cult片王《山狗》虐杀轮奸超变态　郑则仕仍然心寒：觉得导演痴线

1980年上映嘅《山狗》可以话系香港Cult片界嘅王中之王，故事就讲述依家已经息影嘅庄静而同佢哥哥艾迪一行五人去荒山露营，点知就遇到“荷兰佬”王青、“高佬”邝佐辉、“蛇佬”关鉴铭、“矮脚虎”同“病甩毛”郑则仕呢五个坏人，之后庄静而仲畀佢哋轮奸，而艾迪亦中伏惨死，最后陈星为一对仔女报仇，将佢哋一一虐杀。虽然当年得29岁嘅郑则仕（Ken哥）喺戏里面多数都系斋睇冇份做，但佢日前接受《香港01》访问时就指呢出戏隔咗38年都仲系咁深刻。

提到不时都有人翻睇、提起呢度旧片，Ken哥就咁讲嘅：“我自己都好耐冇睇，但我好记得我系拖住只光头马骝，庄静而、钟保罗去旅行畀我哋搞，我哋呢班人有王青咁。（剧情、画面好癫，你都肯接？）冇所谓，有钱畀我嘛，哈哈！其实系我𠮶时初初入行，唔介意做呢啲，做新演员就系要试多啲呢啲，系而家先会拣嚟拍。”

至于拍之前有冇咩准备，拍𠮶时又有冇提出意见改动细节等，Ken哥就咁答嘅：“导演讲乜我就做乜，𠮶时好细，入行一两年，唔会谂太多，人哋导演由谂到拍用咗成年，冇可能我埋位就加意见话改啲嘢，当时我亦冇呢个能力。（最记得边幕？）最后王青跌落水，我拖返佢上嚟喺度喊，不断嗌表哥、表哥，仲有成班人轮奸庄静而，我坐喺隔篱斋睇，好似好过瘾咁，但其实成件事好惨。”

讲到依家港产片冇咗呢类咁大胆嘅戏，问佢觉得点解拍唔返时，佢就话唔可以话拍唔返：“其实个故事就即系旅行遇险记，要拍得暴力可能好易，但要有寄语就唔易。（有冇同导演余允抗联络？）冇啦，上市公司主席呀大佬，点联络佢。”好多人都话睇“蛇佬”关鉴铭睇到好心寒，Ken哥就话好佩服佢演得咁大胆：“佢死𠮶时畀人倒吊，有百几条蛇喺佢裤浪里面，佢真系好够胆。（现场睇到心寒？）我觉得导演好痴线！”

其实山狗导演余允抗系美国加州大学洛杉矶分校电影系毕业，系出名门。除了拍过《山狗》外，仲拍过很多港产片，例如本土鬼片经典《凶榜》，《飞虎奇兵》等，亦做过不少电影监制。至90年代，余允抗退出电影圈转战商界，并担任多间上市公司主席同行政总裁，认真多才多艺。

咁会唔会唔敢再接类似嘅戏？Ken哥答：“我冇话敢唔敢接，最紧要系我有冇能力掌控个角色，当年我立场嚟睇，意识正面啲就好啲，唔好太渲染暴力。（觉得《山狗》好渲染暴力？）𠮶时冇得拣，依家就可能觉得拍少部咁，我啲小朋友出世后，佢哋13岁前我都好少做反派，因为唔想佢啲同学睇到，就同返佢哋讲你爸爸好衰，唔想影响佢哋生活。”又笑指拍梁材远嘅TVB新剧会开心啲。