【集体回忆】47年历史新蓝塘餐厅除夕结业　食客：最爱咖喱饭

于港岛坚道经营近半世纪、街坊学生称为“高主教（书院）饭堂”的新蓝塘面包餐厅，因不获业主续租，将于除夕（31日）结业，成为中西区集体回忆。

新蓝塘入口两旁分别是水吧和面包柜，窄长走廊摆满细台，穿过走廊才有大台，装修和陈设都是典型老式“茶记”格局。与太太共同经营餐厅的老板邝先生，不时来回餐桌与厨房，向客人递上碟头饭和饮品，既是老板，也是伙记。

业主称要收回舖位翻新消防设备

老板邝先生向《香港01》记者表示，约于两个月前决定结业。因为业主表示餐厅消防设施老旧，若不更新会被政府罚款，因此要收回铺位整修，他淡淡的说：“咪提早交铺俾佢，等佢好做嘢啰。”邝先生又引述称业主称，不会再租给食肆，因此打消重开念头，决定2016年最后一天结业。

由伙记做到老板

邝老板忆述，新蓝塘于69年开店，自己于上世纪70年代开始在新蓝塘打工，当时店里只卖面包，直至81年扩建才兼营茶餐厅。到89年6月，旧老板不做了，自己便接手。由伙记晋升为老板，邝先生与新蓝塘共度了超过40个寒暑，讲到结业感想，他说：“俾自己唞吓先啦，接手后廿几年冇放过假。谂住休息两三个月先，再睇吓点。”稍刻又说：“或者揾份工打吓......我唔做，生活点呢？”

邝老板说，每日早餐、午市、下午茶时段都会亲身上阵，到了下午4时多比较空闲，就要准备翌日的食材，预备完，晚市伙记收工，几乎都是自己一脚踢，“日日6点几返嚟，做到夜晚8点几”。随著年月过去，坚道名字依旧，街上店舖脸目全非，“留低嘅茶餐厅仲有一两间，面包舖就冇喇......慢慢有超市呀、麦当劳呀、7-11呀，真系好多嘢食。”岁月换去坚道轮廓，也带走不少客人，“以前做一日，（收入）顶依家五日。”

唔做唔代表我唔会返嚟㗎嘛​

“以前好多高主教（书院）、真光（香港真光书院，现已迁往鸭脷洲）啲学生午饭时间嚟食饭㗎。”新蓝塘被称为“高主教饭堂”，但近年盛况不再，至近日知道餐厅结业，不少人特意重游旧地缅怀。“有时太多人我都做唔到（低声一笑）”邝老板说。

被问到有甚么想跟街坊讲？“冇咩嘅，唏，街坊日日都见。唔做唔代表我唔会返嚟㗎嘛，以后我都会喺呢边同街坊吹吓水。再唔系落去大家乐聚吓会咁，唔系一定会难过嘅。”真的不会难过？“冇难过，我两个几月前已经决定咗唔做，心情平复咗。开头系多少有啲唔舍得嘅。”
 

招牌咖喱饭　味道温和老少咸宜

“我哋最出名就系咖喱，入面料多又唔会太辛辣，但又有少少辣味，味道老少咸宜。”问起周围的食客喜欢吃些甚么，他们都直接说“梗系咖哩牛腩啦”、“味道香”、“唔会太咸”、“份量够饱”，人人赞口不绝。卓姓兄弟特意约在新蓝塘与老板告别，弟弟说：“我哋嚟咗几廿年喇，当年喺隔离圣慈幼读书，呢度仲系前身面包舖时已经喺到食。以前坚道仲有甄沾记、小祇园都喺隔离，好多嘢食㗎。”，又说：“食嘢都算，冇咗个聚脚点先，嚟到唔食嘢都有好多老友上嚟吹吓水先。”哥哥笑了笑，接著说：“识咗老板好耐喇，食咁耐唔熟都变熟。”

“初中时见这里门口残旧，当时又多地盘佬、阿伯阿叔帮衬，唔系好敢嚟，但后来跟同学一齐食，食吓食吓就习惯。最出名一定系咖喱牛腩饭，嚟得呢到就唔谂㗎喇。”高主教书院旧生陈先生，得知新蓝塘即将结业，特意过来品尝学生时代的滋味“几年冇嚟过呢头，头先行过发觉成条街都唔同晒，变晒高级餐厅、咖啡店、家私呀。以前好多小店，新蓝塘已经系硕果仅存，都冇埋喇。以后再嚟条街都冇咩回忆㗎喇。”

随佣人来吃午饭的邓小朋友，遭告知新蓝塘即将结业后，神情惊讶，状甚不舍：“很伤心，同老板识咗好耐。呢度好有人情味。”然后转过头问老板“呢到要执笠嗱？”邝老板微微一笑：“唔好讲执笠咁难听！系结业啫！”

老板：如找到合适舖位或继续经营

问老板会不会想继续经营餐厅，“希望揾到位，唔太贵租，同埋睇吓政府出（食肆）牌要几耐啦。你都知依家啲牌几难整。”邝老板说，如果物色到合适铺位，他也希望新蓝塘的招牌能继续下去。但政府发牌需时至少过百天，“太耐唔谂㗎喇。唔想俾租绑住”。