【普教中粤教中】我们都是用广东话学中文长大的│Sci Papa

几年前，笔者上广州探亲戚，喺“和谐”号上偏偏看到令人觉得十分不和谐嘅一幕；一个妈妈用广东话闹紧个仔——“你个衰仔，叫咗你早啲出门口，正一陀衰家！”，然后个仔又闹返佢啊妈——“他妈的，你这个臭婆娘，那里像一个妈妈！”奇怪嘅系个仔用嘅系普通话⋯唔通佢哋唔系两母子？！又或者佢阿爸系讲普通话嘅？！

见到亲戚后，笔者发现呢个情况其实喺广州都几普遍。笔者自己𠮶一辈用广东话交谈，细𠮶一辈却爱用上普通话。一家人出生于同一个城市，住喺同一个屋苑，坐喺同一张饭桌，却用上两种唔同嘅语言；呢种距离感，原来系因为唔少广州幼稚园同小学已用上普通话教学，小孩子就惯性使用普通话。

当时，笔者不以为然，但睇嚟自己最亲嘅人惯性讲同自己唔同嘅语言，未必离香港好远！老实讲，对学习其他语言，笔者绝对十分支持，但对于放弃用自己嘅母语而改用其他语言代替来教学，实在不能认同，就算只系从学中文开始。

喺呢个世界，其实有唔少少数族裔生活喺大城市，都希望城市可以用上佢哋嘅母语为下一代提供教育。主要原因系唔少研究都发现，用母语教学可以令小孩嘅学习事半功倍！母语令人与人之间有更好嘅沟通，令小孩喺学习上能更有自信，从而有较高嘅学习效率（https://www.ajol.info/index.php/pelj/article/view/156258）！甚至有研究发现用母语教学，令小孩嘅语言同数理学习同有优势（https://www.tandfonline.com/doi/abs/10.1080/14790718.2017.1359275）！

呢啲研究结果其实并唔出奇，用返自己最熟悉嘅语言，学起嘢上嚟梗系容易啲！虽然BBC报导中嘅一个统计指出，喺香港讲普通话嘅人数由1996年只有25%上升至2016年差不多有一半（49%），但讲广东话嘅人仍然系大多数，喺2006同2016年仍有差唔多95%人讲广东话（https://www.bbc.com/news/world-asia-china-40406429），试问少数族裔都期望有嘅母语教学，点解喺差唔多人人都讲广东话嘅香港要背道而驰，用普通话教中文？

再者，同一篇BBC新闻更指出，广东话比普通话有更长嘅历史记载，广东话喺汉朝时已有记载，但到元朝时先至有有关普通话嘅文献证据；令人不禁问推销普教中，系无私嘅单单为了香港未来嘅主人翁加强竞争力，定系主管香港教育嘅杨姓男子自私嘅一个政治任务？

笔者呢一辈人，唔单至冇普教中，甚至连普通话都唔驶学，咪又系一样可以阅读中文，可以写下中文文章，有唔少同辈仲可以喺中国讲普通话嘅城市做得风山水起；我哋都系用广东话学中文长大，我哋嘅中文真系咁不济，以致我哋失去优势吗？

Sci Papa （专页：Scientific Papa）

喜欢科学，但更喜欢老婆跟女儿。觉得科研跟“凑女”都是要有极度的耐性，不怕失败，还要懂得自我反思后用不同方法再尝试！将育儿及科学融合，期望伴著女儿走一条快乐的成长路。