黄翠如生日萧正楠送苹果树蛋糕　原来隐含订情密码

今日系黄翠如 37 岁生日，男朋友萧正楠当然要识做啦，佢揾埋成班兄弟，踏正凌时凌分同女朋友庆祝生日，仲别有心裁地预备咗一个有喻意的苹果造型蛋糕，相信翠如一定冧到爆。

萧正楠早前同胡定欣、姚子羚同曹永廉去咗瑞士拍旅游节目，同女朋友翠如小别，返到香港，Call 齐成班兄弟，包括曹永廉、袁伟豪、区永权、杨潮凯等，为翠如庆祝生日，畀成班佬包围，呢个生日真系阳刚味劲浓！初头萧正楠仲扮无惊喜，只系准备咗一个普通连锁店生日蛋糕，但踏正12点，就搬出一个巨型苹果蛋糕出嚟，呢个蛋糕并唔系一个普通蛋糕，成个造型原来蕴含咗“爱的密码”！

萧正楠同翠如拍拖4年，佢哋因为合作《师奶Madam》而结缘成为恋人，萧正楠在剧中角色叫“罗大树”，翠如饰演“花苹”，而蛋糕的造型系一个巨型苹果被心形树枝包围，喻意大树会一直爱同保护花苹。萧正楠以电话回复《香港01》说：“第一部同佢拍嘅剧系《师奶Madam》，剧中佢叫苹果我叫罗大树！所以就造咗苹果树蛋糕嘞！”真系超级 Sweet 呀！

唔只咁，翠如亦在 IG 公开同萧正楠之间的暱称：“谢谢萧一，为我准备了一个全男班的生日饭，一班男人的约会，总觉得我也是男人的一分子，谢谢各位俊男，祝黄二我生日快乐”，叫男友做“萧一”，自己做“黄二”，真系好有夫唱妇随的感觉，唔知几时先听到佢哋嘅好消息呢？