【谭仔卖盘】丸龟有种距离感　不能取代的单身食堂与“实小辣”

日本丸龟制面母企Toridoll Holdings收购谭仔云南米线，收购额更估计达10亿。消息传开，谭仔的“忠粉”频频在Facebook洗版，有人话最惊米线加价；谭仔姐姐访问时回应“唔系又要学日文啊？”香港人对米线舖情有独钟，究竟丸龟又可唔可以保持呢份地道的感觉？

每个人都有属于自己的米线舖

其实无论食边间都好，米线最吸引人就系每间舖都有佢哋独有嘅味道：有人钟情谭仔，贪佢重口味；有人独爱三哥，贪佢汤底多，有人偏爱南记，贪腩肉春卷够惹味，而笔者就喜欢贵川风味馆，爱其汤底够麻香。每个人都有属于自己嘅米线舖。1996年，谭仔和三哥未分家以前，由茶餐厅变成专做米线，在深水埗发迹，开创米线舖热潮，米线舖开到成行成市，梗有一间系附近，密集程度比云南更有过之而无不及。对八、九十后而言，米线就系一种集体回忆。晏就唔知食咩好？食米线啦仲谂！

朋友A中学时，几乎每天午餐都吃谭仔，“每次经过谭仔门口，都会隐隐闻到一阵独有嘅香味。那种味道就如同谭仔的Logo，唔使睇已经知佢系附近。”他迷恋谭仔嘅程度，犹如啪左丸咁，戒极都戒唔甩，相信说中唔少谭仔忠粉的心声。“其实我都知唔系特别好食，但真系会食上瘾。”朋友A如是说。难怪都市传说有云谭仔汤底加咗罂粟。 (利申：笔者认为谭仔汤底又咸又渴，配料又唔特别。)丸龟唔系唔好食，价钱都算平，但米线舖那种浓香，绝对系丸龟畀唔到。每次行去丸龟门口，口味选择都觉得dry到调头走。

谭仔：独食、围食，都系唔同的享受

单是丸龟那种日式和风、木式、整整齐齐的装潢，对香港人嚟讲，就已经系一种距离感。就算坐满晒人都系好静局，夜妈妈一个人放工要同自己个影食饭，单身狗系唔会去丸龟。亦唔想一个人去茶餐厅食油淋淋的碟头饭，更觉惨情，米线可清淡可麻辣，按心情选择味道，米线就系单身狗碟头饭以外一种“升级”享受，一种自我的奖励。谭仔唔同丸龟，夜晚十点都系热热闹闹，随便搭台，无论是单身狗、情侣、OL、中学生，阿婆阿公，谭仔可以包容到唔同种类的人。就算一支公食谭仔，好多人陪住你，又唔会望住你，唔会有人留意你系独食定围食，总之食得舒适。

只有香港人先识嘅麻辣实小辣

谭仔，最伟大系弥补了对“辣”味形容的词汇。唔知由几时开始，每逢问起对方食得几辣，就会用谭仔的辣度做标准：十小辣是正常程度，中辣算是高材生，大辣更是资优生。一间食店嘅菜单，竟然可以成为香港人嘅共同语言，呢样莫讲话乌冬店，就连麦记都未必做到。

如果听唔到谭仔姐姐讲勿演（墨丸）、之忍（猪润）、实小辣（十少辣），就等如去澳牛冇畀人闹过，会有种淡淡嘅空虚。

谭仔姐姐：“被日本人收购，我唔做㗎喇！”

数到谭仔特色，点可以唔提谭仔姐姐呢？今日传出收购消息，网民第一时间就话，“谭仔姐姐以后唔系要讲日文呀？”。更有谭仔姐姐扬言不担心学日文：“因为被日本人收购，我唔做㗎喇！”听罢有点黯淡。谭仔姐姐可以话系谭仔做得最好嘅Image Building，没有之一。朋友A话，行入谭仔，如果听唔到谭仔姐姐讲勿演、之忍、实小辣，就等如去澳牛冇畀人闹过，会有种淡淡嘅空虚。有趣的是，明明唔少香港人都唔钟意新移民但每次讲到谭仔姐姐，佢地就会有讲有笑，好似讲梗另一班人咁。我曾经和一位姐姐倾计，佢话广东话其实真系好难学，原来好多入声字佢哋都讲唔倒。虽然有啲客人会帮佢哋矫正发音，但好多时佢哋转个头又唔记得点讲。“如果有人教，我都想学好啲。”或者就系因为这班姐姐努力尝试，令呢班“忠粉”食谭仔食得更加投入啦。

食面系一种学问，唔系话墨丸炸酱乌冬一定唔好食，但一定冇食米线咁夹。更重要系，谭仔姐姐的乡音、谭仔的随性、氛围，呢种属于香港人的味道，是“一丝不苟”的日本人无法明白。究竟呢10亿买唔买得起我哋对谭仔嘅集体回忆？