【逆缘】黎耀祥起底扮批中呃夏文汐50万　玄学界好多呢种败类？　

黎耀祥喺无线剧《逆缘》霉咗十几集，最近终于开始翻身喇！上星期用“灵鸟报讯”一招扮高人呃Like嘅佢就决定继续呃呃氹氹，寻日仲开始同一班富婆睇风水添，依家就讲到佢开始埋到夏文汐身。上门帮夏文汐批命嘅祥仔，就批出夏文汐28年前生咗个私生女，令夏文汐啧啧称奇，话咁多年嚟都系得祥仔讲到呢件事出嚟，最后夏文汐仲塞咗张50万支票畀祥仔，但其实成坛嘢根本就系祥仔喺睇到元祖龙羽居士嘅见客纪录，纪录上面睇到夏文汐问应否堕胎先做到。

【逆缘】夏文汐未够廿岁已系豪放女神 代表作《唐朝豪放女》坚爆

虽然黎耀祥冇做伤天害理嘅事，但点睇咁样起完人底之后呃呃氹氹始终都唔系正道嘅事，咁究竟玄学界系唔系充斥住呢啲“旁门左道”方法呢，又系唔系好多师傅都咁样做呢？上过无线《新春开运王》嘅堪舆学家陈子才就话行内真系有唔少呢啲师傅：“我哋行内会称呢啲叫‘鉴爻辨识’，佢哋根据客人基本背景资料，或者睇到客人著得光鲜啲，就讲多啲好说话，等客人高兴啲，以我所以国内这种情况更多。”

【逆缘】殓房扮尸临记最专业 陈家乐都赞：几十岁挞一挞都大镬

子才师傅绝对唔认同呢种方法：“佢哋呢种方面系好取巧，希望可以短时间博取到客人信心，真正系‘风水佬呃你十年八年’。依家科技好先进，真系有人上Google、facebook揾客户基本资料，睇埋佢去边、做过咩，然后扮自己算出嚟，好似黎耀祥喺套剧咁，就直头系呃人喇！”至于香港大约有几多师傅咁做？子才师傅就话一定有：“但你要话100个里面有几多个系咁，我就数唔到畀你喇。”师傅亦都话如果系以睇命格为主，加上睇客人嘅气息、状态，先至系合理做法。