【打蛇】牟敦芾专拍变态片　认演员劲投诉：我拍紧事实

由牟敦芾执导、1980年播映嘅电影《打蛇》绝对唔系一套普通讲非法入境者偷渡来港辛酸史嘅戏，而系加咗好多变态元素、挑战人类良知嘅Cult片王。里面除咗有“打蛇集团”毒打人蛇嘅场面，更有大量全裸镜头，当中最激、最痴线一定系女主角细佬被集团首领鸡奸，以及之后细佬为报仇而监生咬死首领嘅场面，睇完成套戏都真系会觉得牟敦芾其实系变态。

【Cult噏】港产片《打蛇》变态难顶度爆灯　忍得住睇晒真心犀利

而牟敦芾喺邵氏官方刊物《南国电影》度，就话自己系拍紧事实出嚟，绝对唔夸张，同埋呢套戏系有真正意义。佢亦话偷渡潮𠮶时的确系有三种人会绑走人蛇要求佢哋香港亲戚交赎金，第一种就好似戏中嘅职业“打蛇集团”咁、第二种本身都系偷渡客，但系揾唔到食就做呢啲勾当、第三种就系住喺边境嘅农户间中客串下咁，呢三种人亦都会互相斗法。

牟敦芾亦喺《Black Sunshine: Conversations with T.F. Mou》呢套以佢为主题嘅访谈纪录片中，指《打蛇》中嘅虐待女性情节系反映住现今社会仍然充斥住嘅重男轻女观念，佢就举出一个好有画面嘅例子：喺中国，女性生小朋友嘅时间，往往隔篱都会有个水盆喺度，因为如果生出嚟嘅系女仔，就会即刻浸死佢。主持人亦都话听过有演员话牟敦芾逼得佢哋太尽，牟敦芾就咁答嘅：“佢哋成日都会有类似嘅投诉，但你一定要说服佢哋做落去。”

虽然牟敦芾拍嘅戏真系好变态，但的确系一个好爱电影嘅人。1977年加入邵氏嘅佢喺纪录片度就话自己曾经问过邵逸夫：“你每年拍成百套戏，有冇谂过畀少少钱去拍一套戏，唔好为咗票房，而系为咗拍到一出套好戏。”但对方就只讲咗句“点解我要咁做”，而佢亦都话自己喺邵氏𠮶5年实在太舒服，所以先至离开香港，北上到内地拍其他想拍嘅戏。