【通便可乐？】可口可乐Plus加入膳食纤维相等1条番薯　味道竟...

春天实在太短，旋即又踏入炎热夏天，最透心凉饮可乐必定系其中之一。不过每次饮都有好多健康顾虑（最主要系怕肥），如果话你知，可乐入面加咗膳食纤维，可以抑制餐后脂肪吸收，你系咪会饮得心安理得啲？

呢罐白色包装嘅“Coca-Cola Plus”上年已经喺日本首先推出，寻日正式登陆香港！ 每罐（330毫升）有5.2克由粟米的提粹嘅膳食纤维，即系相等于一个大苹果或一条中型番薯；樽装（500毫升）嘅膳食纤维仲有8克咁多，相当于2条大香蕉，有助减慢糖分摄取同减少脂肪吸收，仲对肠道健康好有帮助，唔怪得有人帮佢改名叫“通便可乐”啦。

通唔通便就唔知，因为小记冇便秘试唔到，不过个味呢……就有少少令人失望。“好似放咗好耐嘅可乐”呢个系编辑嘅评论，简直一矢中的，佢最大问题系唔够气，好似开咗半日漏晒气！甜味同Coke Zero一样，甜得好假。同原味最大分别在于佢冇咗汽水独有嘅碳酸味，所以饮落好似饮糖水咁。

结论：以健怡角度嚟讲，呢罐Plus比起Coke Light、Coke Zero多咗膳食纤维（成份表列为“难消化性糊精”），按可口可乐公司嘅说法，系可以减低餐后嘅脂肪吸收。不过以味道嚟讲，始终都系饮原味最爽。