【晚吹】韩国车模身材特别好？　造型师：试衫要戴4个bra

最新一集《晚吹- 又要威又要戴头盔》请嚟4位造型设计师爆料，其中一位表示：“男团好麻烦”，听到嘉宾咁讲，主持人余迪伟就笑言“我哋都有两队㖞(指MIRROR与ERROR)”但该造型师就话:“做得佢地老窦啦。”并透露呢个本地男团共有4名成员。“其中两个成日都问我另外几位著咩，会暗中比较同争衫著，佢唔会话我听佢钟意啲咩，但就不停咁问我另外几个钟意啲咩，我当时仲好天真咁同佢讲‘你哋识架嘛，不如自己沟通下’，反而另外有一位就好好，佢会叫我比晒啲衫其他人拣先。”讲到本地男团，而且只得4人兼系老窦级年龄层，有网民就估系BIG 4。

除左争衫著之外，几位嘉宾都不约而同表示：“artist同model都好钟意报假数”。所指嘅数，系尺寸！有造型师透露曾为台湾男艺人造演唱会衫，点知批衫出嚟后，男艺人连钮都扣唔埋，细问之下，其经理人话：“比你嘅size系3年前度嘅。”至于另一个报假数事件发生喺澳门赛车上，造型师表示有一年大会请咗一批韩国车模。“收到尺寸做衫时，个个身材都系36、24、36咁，点知到真人嚟试衫时，个个全部著完出嚟都要戴4个bra，最惨系件衫中间透视，简直系灾难，个个心口松到阿妈都唔认得。”由于时间有限，加上心口位唔系话改就改，于是该造型师即时托人喺香港搜查NuBra，再人肉速递到澳门。