港姐出身黄碧莲当主持3年　告别TVB儿童节目喊住讲拜拜

当谭玉瑛离开儿童节目主持岗位，好多睇佢睇到大嘅观众都真系唔开心咗一排，而睇住儿童节目《Think Big天地》成长嘅小朋友，最近亦体验到呢份离别带来嘅伤痛，因为继余德丞、林希灵同黄恺怡，最后一位有份开创节目的元祖级主持黄碧莲（Linna）亦在早排正式从节目毕业。而她在有份演出的最后一集中就显得非常不舍，到临尾要讲拜拜时，更忍唔住喊咗出嚟，隔咗个Mon都畀呢个气氛感染到眼湿湿。

Linna在网上便指自己好感恩可以加入《Think Big天地》这个大家庭：“3年前左右我自己一个人嚟咗香港，因为我喺香港冇家人，所以你哋就成为咗我家人。其实一开始一啲都唔易，环境唔熟，中文又唔好，真系从零开始。”她非常感谢一路以来遇过的人，包括每位小朋友、家长、老师，以及节目监制、导演等一班幕后：“好多谢大家咁包容、咁耐心对我。”她好开心可以在节目中为小朋友带来欢乐，未来亦会继续在J2的《安乐蜗》、《今期流行》，以及明珠台嘅《港生活．港享受》亮相。

其实Linna都好想拍剧，亦透露见过剧集监制，不过自知中文争少少，她接受《香港01》访问时便说：“我同经理人都有倾过呢个问题，佢建议我去补习，所以趁依家得闲少少都想揾啲本地大学课程读。（揾个男朋友练广东话仲快啦!）点解个个都系咁讲？香香、李亚男几位师姐都系咁讲，话有个香港男朋友，广东话会进步得好快，但系我觉得香港男仔好似有啲惊我。（点解？）可能我拍儿童节目时太癫喇，成个小朋友咁，但喺明珠台又成个大人咁，大家都唔知边个先系真正嘅我。”

Linna离开《Think Big天地》时嘅情况：

其实佢平时都Post唔少靓相：