【年初二】家燕姐利市特别好意头　汤洛雯要带男友登门拜访？

今日是大年初二，相信各位还是在前往拜年的路上，想𢭃大利是？但又怕应对长辈问题？想知见家长有咩要留意？以下一文总结所有贴士，由薛家燕和汤洛雯解答你所有疑难。

新年如何从家燕姐手上得到大利市？
家燕姐：“我封利市啲人话好好意头。”
汤洛雯：“我要啊！我要！”
家燕姐：“咁一定啦。当然啦，我会返公司嘅，我又会出嚟同大家团拜嘅，喺𠮶段时间就可以𢭃我利市啦。我又冇理由攞住叠利市周街派加嘛，香港几百万人㖞！”
汤洛雯：“郭富城应承咗。”
家燕姐：“咁郭富城做啦，我遇到啲熟人咪派啰。”
汤洛雯：“家燕姐啲利市封好得意㗎，系印咗佢自己个样，同埋佢著住财神衫。”
家燕姐：“旺财吖嘛。”
汤洛雯：“所以听讲好多人都特登问你拎利市。”
家燕姐：“好似俾个信心佢哋咁，佢哋袋咗成年都话行好运㖞，咁第二年又同我攞过啦，攞完之后话我妈又想攞封，跟住话我爸又想攞封，跟住就越攞越多。”
汤洛雯：“佢哋净系攞利市封定要埋啲馅？”
家燕姐：“一定系有馅既！我俾利市封你冇馅得唔得吖？”
汤洛雯：“梗系唔得啦，我𠮶封要超大㗎、厚嘅！”

新年见到长辈都会被问一连串问题，靓汤原来都怕俾人问？
汤洛雯：“我谂我今年拜年应该会好多人问我：几时⋯⋯”
家燕姐：“红鸾星动咁啰。”
汤洛雯：“拜年就会见到好多亲戚，亲戚应该都会好关心我𠮶方面，所以大家亲戚唔好问我喇，做近嘢㗎喇。”
家燕姐：“通常啲人问都会问：几时到你派利市啊？”
汤洛雯：“系啊！”

如果汤洛雯带男朋友予家燕姐过目有咩要注意？
家燕姐：“首先睇吓佢识唔识礼貌，譬如嚟探我，梗系要带手信、礼物啦，就唔好就咁买包橙㖞，起码一个大嘅（Gift）Hamper。如果新年就带封利市啦，虽然佢系后辈，即都俾封利市我、好意头咁样啦。”
汤洛雯：“吓，后辈俾返利市前辈？”
家燕姐：“可以㗎，仲可以大封啲添㗎。同埋仪容要清洁、干净，虽然年三十晚可能打通宵麻雀，或者玩天光，但嚟到见到我就一定要剃须、梳靓个头。最紧要就系对你好，即佢同你嚟见我嘅时候，招呼你周到、锡你最重要，譬如𠮶日冻嘅，同你拎住件衫啊之类。”
汤洛雯：“好Sweet啊，讲完好似我就真系要带个人返嚟俾你见。”
家燕姐：“直情系㗎喇，咁我又会准备封利市俾你哋嘅。”
汤洛雯：“我而家记低先，冇谂过原来有咁多注意事项。我就知道要嗌人、打招呼、有眼神交流、笑容满面、带手信，呢几样系最紧要。”
家燕姐：“问埋我几时得闲，请我食餐饭。”

新年注意事项
－吃萝卜糕、年糕，喻意步步高升
－吃生菜，喻意生生猛猛
－初一要吃素；初二才吃开年饭
－新年前剪头发、买鞋，新正头（初一至十五）不可以做
－初一不可以扫地、洗头，按照传统历法是晚上11时前
＊想知道更多新年内容可留意无线电视节目《新春开运王》