【上环．茶】弃银行笋工转开日本茶舍 茶痴：我卖Human Touch
没有人想打死一世工，打工仔赚到一笔钱、转行创业做老细的例子，比比皆是。做得生意，每个人都想揾钱，这是必然的。本身在国际银行做金融科技的Shawn Mak却在三十而立之时放弃大好前景，于年初开设了自己的茶饮店……慢著！你以为又是那些珍珠奶茶舖吗？不，他并没有被潮流牵著鼻子走，“食住条水”卖那些低成本却高效益的奶盖茶、水果茶、黑糖奶，而是卖纯粹不过的原味日本茶。
摄影：朱润富
莫讲各行各业，近年整个世界都推行电子化、自动化，连去快餐店点餐都要用自动点餐机或是以App订餐，究竟几年后，有几多人会因科技的进步而饭碗不保呢？在银行工作多时的Shawn感受犹深，“啲人创业好钟意整个App，又整合旧行业，但其实个社会系咪真系需要咁多依啲嘢？再行多5年10年，分分钟我份工都可以畀机器取代。”每当听到AI（人工智能）又取代这、取代那，Shawn顿时便感到心寒，不禁细想，究竟有甚么是永远都不会被取代的呢？最后他得出一个答案，“人与人之间个接触，𠮶个Experience系无可取代！你可以嗌foodpanda同Deliveroo，但唔会取代到有个人喺你面前整寿司𠮶种感觉，手艺呢样嘢取代唔到，我想做到同Human touch有关嘅嘢！”
如果我系为赚钱，就唔会拎嚿钱开呢啲嘢啦，我梗系开珍珠奶茶，黑糖珍珠啦！但呢个唔系我哋想做嘅嘢。
于是，Shawn在上环太平山街开设了“上林茶舍”，也是香港第一间人手冲茶的茶吧。经营这间店的初心，就如他所卖的茶那样纯粹，因为他本身正是一个茶痴，“如果我系为赚钱，就唔会拎嚿钱开呢啲嘢啦，我梗系开珍珠奶茶，黑糖珍珠啦！但呢个唔系我哋想做嘅嘢，系咪真系下下都要揾咁多呢？”他并非开善堂，可以的话当然都一定想赚钱，然而绝非赚到尽，反而更渴望在这斗室建立他所信奉的价值，能持续发展已当有赚。
一切由Shawn小时候开始，自小他便饮开中国茶，近十年八载还萌生了对日本茶的兴趣，间中飞往日本请教专业人士，久而久之更想将自己一试难忘的茶跟更多人分享。综合长时间累积的经验，所谓的窍门实际并不高深，“最紧要最紧要最紧要，系你真系要好钟意饮茶，不停试唔同方法、唔同茶叶、唔同水去冲！我去旅行都会带定几款唔同嘅茶，用当地嘅水睇下冲出嚟感觉有咩唔同，大概都总结咗有咩水好、有咩水唔好，好饮嘅水真系饮出嚟都系甜㗎！”日本茶好，中国茶也罢，Shawn觉得只要有认真冲泡，饮茶的人都必然饮得出来，甚至被这份诚意打动到，因为他正正就曾被感动过，“嚟到呢度，一样嘢啫，就系你饮𠮶杯茶，有一刻会觉得：‘呀，好舒服㖞！’就系要𠮶刻，因为有时啲茶舖冲得好，但冲𠮶个人可能冇咁嘅Spirit。”
无可否认，茗茶曾几何时予人“老饼”的印象，而近年茶饮店如雨后春笋般出现，无疑将品茶的入门门槛降低，使这项文化逐渐变得年轻化而平易近人。自己爱茶爱到对背后美学、底蕴、历史、哲学都了如指掌的地步，Shawn相信总能找到知音，“依家啲人咁追求健康，香港人真系容纳唔到纯原味、手工啲嘅茶？当然会贵啲，但你见依家越开越多，茶系有佢嘅Market喺度，我好希望就算你嚟买外卖，都可以买到一杯冲得好饮嘅茶。”
上林茶舍以售卖日本抹茶、煎茶、焙茶跟玉露为主，产地来自日本京都、静冈、福冈及鹿儿岛，当中最受客人喜爱的便是桂花煎茶，至于较偏门的阿波晚茶、手揉茶，也能在此中寻。按图即睇各种茶叶详细讲解。
要毅然放低银行业的大好前景，在出名贵租的香港创立自己生意，成功的个案固然有，可惜更多的却是损手离场，因此Shawn起初也多番挣扎，不肯定应否下这步棋，“我唔系Bring一个本身有嘅brand过嚟㖞，究竟我纯粹卖茶、卖experience，有无人睬我，畀几廿蚊饮杯原味嘅茶呢？会惊㗎！但因为咁啱见到依个舖位几适合，同埋一路都好想做依啲嘢，好似万事俱备，就争你肯唔肯咋㖞，咁不如趁后生试下啦！”
