我们的2023｜林作JPEX“黑仔”内情曝光 今年损7位数︰点计都有!
被封为“抽水界KOL”的林作，2023年在金融圈中，经历连环“炒车”风波。其中在今年6月，钻石山荷里活广场谋杀案中，他在Instagram图文并茂、模仿疑犯装束，引起公众哗然，最终令保险事业一舖清袋，被保诚炒鱿。其后，他再转战“币圈”，时至今年9月，更在中环娱乐行开场外兑换所（OTC），惟开业仅10日，却卷入JPEX涉嫌诈骗事件，被警方以涉“串谋诈骗”被捕，公司同极速结业。
面对2023年连番挫折，连他自己亦不禁自嘲“镬镬新鲜镬金”。《香港01》今次邀请林作总结全年，当中原汁原味全程纪录采访实况，当中他首度回应9月接触炒币始末。另外，他更亲揭JPEX风波保释当晚，避走传媒的前因后果以及心路历程，同时更大爆今年整体损失高达7位数。最后，回顾2023年全年，他又将如何评价自己，迎接2024年？
▼2023香港大事回顾｜《香港01》我们的2023系列▼
认识币圈中人创新事业“仆直” 回应与JPEX关系
01｜今年6月保险业完咗，你先开始炒币？点解会接触炒币呢行？
作：单案进入咗法律程序，我都唔系有太多嘢可以讲。但你问嘅都系公开资讯，我离开保险业之后，先慢慢转移去其他行业。谂住开创新事业，点知一开创无耐就已经出晒事，呢个亦只能讲时运低。
本身自己认识朋友多，包括虚拟货币界，都知道好多投资者，同埋涉及喺行业入面嘅人。呢几个月发生咩事，我只可以讲系十分之不幸地，喺一个开展新事业嘅时候，自己就出咗事，亦都令到我对呢个行业，甚至乎金融行业嘅发展，喺依家呢一刻都感到好大质疑。我觉得要审视一下，自己其实啱唔啱去探索呢类行业。
02｜你与JPEX有甚么关系？是否真系有关系？
作：我深信香港司法制度，最后会还我一个清白。但我认为要经历...一个公众程序，呈现一个现实畀大家睇，呢点我很有信心，但我相信需要时间，因为呢件事复杂程度同新颖程度，我谂需要时间去呈现喺大家眼前。
03｜“林作炒币”开咗10日就倒闭，有传签咗两年约，总租金要蚀超过500万元，系咪事实？你又有咩体会？
作：数字𠮶啲唔方便评论，只可以话坛嘢系做咗好短时间，就已经收工。对我嚟讲系一个损失，但都系人生一个体会。体会就系一定要经历低潮，一定要经历挫败，一定要经历好多人生事件洗礼，你先可以浴火重生， 我觉得我需要。前几日同同学朋友食饭，都系度讲，33岁，呢刻算唔算人生最低潮呢？我又有无之前曾经发生咩事，可以话系大灾难？咁我好老实讲，真系无。
我谂我存在喺公众眼光好多年，都承认...今次系咪一个大嘅测验？系。但以一个将来要成大事嘅人，系咪要经历呢啲洗礼？我觉得系。你话畀我听一个好成功嘅人，成世会顺风顺水，会唔会能够咁？以我研究过嘅书，睇过嘅人物，见唔到边个系无遇到人生困难而一帆风顺，所以我好接受呢件事。
今次系咪一个大嘅测验？系。但见唔到边个系无遇到人生困难而一帆风顺，所以我好接受呢件事。
拘留期间思考人生 保释“声东撃西”避镜头有内情
04｜拘留𠮶日，点解突然想食叉烧饭配冻柠茶？算系你Comfort food？
作：他们（警员）同我讲，话我可以叫外卖嘅。我又未试过嘛，就想试试系咪真系嗌得，咪嗌下啰。咁你可以叫咩啫，无理由整个羊腩煲，攞埋GAS炉入嚟，咁就太过份。轻便啲饭盒就最简单，咪就叉烧饭啰。咁又问我饮唔饮嘢，攞杯嘢嚟饮都好丫，咪冻柠茶啰。我嘅Comfort food应该系蒸条鱼入嚟。
05｜被拘留同还押期间，你𠮶阵思考人生啲咩？
作：我真系回想下自己呢33年嚟点过，衡量自己过成点、做成点，平时真系很少会咁样做，但喺里面（警署）就有时间。你谂下自己26岁𠮶年，做过啲咩、同边个一齐、发生咩事，都真系有排你去谂。回到呢33年你系咁发展，下一步点呢？做下人生规划。
