特朗普当选同英国脱欧，两只黑天鹅系咪一样？

今次特朗普上台，除咗话你知民调唔准，全球化节节败退。仲话到畀你知，众多传媒、学者、专家真系极其离地。再去自 high 围炉讲“希拉里呢拳打得好”、“希拉里冇得输”、“选特朗普出嚟会经济崩溃呀”全无意义，未来四年真系应该谂下，点样去接触到啲一路都被忽视嘅民意。

“公关灾难”后，“黑天鹅”系近年香港媒体用得最滥嘅一个词。不过用落英国脱欧公投，或者今次美国大选上，算系恰当。

脱欧同特朗普拎埋一齐讲，有人嗤之以鼻，《苹果日报》嘅卢峰就话咁比系不伦不类、苹果同橙，两回事㖞。但明明苹果同橙就一样都系生果。

而家尘埃落定，不妨睇下呢个苹果同呢个橙，有咩地方一样，有咩地方唔同。

相同一：反建制、反全球化、反“经济发展”、向精英竖中指

呢个系最关键嘅一点。

特朗普点解赢？因为民心求变。系真变，唔系奥巴马𠮶种得把口讲“Change”嘅变。换个黑人做总统唔系变，换个女人唔系变，甚至换个共和党总统都唔系变。系要打倒建制，而共和党、民主党都系建制。

希拉里有众多问题，但唔好忘记特朗普唔只赢佢一个，佢仲赢晒共和党其他人。记住，群众厌恶嘅唔止系民主党，而系根本厌恶“两党政治”（bipartisan）呢种现状（status quo）。希拉里即系奥巴马即系克林顿，但 Jeb Bush 杰布布什一样系𠮶回事。群众受够呢种“围威喂”你做完到我做，总之有钱齐齐揾嘅转庄系统。

点解会咁？同脱欧一样，特朗普上台，多得贫富悬殊。美国经济政策研究所（EPI）数据显示，扣除通胀后，1979 至 2013 年间，最顶 5% 𠮶班人工升咗 41%，中间嘅只升 6%，最低 10% 嘅𠮶班人工就跌咗 5%。咁你话会有乜后果？各种民调话你知，特朗普嘅支持者，好多系觉得而家差过 50 年前嘅人，唔少正系老人，同支持英国脱欧嘅一样。

2008 年原本系个好机会，穷人以为等到有钱人折堕。点知银行家花红照出，冇人坐监。仲要长期低息，啲楼愈嚟愈贵。到今次选举，卒之要爆。

同香港几似嘅系，选民觉得，经济好股票升，关我乜事？我冇着数仲要更难买到楼，仲要睇住啲有楼有股票嘅人富者愈富。移民有助经济又关我乜事？抢咗我饭碗益咗老板咋。早排 370 个经济学家联名炮轰特朗普，话佢唔识经济，会搞到衰退。分分钟咁样系帮特朗普助选。经济衰退？好丫，卒之等到你班人仆街了。反正老子仲有最低工资有失业救济。

相同二：民调、传媒、专家、金融市场，一次又一次，全部错到七彩

编辑话我系少数估特朗普当选嘅人，我受之有愧。大把人出嚟讲话“我一早话咗”，但冇我份。你吹水讲两句嘅冇理由计，至少你都写篇文出嚟白纸黑字讲。边个咁把炮？拍纪录片嘅 Michael Moore 就做到。佢篇文几个月前已经话特朗普赢，讲埋点解，唔怕你耻笑。

首次电视辩论后，我篇博评冇讲特朗普会赢，只系叫大家唔好太老定，唔好只信民调、赔率、媒体以及金融市场，结果不幸言中。

话一早估到嘅，多数都系呃你。你睇民调，基本上全部都话希拉里仲领先；甚至有人写文话“特朗普有机会”只系传媒揾嘢嚟炒作，美国民调好准，唔同脱欧，玩过咁多次，又计选举人票，只系普选票追近嘅特朗普根本冇机会。

加埋选举人票制，根本冇主流传媒或分析觉得希拉里点有得输。就选举之前一晚，路透社（Reuters）话希拉里 90% 赢，纽约时报（New York Times）话 84%，博彩公司开嘅盘口系 1.2 倍左右。

