【每逢大事讲故事】话唔做又做的素人...总理　再掀意大利危机

小弟飞云后生𠮶阵，除左钟意睇意大利波，最钟意睇意大利政坛新闻，贪贝老够淫贱，够过瘾。不过家阵意大利政坛成班麻甩佬，全部闷del del咁。不过如果大家关心钱，都应该都要理解下意大利发生紧咩事，欧美股市都被佢搞到全线下挫。
大家都知，意大利呢几年换总理换过不停，早几日选出来嘅政治素人孔特（Giuseppe Conte），个名够晒Italiano，但似乎唔系好powerful。做左四日，本来话辞职，依家又话继续做，妈我好乱呀！
今次飞云现真身，记得Click入去睇片呀喂～

意大利人有时真系巧打耳～搞唔掂个场就搬个学者出黎，2014年揾经济学者蒙蒂（Mario Monti）做总理，你仲记唔记得边个呀？呢，白头发，戴金丝眼镜𠮶个阿伯呢!​

唔系𠮶个呀，系下面e个呀。Sorly 我地啲亚洲人成日觉得啲白人都差唔多样，认错左邓不利多。下面呢个先系蒙蒂，真系隔住个mon都闻到智者嘅味道呀。

不过学贝老讲句，智者有L用咩，揾亲教授做总理都无好结果。蒙蒂的成绩如何，你的日子.... i mean大家有眼睇，意大利呢几年经济、民生都无好过，仲变得越来越民粹。蒙蒂之后，仲有执政只有一年嘅莱塔，之后仲有做得两年货仔嘅伦齐，之后到依家的看守总理真蒂洛尼，不过，你都还未记得佢，佢就真退落黎喇。人事变得快，唯一不变嘅就系意大利嘅债务问题，依然系咁衰。

依家又端出另一个professeur出来。如果佢去教书嘅话，睇佢CV的确无得输！喂，但政治上，佢系白纸一张㖞，就同余文乐演卫斯理一样，咁无说服力。

不过你睇，余生眼神都识做戏架！孔生做总理，又交左咩戏先？不如等飞云讲解下孔特呢位政治素人嘅出处先。

查实佢本来就是一位就教佛罗伦斯大学的法律系教授，都系2013年先加入左翼民粹政党五星运动，兼且系迪马约嘅代表律师，本来只是个二打六，处理下啲法律事务，点知由一个Law友，变左做总理。有美国传媒形容佢系“意大利将有一位闻所未闻的总理”， 有位欧盟官员都话，“无人知佢系乜水，学者黎讲又唔算有名气”。

名气好重要架，你点知Ben Sir会唔会有日做咗教育局局长？不过意大利总理呢个位，同教育局局长一样，根本就系三煞位。孔特未上台已经注定系做扯线公仔。到底边个摆佢上台先？

咁就要讲返三月嘅意大利国会选举，反建制嘅五星运动同反移民嘅右派联盟，可以话平分秋色，各自攞到三成几选票，唯有死死地气坐底倾，筹组联合政府。

虽然右派联盟，贝老系其中一条台柱，但五星运动就系嬴一个马鼻，做左最大党，佢地领袖迪马奥四月初就讲到明，倾咩都得，但新政府一定唔可以有贝老呢个“老而不”，右派联盟唔可以拉埋贝老一齐组阁。皆因呢位30出头嘅后生仔，唔想同老人政治扯上关系，仲叫右派联盟嘅boss萨尔维尼，摄高枕头谂清楚，系咪揽住贝老过世。​

搞左一大轮都无共识，两个党都知道再倾唔掂数，意大利人随时又嘈，“喂一人让一步啦”，于是迪马约就退一步话唔再追击贝老，提名左自己个律师孔特出来上，叫萨尔维尼哽左佢啦。孔特话晒都系法律权威，似乎都可以帮到下修宪，最重要系无乜政治背景，身家清白，望落呢个素人真系几pure几true㖞。

佢有几pure？大学有个friend子话,孔特是个文质彬彬的学术型，未听过佢咆哮，发嬲，份人好腍，把口合埋仲多过讲嘢嘅。意大利政坛早已经七国咁乱，好多姨妈姑姐听到世姪失惊无神做左总理，都好担心佢。其中佢呀妈个朋友，由细睇住佢大，就话daddy mami好担心，“你知啦，意大利政坛啲人会掟泥架！”

无办法，素人通常都比较多人J，孔特未上场就比传媒起底，翻晒啲学术背景出来，质疑佢学历造假，CV话自己去过纽约大学深造，点知大学话无呢个人嘅record㖞！咁佢啲党友就唯有死鸡撑饭盖，话：

唉，你地唔好咁咄咄逼人啦，佢可能都唔想做呢！其实佢都蠢唔晒，又或者佢真系惊被人掟泥，孔特唔知有心定无意，提名左一位疑欧派人物做财长，即刻被总统马塔雷拉（Sergio Mattarella ）DQ左。孔特就话，咁我唔做了，比个大信封我。飞云呢刻终于明白到，意大利总统原来系咁有用，佢喺关键时刻的确系可以拯救欧洲的，好威武。

孔特做左四日就辞职，依家点收科呀？五星运动嘅迪马约就话，不如总统一齐倾下内阁人选啦，财长可以拣过个架，“大家可以一齐讲、一齐听，有商有量。”但右派联盟嘅萨尔维尼就唔系咁睇㖞，上次大选屈居做阿二，呢排佢支持率高左，梗系死都宁愿重选啦。依家总统就话可以比多啲时间你地再组阁，两个党又要坐底倾过。

峰回路转，孔特嘅机会又来了！！！！居然再次倾嘅内阁名单，得同总统同意了，孔特就这样又做番意大利总理。哈，唔知佢今次坐得几耐呢，小弟就买定花生放长双眼睇下先。

其实呢，即使比佢地再重选，依家意大利人都系会选番五星运动或右派联盟是，掌政嘅始终会系一个民粹，疑欧嘅政府。的而且确，意大利市面上有唔少阿伯阿毛，都好渴望有生之年，意大利可以退出欧元区，有啲阿毛甚至己经将手上嘅欧元，兑换番做意大利旧日货币里拉，仲相信五星运动可以救佢地出苦海。国际金融市场今铺真系有得震无得瞓，因为佢地成班都癫架，成个意大利最正常嘅应该都系得祖云达斯，飞云都系转行讲波好过。