【后生仔倾吓偈】方力申同Stephy仲系朋友：我哋仲喺同一个group

最新一集《后生仔倾吓偈》揾嚟方力申做嘉宾，虽然佢一心一意系想宣传11月嘅环岛游，但结果话题一直都离不开“前度”。曾几何时被认定为金童玉女嘅方力申同邓丽欣，拍拖10年未能开花结果，有后生仔问到“怕唔怕前度咁深刻， 揾唔返下一个更好？”方力申表示身边朋友都有同佢讨论过呢个问题，仲话如果揾圈内人的少不免会被比较，揾圈外人的话怕对方承受唔到压力，所以提议佢外籍女友。“但我其实无揾过，亦都无人揾，随缘啦。”呢个答案真系官腔到一个点。6号之后再追问如果揾外籍女友的话，日本或者台湾会否是心水之一，方力申只系话每次去旅行都会留意下当地嘅女生。

方力申之后被问到惯唔惯单身生活时，佢表示自己向来都唔黐屋企，加上自从开咗泳会之后就更忙，但偶尔都会谂下到底拍拖感觉系点。“呢几个月练水咁辛苦，试过练完再去教水，都有谂点解要咁辛苦，但就无谂如果有女朋友就好。”最好笑系冯盈盈话如果有女朋友仲攰，未必系脱水咁简单，方力申非常认同，仲对住冯盈盈话：“有你呢种女朋友真系会仲攰。”

以为“前度”话题就咁完？对唔住，继续有嚟。6号问方力申会唔会追踪前度嘅嘢，佢就话：“好清楚，因为有共同朋友。我哋仲喺同一个group里面，过年过节都会祝贺对方。我今次环岛游佢都有捐钱支持。所以……系知道对方嘅状况。”咁当前度有新恋情时，又会唔会有特别感觉呢？方力申话冇，仲话“有见过佢地两个一齐，同场但无同台食饭，有点头打招呼，你问我如果佢哋开花结果，我当然会恭喜。”系咪可以做到再见亦是朋友呢？方力申话好佩服情侣分开之后仲可以继续做好好朋友，甚至于可以同对方男友做埋朋友，但自己就暂时未试过……