【果栏‧黄浩然‧专访二】令老婆难受：我唔识去pick up家庭生活

黄浩然跟老婆莫家嘉相识于2002年拍摄《新扎师妹》的时候，相信大家对黄浩然剑雄的形象相当有记忆，一套戏令他开始打响名堂并认识了后来的老婆。拍拖3年后便成婚，直到今时今日已经一起走过了16个年头，还育有了两名儿仔，但原来黄浩然亦曾经因为只顾工作忽略了家庭，大囝出生的头三年跟他彷如陌生人，因为一个病终于令他重新投入家庭。

黄浩然当初拍摄《新扎师妹》跟老婆相识，其实老婆并不是剧中的角色，他说：“佢系服指（服装指导），好自然地开工就走埋一齐，𠮶阵时我又无拍拖，其实我系识我太太舅父在先，大家成日都话约埋出嚟，讲就讲咗好耐喇，你估几廿年前相体咩，最终其实系无咗件事。后尾拍《新》就慢慢一齐咗，无咩特别㗎，开工焗住困兽斗讲吓嘢，收工我又主动约吓食饭饮吓嘢，好自然地真系，又无乜强烈强势。其实咁大个人大家都会feel到嘅，亦都系feel到有啲可能性先会再进一步。”所以话缘份几重要，学现在时下流行的佛系讲法，缘份到了，自然会在一起。

究竟一个演员同一个服指是如何走在一起呢？浩然在访问中多次提及“自然”两个字，真的是十分佛系，他说：“我谂识咗四、五个月就一齐，我哋呢行好奇怪，开一套剧连阿妈都唔会见，剩系见住𠮶班人。即系我拍《果栏中的江湖大嫂》见香香仲见多过我老婆，我谂我同老婆开始了解就系拍《新》呢段时间，咁唔系两个人嘅，系一班人，从中都会了解到大家。而佢亦都话过我知，我做嘢𠮶阵系最吸引。”

相处十多年，途中除了甜蜜，当然也会有争执的场面，不过浩然自己认为一个男人，有所为亦有所不为，所以即使嘈交亦不会动手动脚。我又唔算系一个好爆嘅人，但好多时一啲言语间会伤害到对方，可能系粗声粗气，又可能系返到屋企一粒声都唔讲，因为好多时我哋喺工作上已经讲晒所有嘢，返到屋企就会乜都唔想讲。”

浩然亦坦承自己对著太太也会爆粗，不过对象并不是太太，“因为我觉得男人有啲嘢系唔做得，打女人或者用粗口去问候，一定有问题。其实佢都会好体谅我，但十次都会有一两次佢会爆我，有时有啲事只系好少事，但系愈亲嘅人愈少嘅事就愈唔理。例如啲囝以前学校有乜，我系唔会上心，但而家电话除咗自己嘅嘢，仲会mark埋屋企人嘅嘢。”他认为自从病完后有另一个体会，以前的黄浩然人生就是工作工作再工作，现在除了事业，还需要家庭。

因为过往太沉迷工作，浩然基本上是忽略了家庭，最夸张的是，原来他跟儿子陌生的程度可以是这样大，他说：“其实第一个仔，出世三年我系唔识佢咁济，抱都唔识抱，咁样系会令到另一半几难受，因为我唔识得去pick up返家庭生活，其实系几可悲。啲人成日话放3日假俾你陪吓屋企，其实系唔得嘅，当你有一年时间唔喺屋企，可能你要用一个月时间去pick up返个心情同情绪去面对屋企。又或者我放到屋企，就会摊咗喺梳化到望住个电视发呆，你会觉得除咗做嘢，其他嘢都唔重要。”现在的他懂得抽时间去陪家人，见他们不时也会有合照放上网，一家人乐也融融。

除了一家人出去玩，教囝当然也是一个加强关系的渠道，但这样东西最难掌握，很容易便会变成时下的“怪兽家长”。他表示：“香港教育制度系辛苦，但自己亦都咁谂，家长唔叫个仔去写字，佢紧系拣玩喇，所以其实都好矛盾，唯有自己拣个中间位。我老婆都系同佢玩多，相对地希望佢快乐，当然我啲囝系惊我多啲，我同阿妈同会闹佢，但唔系同一种。而家做父母好难，我同太太都系不停学习，唯有睇多啲书，最惨系我哋上一代嘅做法系唔啱我哋，佢哋系严到不得了，而家又唔适合。”

【果栏‧黄浩然‧专访一】因为患病令他转变：以前我系唔注重休息

【果栏‧黄浩然‧专访三】绯闻绝缘体：就算揽住都唔会觉得有企图

“究竟你点样去培养小朋友呢？唔俾佢学嘢又惊佢追唔上，俾佢学又怕变怪兽家长，唔迫佢做功课紧系玩喇，可能你叫咗佢3粒钟佢都唔做功课，直到你闹佢。睇你点引导佢啰，做功课嘅过程发掘啲开心嘢，而家细路仔功课真系好难，数学一年班都真系几深，我都会同太太一齐pick up。”教囝从来都不容易，太过强硬会令人讨厌，太过放松又怕他被社会淘汰，如何做一个满分家长确实要时间去学习，希望浩然可以在工作和家庭中取得比冲，一来带到欢乐给观众，二来可以令两位囝囝快乐中成长。