【使徒行者2】邓梓峰巴斯光年成魔　成队古惑仔变警察都冇人知？

《使徒行者2》今个星期已经去到结局篇，大家要估嘅卧底同黑警都已经揭盅得七七八八，上星期已经揭开了终极大黑警系邓梓峰饰演的许Sir，其实都唔难估，因为出过镜嘅警队最高层就只有佢。佢一展现出系黑警之后，𠮶个奸样真系令到人有好大反应，唔系因为有几奸，而系佢巴斯光年嘅形象实在太深入民心，搞到大家见佢睁大对眼凶魏德信（陈豪饰）嘅时候真系忍唔住笑。无人会怀疑十郎嘅演技，不过就真系唔太习惯佢演奸角，尤其系阿Sir嘅角色，因为大家都会立即谂返起喺《龙咁威》入面嘅邓Sir，当年真系令人笑死唔少细胞。

以下内容有少量剧透，逃生门在此。

不过既然做得奸角就紧系要奸到尽，喺今日呢集许Sir唔只幕后操纵咁简单，仲亲手杀埋人，就系Madam Cheung嘅妈妈，事关佢认出许Sir就系当年同自己个囡拍拖嘅大只豪。有啲观众可能未搞清楚个关系，其实大只豪呢个前黑社会“雄鹰”的大佬，当年就系同Madam Cheung拍拖，之后佢杀死了真正的许Sir，仲取替埋佢嘅位置入咗警队，估唔到TVB咁嘅剧情都做得出，又无乜交代，相信一个黑社会大佬要行入警局都有啲问题，而家仲要系取代㖞。之后许Sir就开始将当时的黑社会成员伪装做卧底混入警队，Madam Cheung就系其中之一个，咁大工程嘅行动竟然无人发现，个个都无喺学堂出现过，又无学过警队嘅嘢，都可以捞到咁高职位，相信呢班前古惑仔一定系精英中嘅精英喇。