星爷研究院｜《国产凌凌漆》打靶戏成经典　古明华：呢幕拍足3日

要数周星驰的经典电影，由佢自导自演嘅《国产凌凌漆》一定唔少得，尤其阿漆被打靶一幕，近年被唔少网民指系世界级讽刺。

在戏中收下阿漆一百元人仔，再加句︰“去！去！”放人嘅公安古明华，虽然出镜加埋唔够三分钟，但原来佢当年足足喺片场等足三日，先得到星爷嘅召唤埋位开工。

呆等两日改剧本

回望自己26年前嘅演出，古明华至今依然印象深刻，并坦言可以做得更好：“我到拍𠮶刻先知剧本系咁、自己原来要做呢啲。所以我唔系太满意自己演出，不过星爷可能就系喜欢呢一种即兴。他有同我哋讲想要啲咩，只系最初个剧本不太满意，要不停改，所以我喺片场等到第三日先拍，准备时间唔多。”

作为一位演员，能够拥有一幕经典，古明华大概拍摄当日也没料到。在星爷众多作品之中，虽然他最爱是至情至性的《西游记第壹佰零壹回之月光宝盒》，但《国产凌凌漆》又可说是无得输。“佢好聪明，可以将自己嘅睇法用一个好幽默手法去处理，凌凌漆呢个角色佢演得好成熟，猪肉佬更加系无敌。”

首拍三级片提名新人奖

早在古明华加入无线前，他曾拍过几年电影，当中包括令他提名金像新人奖的《旺角马场》。“我喺戏中做马伕，带啲女仔去开工揾食。𠮶阵电影啱啱有三级制，唔少人都用有色眼镜去睇呢部作品，但其实我认为这部作品是反映旺角嘅实情。”

古明华至今仍然记得电影由向立行执导，并笑言电影是几百万的小制作，却意外获提名，感觉十分有趣。“我有去颁奖礼，不过当然系落败啦，当年胜出嘅系袁咏仪《亚飞与亚基》。”重温同届获提名的新演员，仲有《逃学威龙2》朱茵、《飞虎精英之人间有情》郑秀文、以及《黄飞鸿之二男儿当自强》熊欣欣，个个都表演出众，古明华话自己被提名之余，兼获得支持，实属难得。