【向西闻记】沙律张沛乐做PTGF教陈安立追女　短片一日浏览破12万

早前传出原创剧《向西闻记》被Netflix睇中，继《反黑》之后、再有港产电视剧于呢个国际平台上架。合共12集包括九个单元嘅《向西闻记》，最新推出由张沛乐（沙律）及陈安立（Brian）主演嘅单元《PTGF & PTBF》。戏中沙律教 Brian沟女要简单直接，应该兜口兜面同对方讲“今晚我想 x 你！”爆粗片日前流出，不足一日已过12万 views。

沙律：爆粗没有心理障碍

戏中讲述做PTGF（part time girl friend）嘅沙律遇上ABC陈安立，导佢入行做PTBF（part time boy friend）之余，仲亲自传授追女攻略。沙律教Brian沟女要简单直接，喺“又高又型又靓仔，讲咩都系道理”的“金科玉律”之下，应该兜口兜面同对方讲：“今晚我想 x 你！”

沙律笑言：“戏里面讲粗口冇咩心理障碍，因为好多时啲戏唔俾讲粗口，有得讲嘅时候相对令自己放啲，不过我平时甚少讲粗口，唔会好似戏入面咁粗口烂舌。拍呢套戏系轻松同有啲兴奋，因为见到啲对白又讲粗口，又有少少咸湿成份，都几搞笑。”

认真走进PTGF世界　想了解男人要啲乜

沙律表示自己其实唔太了解PTGF这个特殊行业：“开头好唔明点解要做呢个行业去揾钱？冇可能要用自己身体嚟交换，但当我接咗呢个角色，我就认真谂佢哋嘅心态，好似呢个角色嘅设定佢因为俾男人呃，感情受创，唔系真系为钱，呢个行业令佢认识更多男人去了解同沟通，知道男人需要啲乜嘢，点样去做好一个女朋友，我谂嘅系反而内心嘢多，PTGF唔等如做鸡。”

Brian就觉得这次演出好好玩，其角色由“纯纯兔”受到诱惑成为PTBF甚至职业高手，周游于不同同女性之间，再走上成魔之路，逐渐迷失；拍之前除咗上网睇真实PTBF剖白外，更煲李察基尔经典电影《美国舞男》作为参考。