06｜𠮶晚你保释，喺女友裕美掩护下，最终你声东撃西走后门，仲要避镜头蜷伏身体遮脸。点解会有咁嘅举动？呢刻系咪你突然软弱嘅时刻？
作：其实𠮶阵系配合警署嘅要求而去咁做，因为其实困扰到佢哋，𠮶阵其实大家当紧值，如果你一个所谓公众人物，“炸爆”咗佢哋前门接待处，其实佢哋难做。所以佢哋问我哋可唔可以配合，而我非常愿意。
我其实根本唔知出面有几多人，系佢哋（警员）话返畀我知，然后问我哋，可唔可以保持现场秩序。咁我哋一齐去设计出嚟，我认为呢个系一个警民合作，应该做嘅嘢。我好坦白，如果警方唔介意可以借个场畀我，我可以喺𠮶度吹两个钟，喺正门口，即刻攞凳攞台坐低慢慢倾。
就好似我偶像“大刘”咁，背后最好有个布景板，写住“林作先生释放记者会”，但人哋地方唔好搞到佢哋，咁叫占用公共资源，唔系我谂（声东撃西），但我好愿意配合。
曾遭林父“睇死” 渴望证明自己
07｜进入呢啲行业你系咪想揾快钱、揾大钱，或者系你所讲嘅证明自己？
作：一定系证明自己。我真系唔想寸，但我唔系真系好需要揾钱，去到呢个阶段，钱至少唔系我一个大动力。反而系真系做一番事业出嚟，去证明自己，系一个更大动力。我觉得纯粹系男人有个事业心，好正常，但话想揾快钱就唔会成立，因为我无咁嘅需要。
你话揾到钱，系咪证明自己嘅一部分。当然系，我觉得系。当然系想发展，当然想愈做愈大，揾得到更加多嘅钱，可以喺唔同行业有更大影响力，呢个确实系无可厚非。终极当然系可以对全香港都有影响力。所以我咪话做特首，讲咗N年。
我真系唔想寸，但我唔系真系好需要揾钱。做一番事业出嚟去证明自己，系更大动力。
08｜保险又无咗、炒币又无咗，损失有无7位数？
我点计都有、我点计都有。我好保守计都一定有。睇下你点计，我好多种唔同计法。唔单止系潜在唔同机遇，仲有本身系轨迹上，无论系保险业定其他可以揾到嘅钱，呢刻都真系无得再赚住。
我唔想将呢啲当做系一种损失，因为我觉得好坦白，畀多个0你又点，畀多个1你又点，我哋人生唔应该以银行入面有几多钱嚟衡量，唔系真正意义所在。我觉得人生最大投资系自己，你自己本身叻，就唔驶担心（损失几多钱），喺呢个阶段我唔太在意。
好坦白，畀多个“0”你又点，畀多个“1”你又点，我哋人生唔应该以银行入面有几多钱嚟衡量。
09｜好多年前，知道你爸爸透过林妈妈同你讲咗句“睇死你呢世冇乜成就”。你觉得有无畀佢睇死到？
我觉得爸爸真是有见地，他讲得非常好，厉害！呢个可能系事实，不过调转嚟睇，我觉得过于强调人生一定要有成就，无论系爸爸，定系个人价值观，我又未必认为系一个正确嘅人生理念。
连环“仆直”学懂成长 冀留时间沉淀自己
10｜你会点评价你2023年？
我嘅感受系，人生就系要经历大大小小嘅事件，先至可以成长。我唔想好励志，好多人好想我做啲励志教练出嚟，但我会咁讲，我认为人生系不断跳出自己舒适圈，你先可以成长。呢个系真，懒系正面我都系咁讲。
老实讲，做咗保险业三年，去到第二年开始，慢慢你会发觉喺人生进步上，有少少樽颈，会变咗日复一日，比如今年头半年，系好风平浪静。我甚至怀疑6月份自己走去乱“抽水”，系咪头半年太风平浪静，就好似喺爱情入面太无聊，所以你走咗去找干柴烈火一样。但过去几个月，我觉得自己成长真系好大，呢个对我嚟讲系无价。
一句中国人嘅古语，“天将降大任于斯人，必先（苦其心志），劳其筋骨”我有一个非常、非常强烈嘅感觉，呢个系命运带畀我嘅安排。最近唔同嘅方向，唔同邀约我都收过。但实际上近期最令我感动嘅，系喺患难关头会见到咩系真朋友，所以我有好多唔同想法。我唔知未来随时间发展会点，我希望自己可以用一啲时间沉淀一下，睇唔到有咩要急。
我希望自己可以用一啲时间沉淀一下，睇唔到有咩要急。