【正义联盟．影评】揾返童年时睇超人片集的过瘾和感动

唔公平。DC Comics 改编的电影，大概是中了诅咒，又或者是传媒、评论有意无意地偏颇，屡屡遭受不公平的评价。

《正义联盟》（Justice League）一出，话套戏难睇的文章一地都系。苍白、丑陋、空洞、散收收……都系常见的评语。《Mashable Asia》甚至有篇文话套戏垃圾到似有曱甴的朱古力碎饼干（like a chocolate chip cookie with cockroach chunks），哗，刻薄到呢。

这篇文唔系要为《正义联盟》“平反”，只系想提出几点思考——讲真，套戏唔系好，但绝对唔值一片负皮。今次专登试下多用广东话，贴地一点，正如拍超级英雄，而家都唔兴“高大全”的一套吧。

【编按：“高大全形象”是文革时期用语，当时“四人帮”提出文艺作品必须突出正面英雄人物，主角必须“高、大、全”——高大、胸怀宽广，没有缺点，全心全意为人民服务。】

【编按：以下内容含剧透，逃生门在此。】

一、批评《正义联盟》塑造角色不够深刻，无疑有道理，但既有先天限制，拍到咁已经唔太差啦。DC 先天不足，为咗追赶 Marvel（人家都拍到 Phase 3 了，DC 才第一次大集结），DC 决定先拍联盟戏，才开拍一部一部个人英雄传。

但要用一部长片的篇幅讲述三个初次出场的英雄（闪电侠、水行侠、钢骨），难免只能够粗浅带过。问题系，我们觉得套戏讲得浅，系因为大家都知道佢哋各有完整世界观同故事，如果只针对《正义联盟》的格局，其实唔系唔合格的。

难关当前，要揾各路高人帮手应付，呢种剧情发展其实好常见。以近年按这套模式去拍的商业大片为例，例如《职业特工队》（Mission: Impossible）和《狂野时速》（The Fast and the Furious）系列，戏里面有好多有趣配角，其实都系临时邀请加入，描写得唔深，若果受欢迎先喺下一集丰富其背景和故事，但系大家唔会批评编导写人写得差。又好似《潜行凶间》（Inception，2010），其实“造梦师”（Ellen Page饰）同“伪装者”（Tom Hardy饰），其实都系好“功能性”既角色，专业、有型就得啦，大家都钟意吖，冇话路兰写得唔深入啊。

同样道理，以戏论戏，《正义联盟》写人唔系特别好，但算系交代得有条理，基本性格都写出嚟了，比起上述几套戏的“功能性”角色（钢骨搞电脑，闪电侠屈速度，水行侠只揪劲，功能同一般偷盗片的电脑黑客、跑车手、退休军人一类配搭冇乜分别），《正义联盟》甚至愿意多挖深少少。

大家觉得《正义联盟》闷，一来系因为三个新英雄要用同类的方式介绍，套路重复；二来前段篇幅稍长，就挤压了五大英雄聚首的文戏，唔够互动，唔够喉。呢个严格嚟讲系 DC 的策略问题，《正义联盟》编导接咗一条咁难搞的作文题目，结构先天有问题，但人物描写其实已经合格。

你谂返，《美国队长3：英雄内战》（Captain America: Civil War，2016）里面蜘蛛侠初出场，描写其实都好粗浅，但从来唔会有人批评。点解呢？系因为大家预知佢之后会有个人电影，系 Marvel 的策略，唔系编导的不足嘛。DC 只系讲多少少，就变咗好闷了？

二、咁就延伸到第二点啦——大家其实预设咗乜嘢心态去睇超级英雄电影呢？

用01博客做例子啦，方俊杰讲《雷神奇侠3：诸神黄昏》（Thor: Ragnarok，2017），话头两集“带点严肃，带点沉重，带点文艺腔。似 DC 多于 Marvel”，结果证明唔多掂，所以“最好不要花费气力探讨什么大意义”，“顾客永远是对的”。

方生完全冇考虑角色性格、叙事风格唔统一、唔连贯的问题，更唔理喺原著漫画中、神话原型中“诸神黄昏”到底系点样嘅一回事，结果严肃变成搞笑，毁天灭地变成玩闹乱斗。可惜偏偏就系这一种处理，大家睇得嘻嘻哈哈，票房同舆论都好成功。

问题系，Marvel 票房成功，观众受落，代唔代表咁就系好先？这是电影评价，定系市场分析？我上篇讲《雷神3》，就指出套戏扼杀了 Marvel 世界的发展空间，舍弃深度，无无聊聊，只求短线的利益，令人失望（虽然我个人其实钟意 Marvel 漫画人物多于 DC）。

不过又咁，我又唔系盲目认为“严肃”先系好。好似陈锐谈《正义联盟》，话“DC 风格本是以探讨社会或是人性的黑暗，世界观也是比较贴地”，于是“DC 开始要去迎合观众，注重娱乐性”，所以就唔掂啦，我就觉得有少少捉错用神——以上对 DCU 的形容同观察，查实系点样出嚟嘅呢？