唔信传媒又点？ FiveThirtyEight 网站嘅 Nate Silver 往绩够晒好，比好多传媒更有权威，亦都唔敢太老定，但都估希拉里有超过 70% 机会。

信真金白银亿亿声上落嘅金融市场，一样出事。选举前嘅周末，联邦调查局话唔查希拉里，结果歌舞升平，美股创八个月最大单日升幅，被视为“特朗普探测器”嘅墨西哥披索大反弹──根本就同脱欧前一样（唔止，出结果当日港股大跌完即日反弹不少，都同脱欧日一样）。

传媒认为特朗普口中嘅“隐形选民”冇几多。结果佢哋唔止存在，仲有大量，而你根本侦测唔到。

唔同之一： 脱欧闹制度选民 vs 希拉里服输 （相对地）

上次脱欧公投后，好多传媒都揾咗啲“唔知自己投乜”嘅选民出嚟笑。包括话 Google 搜寻“欧盟系乜东东”嘅人大增，或者访问下啲“我谂住投票吓下欧盟咋”、“我唔知真系会脱到㖞，我点知咁大镬呀”、“我好后悔呀，可唔可以投过”嘅选民。满足啲知识分子“撑脱欧𠮶班正阿毛”嘅想法。

今次相当唔同嘅系，选总统似乎比较简单，甚至唔使知咩政纲之类。大可以话“我钟意佢就选佢”，甚至“我憎佢对手，所以选佢”。所以今次选举后，啲传媒似乎冇咁易揾到“无知选民”，亦都唔觉有咩投咗特朗普嘅出嚟话好后悔。

至于民主制度嘛，“选举人票”vs“普选票”边样先“公平”，一直大把人讨论，呢度唔讲。想讲嘅系，特朗普拉票时好多人话佢反民主，叶刘淑仪个老师 Larry Diamond 系其中之一。特朗普一度话个选举过程畀人操控，话内定，但而家选到当然就话个制度全世界最好，美国人民好嘢。希拉里亦都一早认输，冇走去话唔公平，话选民白痴，叫选举人唔好跟民意投票之类。

相反，脱欧之后，肥彭彭定康（Chris Patten）写文狂插，话咁样去拎一条问题公投极之儿嬉。哈佛嘅 Kenneth Rogoff（此人在金融界极有名望）直头话得 36% 选民投脱欧就脱，实在系玩俄罗斯轮盘（佢意思应系公投事关重大，冇理由咁低门槛）。

唔同之二： 脱欧留欧各有支持者 vs 特朗普人人得而诛之

呢个系最有趣嘅地方。

脱欧公投中，有报纸支持留欧（Financial Times、Economist、The Independent、The Guardian 等），但亦有唔少支持脱欧（Daily Mail、The Sun、The Daily Telegraph 等）， 算系各有支持者。

但去到美国大选，报纸一面倒支持希拉里。你讲唔讲得出有边份美国报纸为特朗普背书（endorse）？答案系只得两份：Las Vegas Review-Journal 同 Florida Times-Union，听都未听过。有三份过去九次大选都为共和党候选人背书嘅报纸，今次都转軚背书希拉里。

难怪特朗普觉得传媒畀人收买。事实系电视辩论期间你亦都见到，传媒摆明唔钟意佢，我篇博评有提到：“希拉里笃中对方死穴就系醒目，特朗普笃中就系冇风度嘅烂仔”，传媒只系想睇佢出丑。每次辩论都系话“希拉里赢”。但又如何？特朗普而家笑到最后，大大只中指送畀传媒睇。

今次特朗普上台，除咗话你知民调唔准，全球化节节败退。仲话到畀你知，众多传媒、学者、专家真系极其离地（包括我，但我唔系美国人，当然离美利坚之地好远）。再去自 high 围炉讲“希拉里呢拳打得好”、“希拉里冇得输”、“选特朗普出嚟会经济崩溃呀”全无意义，未来四年真系应该谂下，点样去接触到啲一路都被忽视嘅民意。

（本文纯属作者意见，不代表香港01立场。）