【晚吹】灵探上海幼稚园　晚晚播歌唔系比大妈跳舞而系…

由鬼王潘绍聪主持嘅ViuTV节目《晚吹– 总有一瓣喺左近》，最新一集以“灵探”作为主题，嘉宾之一嘅法科师傅Benson表示之前曾经去过位于台北、有死亡公路之称嘅北宜公路。有传公路开凿时，意外频频而导致死伤不少，公路启用后，亦不时发生车祸，当地货车司机每次过路时，都会撒溪钱。“山路空气应该系清新，但𠮶晚我哋落车时，不停闻到腐尸味，当时有谂会唔会系动物，但那味道连风都吹唔走，好浓烈，令你头痛想呕。之后我整个人突然断片一样瞓著咗。”Benson后来听朋友讲，话佢哋每经过一个弯位就会见到一个白色人影，当车靠近时，人影会弹开，经过20分钟车程后，众人成功落山，Benson醒来后，车上嘅所有电子仪器全部hang机，重启后，电子仪器所显示嘅时间全部都系10年前。

主持之一嘅詹朗林亦分享自己早年于上海嘅灵探经历。“上海静安区有间幼稚园好出名，因为闹鬼事件发生,，所以上海省市政府特地喺幼稚园前面嘅广场，每晚都会播啲运动歌，用意系等啲冤魂、小朋友唔好骚扰附近嘅人，到而家都仲系，我去到𠮶阵成个人都好心寒。”之后詹朗林又透露其友人曾经喺马来西亚度假酒店，因误闯一个封锁区而引起嘅意外。“佢喺酒店时，见到有个地方封咗，但都照走入去照相，到第二日，由于佢唔熟游水，所以只系留喺沙滩晒太阳，但突然佢脱去上衣出海狂游水，然后游到中间就沉咗落去，被救起后要送去深切治疗部，后来佢屋企人揾师傅睇，话原来佢喺酒店影相时，唔觉意得罪咗灵体，其中一张相影到一个粉红色嘅影，师傅即时叫佢删相。”奉劝大家出外旅游时，影相都要小心啲。

最后，节目仲教咗大家一个有机会可以见到灵体嘅方法，但就一而再咁话后果自负。“揾个大竹篮，喺上面放溪钱，然后放馒头，喺上面插三柱香 喺里面等10-20分钟，会有机会睇到嘢。”嗱！再讲一次，后果自负。