罗力威雨侨结婚慧眼订靓场 回礼劲特别：同大家分享罗家口味
一个婚礼要搞得顺利而又令大部分人都满意，实在相当高难度。罗力威同雨侨选择举行西式户外婚礼，原来大部分嘢都系新娘俾意见，然后由新郎哥去执行，单系场地已经令大家一见难忘，佢地早喺一年前就订场，决意喺度拉埋天窗。
新娘子雨侨分享拣场原因：“喺香港可以见到天见到海见到草地，又有室内地方俾大家食饭嘅地方其实真系得几个架咋，所以我好快就决定咗喺呢度举行婚礼，大概一年前已经订场，可能够早啦都唔多人争。”
的确， 佢地选择举行婚宴嘅浅水湾The Verandah极具欧陆式雅致氛围，呢个地方原本属于1920年建成嘅浅水湾酒店，连西班牙国王Juan Carlos与皇妃Sofia蜜月期间亦曾经下榻。虽然酒店已拆卸但露台餐厅被保留落嚟，加建一条古典长楼梯，简直系新娘子至爱。
布置方面同拍摄婚纱照时一样，用上大量雨侨至爱嘅满天星，放上大大小小嘅婚纱照，加上行礼位置以满天星鲜花制作拱门，蓝天白云海景下出嫁，完全系女士们嘅梦幻婚礼。“我一早话俾佢知钟意啲乜，然后全权由佢同Deco音响摄影师等联络，出到嚟我都非常满意。”
【补办婚宴】吴日言古迹摆酒 先等入会再经英文面试：比想像中难
之前佢地嘅婚纱照，森林系室内拍摄引起好大哄动，婚礼呢日亦流出更多照片，除咗有更多森林婚照外，原来雨侨仲著上一套紫红色超低胸晚装，轻倚旋转楼梯，相当有气势，难怪罗力威会话婚礼呢日件婚纱系小儿科啦，雨侨话：“呢套婚纱都系Kev帮手设计，本身想轻便少少方便走动，不过今日条裙应该有40磅，哈哈哈，佢啲嘢都无得轻架啦，因为都系重手工，啲珠都有一定重量。”
至于回礼方面，仲送曲奇朱古力，就Out啦，罗生罗太搅搅新意思---送XO酱，雨侨笑住话：“大家以为我地系赞助咩？唔系呀，其实真系因为我地钟意食，又钟意辣椒油辣椒酱，呢只系我地食开觉得好食，专登订俾大家做礼物，将罗家口味俾大家试下。”经常拍片于网上分享美容心得嘅雨侨，睇嚟以后可以开拓新路线，叫“罗太教煮𩠌”啦。