如果只系“相对”于 Marvel 嚟讲，呢个形容冇乜问题，但如果独立去睇 DCU，其实唔多成立。要记得，DCU 至今只系拍咗五套戏——《超人：钢铁英雄》（Man of Steel，2013）、《蝙蝠侠对超人：正义曙光》（Batman v Superman: Dawn of Justice，2016）、《自杀特攻：超能暴队》（Suicide Squad，2016），再到《神奇女侠》（Wonder Woman，2017），然后就到今次《正义联盟》喇。呢五套戏，虽然系相对会讲多少少社会层面的事，比较贴地，但论风格，前两套同后两套相当唔同，只能够分为“萨克薛达（Zack Snyder）风格”与“非萨克薛达风格”，唔似 MCU 有比较统一的形式（连画面色调都拉得好接近）。超级英雄要讲人性黑暗，都只有路兰（Christopher Nolan）三集蝙蝠侠叫讲得深刻少少，但佢唔系 DCU 正式一份子。

我其实想讲的，就系我哋应该用咩心态睇《正义联盟》。如果我哋习惯了 Marvel 的故事、风格和节奏，当然会觉得《正义联盟》相对长气，想幽默又唔够好笑。但 Marvel 最近几套大小集合的作品，真系算拍得好咩？如果我哋要求 DCU 走暗黑风格，深入发掘心理，呢个又到底系咪最适合 DCU 的路？

Marvel 其实都有一套尝试走贴地少少，暗黑少少，节奏慢少少，一个故事讲几个主角的组队式电影，不过并唔系 MCU 世界里面，而系《神奇四侠》（Fantastic Four，2015）。那无疑是一次失败的尝试，戏里面的确系有有神采的处理，可惜整体拍得麻麻，普罗观众亦唔太受落。

因此我认为，《正义联盟》并唔系要向 Marvel 靠拢，而系调整紧 DCU 的风格（根本 DCU 都尚未完全成形），继续向 Marvel 的弱点打，而我觉得系成功的。

三、咁《正义联盟》针对的系 Marvel 边几个弱点呢？

首先，虽然《正义联盟》最后连“大家姐”神奇女侠都笑自己好似带紧一班细路仔咁，但个别咁睇，其实几个英雄都拍得好型好 man，一啲都唔细路仔。蝙蝠侠、水行侠同超人那种阳刚味的型（钢骨都有少少傲气，闪电侠亦唔系纯青靓白净），系 Marvel 一直缺乏的。

罗拔唐尼（Robert Downey Jr.）唔型咩？雷神唔型咩？当然系好型，但佢哋系偏向潇洒、自在的型格，同《正义联盟》追求的阳刚味道唔同。

同样系亿万富翁，铁甲奇侠句句串串贡，讲嘢快过你谂嘢；而蝙蝠侠永远一脸绷紧好鬼认真，连把声都要压到好低沉，两种型法好唔同。宾艾佛力（Ben Affleck）系演得麻麻，但个型格都算喺度。

同样系长发留须爆肌男，雷神搞笑化之后，愈嚟愈似徐锦江；相反水行侠一行出嚟，man 到呢……前者突然就被比下去。

唔单止系角色的处理，连画面上都帮唔少，好似水行侠第一次显露超能力，系怒潮中救起沉船上的平民，𠮶个潜浮在浪中摆起嘅甫士，笔直、雄伟，似足希腊神像，型到震（超人刚复活时系空中飘浮单挑众英雄的甫士亦然）（利申：非基）。又好似佢哋集结后准备大打佬，各人摆甫士扎恒马，那种型格同肉紧，往往系 Marvel 之没有——Marvel 英雄打到定格画面出飞腿，又或者合作用神盾反弹死光咁，系好爽，但爽皮同有型有劲，系两种风格黎嘅。

第二样针对的，亦系 Marvel 向来被诟病的——配乐写得太过平庸，亦冇代表到各路英雄的主题音乐。

《正义联盟》今次揾名家丹尼叶夫曼（Danny Elfman）写音乐，整体唔算突出，但佢识得点写。超人同神奇女侠个 theme 好出，一听就知佢哋要出场了。最令人惊喜系佢用返自己帮添布顿（Tim Burton）所写的蝙蝠侠音乐（所以故事中管家同蝙蝠侠提到企鹅人，唔系路兰三部曲里面的歹角），识货的一定听得出，感动到呢，虽然改编咗唔少，但足够醒神。

