我们的2023｜林作首认荷里活“抽水”失误 言论出位呻被网络欺凌
被封为“抽水界KOL”的林作，2023年在金融圈中经历连环“炒车”风波。其中在今年6月，钻石山荷里活广场凶杀案中，他在Instagram图文并茂、模仿疑犯装束，引起公众哗然，最终令保险事业一舖清袋，被保诚炒鱿。其后，他再转战“币圈”，时至今年9月，更在中环娱乐行开场外兑换所（OTC），惟开业仅10日，却卷入JPEX涉嫌诈骗事件，被警方以涉“串谋诈骗”被捕，公司同极速结业。
面对2023年连番挫折，连他自己亦不禁自嘲“镬镬新鲜镬镬金”。《香港01》今次邀请林作总结全年，原汁原味全程纪录采访实况，当中，他首认“人设”爱抽水，惟一直以来“机械式抽水”方式，以致对话题敏感度不足，造成水准上失误，最终引火自焚。惟他亦为自己行为辩护，指只是有样学样模仿网民，现已惨成网络欺凌对象。
▼2023香港大事回顾｜《香港01》我们的2023系列▼
做保险为证明自己 三年心血一舖清袋
01｜好多人做保险话系帮人，你做保险当初系为咩？想揾快钱或者揾大钱？
作：保险业任何一个人话系为咗帮人，都系讲假话，呢句系我话嘅。就正如每年“状元”话希望做医生系想仗义行医、济世为怀，全部都系乱讲。你试下每月畀3000蚊佢，睇下佢哋仲会唔会济世为怀？无论我做保险定系所有事业，其实都系想证明自己。我想证明畀人睇，我唔只系一个“二世祖”，呢方面我同钟培生一样，只系我唔明白佢点解想搞打拳。
02｜6月荷里活广场抽水Post一出，保险事业一舖清袋，畀保诚炒鱿。你会唔会觉得之前想证明畀人睇嘢，咩都无晒？
作：我必须要讲，6月离开保险公司呢件事至今，对我嚟讲系今年最大嘅事。比起近期（JPEX）风波，我认为系更大。
我想证明畀人睇，我唔只系一个“二世祖”
无怨保诚炒鱿 谈及向展鹏反应支吾
03｜你最后被保诚划清界线，终止合约，有冇觉得“被出卖”？
作：我谂我最强嘅感觉，系佢（保诚）连开我个名，都无办法做到，令我觉得佢无将我当做一个公众人物，去做呢个角色（保险经纪），我觉得呢个公司唔系好清晰。但我从来好少仇恨，真系无。我亦相信在商言商，有好多大型公司一定会有呢啲考量。我唔觉得系任何一间公司问题，呢个系一个游戏制度。
04｜向展鹏话劝戒过你，去到网站变咗第个人，帮你拆过唔少弹，你会觉得佢讲嘅系事实吗？你哋仲有无联络？
作：我...离开咗工作之后，离开咗呢行之后，无...无再同啲咩以前嘅同事有太多嘅...呃...呃...呃...呃...接触，除咗系好公开嘅祝福。我...我...我...就无咩特别嘅谂法，我自己系喺人生哲学上面系觉得...要...要向前望，就唔驶太过考虑啲咩。横掂都无咩可以做，既成定局嘅情况下，就要向下一个阶段谂同发展。
首认机械式抽水焫著火头 称“总有一次会出事”
05｜你觉得那篇贴文，会对死伤者或其家属会有伤害？有无谂过件事会咁？
作：我认为喺𠮶件事上，反而觉得不是对某一小部分人，造成强烈感受。而喺好多人对呢番言论觉得反感，反而系问题真正所在。我会话喺我策略里面，其实不嬲都系咁，一日好多话题。但每一日机械式咁抽水，有时对于某个个别话题，无足够敏感度，我无花太多心思喺上面，有时造成...英文叫“misfire”，真系“抽著火水”。
实际上，𠮶个言论上我喺好短时间内，已经好唔寻常删除言论。因为我觉得，可能会造成某啲不安，呢个唔系我想做嘅。但𠮶个抽水上，有啲水准上嘅失误，我谂我系百分之百承认。唔单止系𠮶次，有时我都觉得有时，有更加多时间去谂一谂，未必应该咁样去出POST，呢个我十分之坦承。当初出POST如果有请多个人睇，或者会更好。
𠮶个抽水上有啲水准上嘅失误，我谂我系百分之百承认
06｜你有无后悔到出呢个POST？
作：唔单止呢件事，我人生入面几乎无一个位，系我望返会觉得后悔。我觉得后悔系一个不太理性嘅情感，因为当时嘅你，唔知道后面发生咩事，大家唔好睇太多“时空转移”、“时光倒流”啲戏，然后再想当初，当刻无可能知道后果系点。
我呢个“人设”，即系比较钟意“抽水”嘅策略，例如愈有争议性愈想“踩只脚”埋去，有时候会出事，我觉得系无可避免，只系时间问题。只系究竟是𠮶单定另一单，我觉得总有一次会出事。
07｜好多人话你嘅言论“冷血无良”、无办法接受。身为一个有啲影响力嘅公众人物，你觉得自己有无做错到？
作：有一件事我应该做得更好，而我真的忽略咗，就是自己所谓公众人物影响力。我好多时候都当自己系普通网民，大家都知道普通网民嘅言论，可以有几“贱”。很多时啲言论都不是我开始先，我见到啲网民咁“串”，我又会跟佢哋咁讲。但我无谂过，同样嘅言论出自喺一个咁嘅人嘅口中，可能会造成好大回响，呢个影响我无谂过咁大，我认为系始终要学识同埋始终要面对。
我见到啲网民咁“串”，我又会跟佢哋咁讲。但我无谂过同样嘅言论，出自喺一个咁嘅人嘅口中，可能会造成好大回响
称遭网络集体欺凌 被质问褪軚指“食得咸鱼抵得渴”
08｜成件事入面，你有无觉得最对唔住边个，或者要道歉嘅地方？
作：我会对整件事感到遗憾，但如果做啲道歉，系有用嘅话，可以另当别论。但我斗胆讲...呢件事喺网络上嘅道德审判，审判已做完咗，其他行为（道歉）都无咩太大意思。如果你话我要得到所谓嘅“报应”或后果，当时嘅网络审判，就已经完成咗。
我都认为近年嚟，多次，即使我有一定犯错都好，有被网络公审。我依家成为一个被集体欺凌对象，这个我系好睇得到，慢慢成为咗一个习惯。
09｜你人设系“抽水王”，出位言论都系想要有noise。网络欺凌当然唔好，但讲得咁尽为出名，但转个头又话比人网络欺凌，咁讲会唔会有少少矛盾？
作：你讲嘅绝对啱，甚至乎系游戏规则嚟。当你讲争议性言论出嚟，你就系邀请人去攻击同批判你，我觉得呢个系游戏规则，一定接受。但我觉得要有限度，香港唔系一个最过份嘅地方嚟，即系我无接受到啲死亡恐吓、死亡威胁，但当然系有啲情况下，就真系过咗火，我觉得系大家要面对嘅课题，但我唔会话后悔话，我出咗名但唔畀你攻击我，我觉得我要接受。
呢个都系我好唔钟意明星嘅一个原因，我真系唔明你咁想出位同出名，但有人嚟影你又戴口罩戴墨镜，喱埋一边，你拣架啫嘛，条路自己拣，食得咸鱼抵得渴，我同意。
条路自己拣，食得咸鱼抵得渴