日本都有茶吧，不过大多数以冲咖啡的方式去冲茶，跟Shawn坚持以人手冲泡实在有所分别，纵使有时连Shawn亦会觉得传统茶艺师每次都要搞“大龙凤”来起坛冲茶，未免有点太高深，然而他对于冲茶的手势还是有自己的执著，“点解茶壶可以Exist咁多年啫？一定有佢原因，手工呢样嘢，有冇层次，系饮得出啰。”
按图即睇Shawn亲自示范如何冲出一杯靓茶，以及影响泡茶质素的条件。
饮完杯茶，除咗解渴，仲有无啲嘢系More than that呢？
人，为甚么要饮茶呢？因为口渴啰，那自然要有水落肚，但口渴可以去便利店买瓶水、到街头巷尾的果汁店买橙汁，或者买杯珍珠奶茶都可，怎么一定要来上林茶舍？原来Shawn除了冲茶、泡茶之外，也一直秉持茶道精神，甚或尝试影响大家。
“我唔系话要改变世界，但喺呢个咁嘅社会，大家食嘢又快、做嘢又快，乜都快嘅时候，饮完杯茶，除咗解渴，仲有无啲嘢系More than that呢？我希望有啲Substance喺度，做到呢样嘢，已经系一个好好嘅Impact！”日本茶道源自禅宗佛教，讲其背后灵魂就是四个字——一期一会，“每一个茶会都系独特嘅，过咗就过咗，唔可以Repeat，所以大家要珍惜，每次个主人都会用心去Serve同埋Take𠮶壶茶。”
当日大胆走出Comfort Zone，时间过了大半年，是时候简单检视一下成果，论到开舖跟打工的收入比较，其实很难说清，“如果论Cash flow一定系打工好啲，因为依度我赚到钱都会投资返喺依度，再买新嘢，系几无保障，但系我Create咗个Brand出嚟，呢样好开心！”能够遇到回头客、有人走长命斜走到身水身汗，就只为呷一口Shawn冲的茶，甚至连芝加哥的米芝莲三星大厨Mike Bagale都曾远道来捧场，那份满足感，是打工赚几多钱都找不到的。
另一边厢，上林茶舍对许多客人来说，意义亦早已超出了一间饮品店，升格为他们心目中一个吐苦水与解压的地方，“啲熟客乜都同我讲，好似深夜食堂咁，真系过嚟倾心事㗎！有人Lunch time特登喺中环行过嚟，佢话：‘我每次嚟呢度，觉得好似抖一抖道气！’甚至乎之前有个客喺附近返Marketing嘅，佢嚟到就话：‘我依家好𤷪，有咩可以饮嚟畀我Calm down呀？’呢排天气热，我就建议佢不如试下饮边种边种茶啦，Refreshing啲。又有啲人直情当呢度凉茶舖㖭，问我热气同喉咙痛应该饮咩。”
我希望有日做到茶界Blue Bottle！
“每一个客我都记得佢饮咩，可能一个月嚟1、2次我都会记得，会问佢：‘喂你上次饮过呢个，今次想唔想试下边只呀？’我记得佢口味偏咩，会有Adjustment。”做生意本来只是一买一卖的交易，但Shawn却为这个“现实”得很的过程注入了浓浓的人情味，一切都因爱使然。
作为香港第一间手冲茶吧，Shawn能够“得戚”地向世人说：“我就系第一间呀！”然而做先驱也有自身难处，要由他来开始建立、凝聚甚或扩大这个圈子，比任何人都来得艰难，“我有个角色就系不停咁教育紧人呢样嘢，讲真Starbucks一嚟嘅时候啲人都觉得贵啦，你要有段时间去Build，我就系做紧呢个角色，我相信茶系做得到！”除了用心冲好每一杯茶外，Shawn间中亦会举办工作坊，教导受众茶的基本知识、如何冲茶、茶具介绍等，让大家由零开始接触这门艺术。
诚然，看著初次见面的Shawn一讲起茶总是滔滔不绝，无法停止似地分享他所知的一切“茶知识”，即使记者本身是茗茶的门外汉，也绝对被他感染得到，想试著认识一下这种文化，或许这已足以证明他成功了！不过，要说到真正梦想，Shawn的目标远不止于此，“有无听过Blue Bottle？佢来自加洲，系Starbucks最大嘅竞争对手，但佢同Starbucks系完全另一个概念，系再文青啲、舒服啲。佢哋无搞咁多嘢，就专注喺咖啡，每一杯都系咖啡师亲手慢慢冲，所有嘢都Quality啲，我希望有日我做到茶界Blue Bottle！”
上林茶舍 Green Gingko Tea
地址：上环太平山街1号
电话：从缺