第三样，系延伸自上面两点的。有阳刚型人，有醒神音乐，仲差咩呢？就系打得好睇的大战了。

李美话大反派荒狼“又再犯上铺垫不足的流弊”，方俊杰话“更惨是个大佬相当弱鸡”，罗伟强话“英雄间能力过度的不平衡，令合作性减弱”。佢哋讲的唔算错，但系今集摆明系先导，幕后大佬未出场。的确，荒狼唔够描写，系可惜，但纯粹讲打，肯定唔系弱鸡。唔好忘记超人未出场前，正气朋友一直唔够打啊。

至于话众英雄能力唔平衡，问题系众英雄都系刚刚出场，根本未熟练掌握、发挥自己最大力量，何况超人确系好打过佢哋好多㖞。正如喺 MCU，雷神同变型侠医都摆明好打过所有人啦，只系 MCU 摆明唔畀佢哋玩晒之嘛。DCU走另一条路，唔得咩？对我嚟讲，MCU 拍唔出雷神同变型侠医喺漫画里面那种毁天灭地的力量，先至系到喉唔到肺啊。

睇返两集《复仇者联盟》（The Avengers）系列，第一集外星人想以多为胜，其实唔大威胁，洛基（Loki）亦唔系特别好打；第二集打奥创（Ultron），又系以量多胜，单挑单冇只兵够众英雄打；就算系《雷神奇侠3：诸神黄昏》，讲到大奸角劲到一招打烂雷神锤，但结果雷神神力一觉醒，咪又系打几个回合就收档？有冇边个批评打得唔好睇呢？有冇人批评套戏“急就章”呢，觉得角色能力“过度的不平衡”呢（雷神的同伴，除咗 Hulk，全部弱好多㖞）？唔多见吖，所以我一开始就话大家唔公平啰。

结论就系，大家习惯咗 Marvel 的打戏，忘记咗咩叫拳拳到肉。系，超级英雄唔系真功夫片，但特技打斗，唔应该只系得爽皮一条路，系应该打出力量的。

Marvel 拍大乱斗拍得出色，但出拳也好，中拳也好，就系感受唔到拳劲；好似美国队长用了好多巴西柔术一类功夫，打得明快，但唔见力道；又好似雷神神锤转转转，被打中的立即就被弹开，注意，系弹开，系感受唔到那种中锤的痛的（这和动作节奏有关，但更关乎音效设计）。

《廿二世纪杀人网络》（The Matrix）系列系开启超级英雄式特技打斗的先驱，但拍到第二三集，一样有同样毛病，Neo 同 Agent Smith 打到叶问式咁快速出拳互搏，可是完全唔见力道的。

DCU 明白咁样系唔掂的。《正义联盟》同样打杂兵，但唔会轻轻松松人人都拆到骨，蝙蝠侠单对单甚至有点吃力（美国队长、黑寡妇、鹰眼以一对一打杂兵系问题唔大的）；超人打萨德将军、打魔人毁灭日、打荒狼，一拳轰埋去，系打穿大厦、爆裂石头，声效都唔同，连助跑起跳／飞那一下，都见到／听到力量的。

虽然我哋都知道超级英雄打不死，但冇返咁上下“痛感”，又点会过瘾呢？睇返对家 Hulk VS Hulkbuster，算系 Marvel 打得最劲、设计得最好的一场只揪了，但都系以明快为主，中间再摄两三个幽默位，气势都系比唔上 DCU。即使睇返 Marvel自家拍摄的动画电视／电影系列，都打得好睇好多啦。

简单总结︰睇超级英雄，除咗轻松幽默，除咗暗黑严肃，我哋真系忘记咗第三条路，其实亦即系要还原基本步，就系简简单单制造一场末日危机，然后好型好劲咁打镬金啰。

正如睇《龙珠》，早期系轻轻松松冒险加搞笑，后期变咗保护地球打到癫，大家钟意睇边一种？其实鸟山明前期后期都系经典，宜家到咗《龙珠超》（鸟山明有份筹划的），两样都想拍，但又两头唔到岸，就好似《雷神奇侠3：诸神黄昏》咁，咪唔太理想啰。

客观去评价《正义联盟》，以戏论戏，从电影角度讲，佢唔系好又唔系太差，同《雷神奇侠3：诸神黄昏》其实根本就系同一水平嘅戏，只系路线唔同，大家喜好唔同者。

睇《正义联盟》，就好似睇九十年代《龙珠》剧场版咁，冇乜剧情，打得好睇就够了，今次似《龙珠Z极限之战!!三大超级撒亚人》（1992），系唔够精彩，但大家期望下次就系《燃烧吧！！热战·烈战·超激战》（1993），希望将来《正义联盟》的终极奸角（Darkseid）出场时，可以好似传说中的超级撒亚人布洛连咁，打得灿烂又够激啦（我对 Marvel 拍 Thanos 愈嚟愈冇信心）。

记住，我唔系话超级英雄片“只应该”拍到好似《龙珠》剧场版咁，系可以拍到好深的，但亦不妨回到童年时睇超人片集的感动啊，系唔系先？

（本文纯属作者意见，不代表香港01立场。）