【逆缘．专访】陈家乐极穷被迫过隐青生活：冇钱到饭都唔敢食！
陈家乐喺无线热播剧集《逆缘》里面饰演103岁冷冻人“钟定国”，二次大战时便被日军雪喺实验室，醒来之后至慢慢意识到自己身在2018年，并寻回儿子姜大卫同孙儿黎耀祥，其演技亦大获好评。而事实上，陈家乐亦度过了一段颇长的自我放弃嘅“冷冻时期”，有6、7年都系浮浮沉沉咁，当中更有3年系完全冇嘢捞：“我一开始嘅时候都系打工仔，做保险、做打电话嘅Sales，唔知系咪因为喺出面被搓圆揿扁得多，搞到个人冇乜火冇乜脾气。当时我系储咗笔钱先参加《英皇新秀歌唱大赛》入行，开始时觉得笔钱都够使，但冇谂过咁多年都揾唔到钱，搣咗四年就冇哂啲钱，𠮶阵时真系想死，𠮶时24、25岁。”
或者呢个已经唔系生活问题，而系生存嘅问题，所以陈家乐要周围问身边朋友借钱度日：“𠮶时公司叫做垫支咁每个月畀500蚊我，如果我完全冇嘢做就系得呢500蚊，而呢500蚊真系好快就冇咗，所以成日叫朋友借少少畀我，到后尾啲朋友都觉得唔可以咁样借钱畀我，系屋企人见到我咁样，静静鸡摄几百蚊落我银包度，我先过到最艰辛嘅日子。”
除咗开源，就系节流，陈家乐为咗减省支出，佢只能够拣唔出街：“个人愈来愈折，自己都唔知自己想点，一出街啲人又觉得我系明星、艺人，好似好风光咁，但其实我连妆头买衫钱都冇，连饭都唔敢食，净系敢食两蚊个嘅包，我最难堪系啲人以为我好风光，所以我好多谢麦曦茵导演带返我出嚟。”
除咗多谢有人肯再用他自己，陈家乐亦好多谢最近两年认识嘅一班战友：“以前真系觉得好孤独，入行头6、7年，香港电影真系几淡市，好少人制作，我连Casting嘅机会都好少，好在呢几年本土制作回归。我哋呢班新血其实系有个共识，就系好想团结呢代电影人去一齐做事，好似我哋成班男仔上年帮方皓玟拍咗个MV，而呢个系一个开始嚟，之后我哋都系搞足球队、一齐谂剧本，以前系冇呢样嘢。今届金像奖好多新演员上台做颁奖嘉宾，我自己都好开心。”
依家事业上扬紧，系咪解决到依家年青人面对紧嘅问题？陈家乐就话买楼上车对佢嚟讲仲未系易事：“以前真系觉得冇乜可能，楼价实在太高，我计过一日只用300蚊先可以有希望，但我日日都要出街开工，同同事做嘢都要请佢哋食饭架，冇办法唔应酬。有前辈就同我讲，呢啲钱系要用，要当系投资，如果就咁摆喺度，你收入未必升到，而我咁做收入真系有提高到。”咁到底戏中同佢有感情线嘅林夏薇有冇面对过陈家乐嘅困难？下编再续。