【果栏中的江湖大嫂】大结局播完　冯盈盈：特别呜谢黄光亮培训我

《果栏中的江湖大嫂》终于大结局，昨晚一班演员就约埋一齐食饭坐定定睇剧。最后一集亦都是以大团圆结局作结尾。剧中小狼女（冯盈盈饰）亦在被判刑2个星期后出狱，不过后续似乎就尚未有交代。以第一次拍剧来说，其实冯盈盈表演都相当唔错，喊戏一幕亦有惊喜。

冯盈盈接受《香港01》访问时说：“呢个套剧出街嘅时候帮我储咗好多经典cap图用，但系我每晚睇都好紧张。30集都结局都好完满，所以我每晚都唔使精神紧张，唔使担心又会有咩唔靓嘅cap图出嚟。”冯盈盈表示剧中小狼女的性格其实与自己也有几分相似。“例如小狼女发脾气闹人𠮶啲，我屋企人睇到都话同我朝早发脾气系一模一样。”

初次拍剧，冯盈盈表示很多谢剧中的多位演员导演的教导以及监制的选用。“首先，喺同事方面。我想特别呜谢亮哥（黄光亮）。虽然同场唔多，但系每次佢都好睇住我呢个新人，教我好多嘢。佢唔止讲2句咁简单。佢直情系拉住我叫我做练习。讲嘢把声点样会响啲，表情各方面，佢仲会叫我做一次俾佢睇，好似上堂咁有心去指导我，帮我培训。”

冯盈盈：“第2个就系幕后，细ming导演、材叔（梁材远）仲有其他人都俾咗好多指点我，同埋又俾咗好多机会我。有好多人都话估唔到我第一次拍剧都可以做咁丰富嘅角色，我真系觉得佢哋真系好大胆。其实如果俾我做监制，我都唔够胆揾个新人嚟做呢个角色。所以点解话有啲戏要饮醉去做，我会奋不顾身去做。因为真系唔想辜负佢哋嘅信任。”

冯盈盈：“第3就系屋企人。除咗要多谢爸爸令我可以喊得出之外，其实妈妈都好紧要。因为拍剧时候我成日拍到好夜，佢都会煲好汤俾我，又会帮我准备第2日要用嘅嘢。再加上我第一次拍剧成日都会发脾气，好大压力，又唔识控制情绪，返到屋企都继续小狼女上身。其实佢都忍受咗我好多。”