揾工．CV｜照抄履历范本HR随时睇到厌 教你由头写起2大格式关键
踏足咗呢个社会一段日子，笔者由以前“好傻好天真”，去到而家都叫做有返啲经验，而揾工嘅模式都因为咁而变咗，至于份CV又变成点呢？格式又有咩要注意，啲skills又点写好呢？咁就要讲返以前先。
点击下图睇下点写份好CV！
唔知大家系咪同笔者一样，初初揾工（甚至而家）都会渔翁撒网，系又apply唔系又apply，抱住一个“总有份会中”嘅心态，试图喺“工”海揾到属于自己嘅“另一半”，但呢个就系问题所在！
首先，我哋尝试从交友app嘅角度去分析呢件事（事关笔者有个朋友最近几乎试过哂所有交友app）：
你玩交友app嘅目的系咩？不论系揾人“过世”定“拍散拖”都好，都系想识个朋友，甚至揾到个伴侣。咁当你用个app嘅时候，除咗第一时间睇人哋张相之外，系咪都会睇唔同条件先？
咁问题就嚟啦，当你见到哂人哋想要嘅条件系啲咩，例如：唔食烟、唔饮酒、冇宗教信仰……你又唔符合人哋嘅条件，咁你又点会收到回复呢？
讲返揾工又点呢？先讲格式。
好多人都会选择上网揾template，笔者初初出嚟做嘢又何尝唔系，贪方便嘛。但有一次见工嘅时候，个HR就咁问：“你觉得自己份CV有冇咩问题？”笔者当时心谂，都执咗咁耐，唔系仲有错呀……
然后佢就补多句：
你份CV系写得几好，但你呢个template我都已经唔知见过几多次，如果你真系有心喺呢度做，真系觉得呢份CV代表到你自己嘅话，你又会唔会就咁揾个template就send出去畀人先？
笔者当下都无言以对，亦都因为咁，于是就决定要由零开始整一份CV。当然，一定会睇好多唔同嘅reference，但最起码你唔会再畀HR觉得你hea先啦。
格式嚟讲离不开两个条件：简洁、清楚。无论你有几creative也好，最基本就系要人睇得舒服，咁你先会有被选择嘅机会，如果要个HR睇得好辛苦，甚至睇都睇唔明的话，你又点会有机会去见工呢？
当解决咗最基本呢两个条件，就可以畀返自己嘅style落去，咁你可能就会谂：如果我净系识用Word，可以有啲咩style……？
而家咩年代呀？笔者上网Google下都揾到大把YouTube片教人点做啦，净系识用Word并唔系借口。（睇哂篇文先好睇下面𠮶两条片呀！）
呢round笔者嘅！参考片一、参考片二
相关文章：相关文章：【揾工】忽略关键字、自传式分享 7个写履历表常犯低级错误
咁skills又点写呢？
假设你想揾marketing嘅工作，人哋可能会要求你识SEO、Google Ads之类嘅工具，当你份CV连呢啲keywords都冇嘅时候，你份CV根本唔会去到HR手上，你冇睇错呀，个人系唔会见到你份CV㗎，点解？
因为越嚟越多公司都会用applicant tracking system (ATS)去悭返啲时间，而呢个ATS好多时会睇嘅，就系你份CV hit到佢哋份job post内容嘅几多percent。
例如唔同嘅skills同tools，所以你第一件事要做嘅，就系睇返人哋个job post有咩要求，再摆返啲keywords落去。
相关文章：求职揾工｜CV寄极冇回音？ 3大“阿妈系女人”级小错切不可犯！
其次就系啲skills有几“专业”，又点样分类？其实所谓咩professional、elementary之类，真系睇你自己觉得自己咩斤两。假设先讲professional，笔者嘅定义就系有关呢个技能又或工具嘅任何问题，你都会解答到。
如果你自问系咁，绝对可以写落去，但如果你觉得自己唔系，就千祈唔好“扮四条”，否则畀人试一试，你到时唔识做或者答嘅时候，真系会好肉酸……
当然，你系绝对可以讲大话，唔识都扮识摆落去份CV，就好似玩交友app一样，但只要你去到interview，或者见𠮶位新相识嘅朋友，所有嘢就只会“见光死”，你都唔会想咁㗎？
做人最紧要系诚实，但真诚之余都仲要有啲技巧，笔者两样都讲咗少少啦，你哋又准备去揾返份好工未呢？
p.s. 唔想由零开始砌份CV，试吓base on个template再执执佢？（呢个网好嘢嚟㗎～）
【相关文章】揾工．CV｜履历表最忌“唔对题” Skills一栏咁写HR绝对睇都费事
【本文获“Wantedly Hong Kong”授权转载。】
【本文获“Wantedly Hong Kong”授权转载。】