《POKÉMON 名侦探皮卡丘》拆解真人比卡超电影四大迷思

比卡超（皮卡丘）真人电影《POKÉMON 名侦探皮卡丘》首个Trailer正式见街，虽然“死侍”比卡超咁得意，但好多人睇完都出现黑人问号：到底电影版比卡超系唔系小智𠮶只？比卡超应该系毛茸茸定滑嘟嘟？点解比卡超识讲人话？电影版比卡超会变雷超吗？笔者尝试为大家逐一解答。

迷思一：电影版比卡超系唔系小智只比卡超？

可以好肯定答大家，电影版《POKÉMON 名侦探皮卡丘》比卡超当然唔系小智𠮶只，因为佢原型唔系来自我哋熟悉嘅动画同游戏《宠物小精灵》，而系喺3DS上推出嘅《名侦探比卡超 ～新搭档诞生～》（名探侦ピカチュウ 〜新コンビ诞生〜）。佢系属于《宠物小精灵》衍生作（即是外传），2016年2月3日喺日本任天堂eShop发行嘅游戏，由任天堂子公司Creatures开发，2018年3月推出实体版，加入更多章节同埋支援Amiibo，再剔走副题正名《名侦探比卡超》，成为比卡超第一款悬疑查案游戏。可惜游戏推出后成绩唔理想，消量只有约400万。

故事方面，游戏开始讲述一只比同类孱弱嘅比卡超（呢个世界系有好多只比卡超），但佢头脑就异常发达，更自称名侦探，有一日佢遇上玩家扮演嘅男主角提姆，因为提姆可以听得明比卡超讲嘢，所以就两个人开始一齐合力查案，解决城市发生嘅一连串神秘事件。至于电影版揾嚟Deadpool男主角Ryan Renolds配音，其实都系嚟自游戏，原来游戏中嘅比卡超嘅配音都系大叔一名。因此大家觉得好似极乐老人雷凯欣变到老练咁声唔开胃，其实系一早设定咗，目的系想制作反差萌，至于出嚟效果反差的确劲，但萌唔萌就见仁见智！

迷思二：到底系毛茸茸定滑嘟嘟？

我哋成日喺动画同游戏中见到嘅比卡超，除咗黄色感觉上仲系滑嘟嘟嘅，所以好多人睇完Trailer之后都问：“点解比卡超咁多毛？”咁到底比卡超系有毛定冇毛呢？各位观众，答案系有的！只要你系动画粉丝，一定有发现比卡超有时特写系会有一层短毛披喺身上，但凡佢惊惊、发嬲或者打冷颤时就会见到啲毛毛，当然要好留心先睇到。

证实咗“比卡超是有毛的”之后，下一个问题来了：“如果比卡超系毛茸茸，咁放电咪会电到变挛毛？”答案系……冇答案。勉强解释嘅话其实比卡超系靠面颊上两个红色圆形嚟发电，咁可能两个“腮”位系无毛的……当然呢个只系一啲粉丝嘅推敲，并唔系官方答案，要知道真相都系要问返小智啦。

迷思三：点解比卡超识讲人话？

原本动画中只有喵喵怪识讲人话，点解宜家比卡超都识讲？其实上文都讲咗，正如大家睇Trailer嘅解说一样，一般人系听唔明比卡超讲咩，得主角听得明，喺其他人嘅耳中只会听到平时我哋听惯嘅“Pikachu~”发音。相信有好多人都知呢个发音系有出处，“Pika”系模拟电光火花嘅“噼啪”声，“Chu”则系模拟松鼠嘅“啾啾”叫声。

虽然比卡超讲嚟讲去都系呢三个音，但其实就算我哋唔系电影主角一样可以听得明比卡超讲咩，因为根据动画声优大谷育江女士讲，其实佢发音系有规律嘅，而唔同规律就有唔同意思，例如成日同小智讲嘅“Pika~chu~”就系“我叫比卡超～”、“Pikachu~Pi~”就系“捉到精灵喇～”、“Piiika~Chuuuuuuu~”就系“我准备好战斗喇～”。最后女生们最应该学嘅，就系讲唔好：“PikakaPika~”。

迷思四：电影版比卡超会变雷超吗？

雷超系比卡超嘅进化，拥有更深嘅毛色，尾巴变咗闪电形，储电更多电力更强，游戏中只要用“雷之石”就可以进化。有人睇完Trailer问电影版比卡超会唔会进化雷超？答案系唔会嘅！原因有二：第一系因为游戏《宠物小精灵 日月》中才开始加入的比卡超进化型，主要用作战斗，而《名侦探比卡超》中比卡超主要负责查案，并唔系作战，原著游戏中都冇出现过雷超真身。更重要系雷超与比卡超造型不同，因此如果要喺电影中出现，任天堂很可能会要求片商再支付额外肖像费，徒添制作成本。因此电影版中出现雷超嘅机会率系零……肯定系，除非唔系。