【向西闻记】张建声首度回应分手事件　“讲到有小三介入我好嬲”

今日张建声为网剧《向西闻记－咖哩鸡》进行拍摄，亦都系佢分手后首度会见传媒。问到最近一连串负面新闻会唔会影响工作心情，张建声直言：“绝对有影响，但我唔会俾呢啲负面新闻影响我演出，因为我系专业嘅，我收得人哋钱，人哋俾得呢个机会我，觉得我合适演呢个角色，我唔可以俾呢啲负面心情影响我，但讲真，我嬲嘅，因为我已经喺ig出咗一个声明讲分开咗，但我唔明点解仲会有咁多间传媒有不实报导，例如话有小三等，令到我同Kelly要再出多一个声明，澄清我哋之间系冇小三介入。”

张建声更称中间一直有好多自称报料者爆料俾大家知分手内幕，张建声都知道有呢一班人嘅存在：“我称呢一班人为无聊人，佢哋咁样影响双方嘅形象，连累咗琳琳同松冈李那呀，见到呢两个报导自己真系嬲。”

除咗怕影响到女方形像之外，自己形像难道就唔会怕？张建声回答：“我都怕㗎，入行7年自己都冇乜绯闻传出，今次一嚟就俾铺大嘅我，有心理阴影㗎。不过唔紧要啦，眼睛雪亮嘅观众唔会因为呢件事去误会我。”最后张建声都好多谢老板萧定一支持和信任佢。