【老虎仔周记】撃退贼仔立大功　虎妈竟屈老虎仔捣乱？

爱护动物无分国界，《香港01》宠物频道及其facebook专页欢迎你投稿。本文由老虎仔主人Faith投稿，她分享了老虎仔驱走入屋偷窃贼人的事件。估唔到老虎仔这么本事，就连贼人也怕了牠！

上回提到，为了出街会佳人，唔系，佳猫，我死死地气都要有啲礼貌讲唔该，仲要比虎妈发现我唔止识听，仲识讲广东话。

【点击图片看老虎仔如何驱走贼人】

唉，正所谓，福无重至，祸不单行，连朕都斗不过天，真是：日日夜夜福满身，分分秒秒祸临头。 

对朕来讲，究竟咩事咁唏嘘？ 

保加利亚治安很好？

瘀事梗系一阵先讲。讲番保加利亚的生活，一般来讲，治安都好好，很少街头抢劫或偷野，只系入屋爆格多如牛毛（吓，咁都叫做治安好？）。我偷听到虎妈同虎爸讲，剩计我哋住这一层，八间之中，六间都中招。佢哋谂住我哋间屋有我睇场，应该冇事～呱。

险被屈捣乱

有个星期日晚，佢哋去完教会崇拜（你地冇听错，呢度华人教会因为要迁就开餐馆和市场的人，是在晚上崇拜的），一返到屋企，就见到地下满布杂物，乱成一团，露台的门又开咗。

虎妈仲同虎爸讲，唔通老虎仔咁百厌，捣乱一轮，自己开门出去玩？我在露台听到比佢哋咁屈机，忍不住立即跑回屋内同佢地讲清楚。不过以佢哋嘅智慧，都系听唔明我啲标准嘅广东话。

佢哋入到房，发觉满目疮痍，才知道怪错好猫。点算之下，佢哋发觉损失也不算严重，只是被偷走一部相机和五百蚊港纸（个贼应该都系又笨又老实）。但有样野好搅笑，佢哋竟然发现个贼将一部傻瓜机掉在地上没有拿走（你们没听错，当时仍然有傻瓜机存在世上，哈哈）。

然后佢哋就分析出一个结论，就系话个贼好有品味，只偷大机，唔要傻瓜机！哼，佢哋又唔谂下，我平时恨不得成日出街，点解今次露台度门开咗，我仍然冇走到，仲要等佢哋回来后第一时间返返入屋？

让朕娓娓道来事情缘由

个贼系趁朕熟睡时偷入屋，并大肆搜掠一番。若果唔系朕警觉高，突然扎醒，并且对贼人大声喝骂和追出去，你哋部傻瓜机连同其他嘢，一早就……（负责笔录的书记按：下删一万字佢自吹自擂的吹水嘢）。贼人看见如此威猛的大老虎追出去向他咆哮，都不禁拔足而逃，慌忙之际，遗下了一只拖鞋在露台。

头先我好唏嘘咁话祸不单行，但其实柳暗花明又一村（唔系九龙塘果度）。虎爸虎妈因为这事要向邻居求助，竟然因此和隔离邻舍都熟咗，仲周不时同佢地一齐开车四围玩。而我？我咁人见人爱，啲邻居梗系爱屋及猫啦！

【点击图片看老虎仔为保江山，纾尊开金口讲唔该】