《反黑》落实开拍第二季　 张建声：点击愈高 老板就再揼多啲水

近期热播的网剧《反黑》已经播出了9集，内地点击率直迫三亿，香港的剧迷亦都会晚晚凌晨12点就上YouTube追看，不过期间就发生了一段小插曲，在10月1日凌晨3时YouTube上的《反黑》频道因遭恶意检举而突然被封锁，幸好到当日早上已解除封锁，剧迷可以继续捧场，大家不用担心。

《反黑》点击亿亿声，当然要食住个势，据可靠消息透露，该剧已落实开拍第二季，剧组已做紧前期工作，正在撰写剧本，部分角色更已经设计好晒造型，骨干人物原班人马上阵之外，亦会加入一些新角色和新的演员阵容，今季投资了6000万元去制作，而第二季亦会加码一倍，以１亿２千万制作。

香港01记者就电话访问了张建声，向他求证《反黑》是否会开拍第二季，他即呼吁大家要继续多多支持该剧：“系有意出第二季嘅，如果愈多人睇嘅话，咁开拍第二季嘅机会就愈高，因为我哋都系要睇返究竟𠮶个view数收到几多，嚟决定呢件事，所以观众嘅点击率同支持好重要。希望多啲观众继续分享出去，令到我哋嘅点击率再高啲嘅话，咁我哋就可以更加有胜算系可以叫投资方再加大少少个budget畀我哋，咁我哋就可以做到第二季更加好嘅效果，投资制作嘅budget大啲，我嘅演技又可以再发挥好啲。”

至于观众好关心的“谁是Final Boss”，他就好口密不肯透露半句，总之叫大家记得追看下去啦！