大冧把。
我上次写完篇《九头鸟》，居然仲有人以为我唔识数学？“大冧把易中啲嘅咩？ 你咪呃我！”对，大冧把唔会易中啲，机会应该系同细冧把一样 （虽然，有数学家坚持大冧把真系易中啲。原因？油多一只字上去，个波重啲㖞。数学家系可以好神经的）。
大冧把唔会易中啲，但，中咗之后会点，就有关系啦！好多人钟意用生日日期之类买六合彩。你拣大冧把，唔会易中啲，但可以避开同人撞冧把嘅机会。我估你唔想好似陈友套《黑心鬼》咁，中头奖同几十万人分。呢，买咩8号18号28号果啲，更加高危。买44号就好啦。
同样道理，买股票不妨拣啲不祥冧把，买马不妨拣啲听落古怪或冇人识读嘅马名。呢啲嘢唔影响赛事本质，但影响买嘅人。李嘉诚只13号和记黄埔，个个股东笑住离场。反面教材？一个字。8号仔。唔睇财经新闻都识。
买凶宅 降成本 逆向思维好例子
Contrarian，用落第二种迷信，“自我实现预言”，就恶搞啲。例如乜？ 例如，本文作者唔会叫你去买凶宅。
同鬼月开刀有乜唔同？唔同在，鬼月开刀唔会拖低你存活率。但死过人，就真系影响你间屋嘅价值。点解？因为有人信，因为好多人都有啲怕间屋发生过惨案。有人信唔等于间屋就会闹鬼，但就等于凶宅会平啲——对好多业主嚟讲，惨过撞鬼。
不过话说回头，在香港，早十年八年，买凶宅似乎系不错的投资。原因？首先，原来好多系租或卖畀啲“唔信”嘅人，可能系教徒或者外国人。听闻有外国人知道发生过命案都唔介意，觉得仲好，“多啲人陪佢”。喇，佢就Contrarian啦！你哋觉得系差嘅嘢，佢当系优点，边有得输。
二来，一切有代价，迷信都系trade off。凶宅比起普通单位嘅折让，近年收窄不少。除咗上面讲嘅原因，仲有一样就系——有乜恶过枉死嘅恶鬼？就系上唔到车嘅人！所以最后你发现，你肯住凶宅都好，都只系平得些少，因为，大把人好似你咁谂。
对，金融上，Contrarian最难搞嘅就系，个个都Contrarian，就反而要Contra-contrarian。如果人人都咁清醒，唔要1至31，涌哂去买大冧把，以上方法，就自己玩死自己，self defeating。
不过咁，历史话畀我哋知，人类系冇从历史得到任何教训。所以，记住下次都系拣鬼月开刀，同埋记得六合彩买大冧把。
当然，实务上，其实提升咗小小咁大把嘅机会率，都系冇乜分别。正如旧公司有位同事，坚持去上海要坐国泰港龙唔坐东航，原因话“安全啲”。我话，其实你机场坐出去𠮶程车，点都比你坐飞机危险N倍。遇到空难，可能难过中六合彩。
（本文纯属作者意见，不代表香港01立场。）