《反黑》演招积参考Joker 张建声：入行6年终于有人留意我
讲起张建声 (Justin) 这个演员大家会谂到甚么？以前一定是向西仔，入行6年至今已拍了多部三级片的他，其中《3D肉蒲团之极乐宝鉴》、《一路向西》以及《壹狱壹世界》最令人印象深刻，三级男星几乎成了他的代名词，仲要经常都是演咸湿仔。
即使他为拍《壹狱》花一年时间狂谷肥自己之后又狂减，让人见识到他的专业，话畀大家知道他为部戏个角色可以去到几尽，但大家的记忆始终停留在他的情欲戏上。而现在，讲起张建声，一定是会即刻谂起“招积”，他在网剧《反黑》中所饰演的角色。这套《反黑》的招积一角引起了很大回响，Justin演得非常出色，更成功为他洗底。
这个机会他等了6年，6年间他由一张白纸成长到演活了招积，演技首次备受激赞，Justin表示：“真系终于畀我等到喇，可以话系苦尽甘来。以前成日都畀人觉得我系三级片男星，最初都会好介意，后来会问自己‘做咩要介意啫，我都不过系做演员啫。’如果唔系𠮶时我拍《向西》打破咗自己个框架，又点会有今日嘅我，我好多谢呢部戏，令我可以甩开晒我嘅包袱，影响形象就实有㗎喇，首先系要放低自己个样。我而家反而好appriciate有呢个经验，唔系咁易可以得到嘅，唔知我老板系咪特登，次次都畀啲咁难应付嘅角色我去演。”
很多人都会好奇，这6年Justin是怎么挨过来的，原来他从来没有想过要放弃：“6年来由向西仔到大肥仔再到招积，开始有人会respect我啲戏。一直坚持落去第一要有忍耐力，要企得住脚，我好庆幸有咁多磨练我演技嘅机会。拍《壹狱》前增肥𠮶一年，我都曾经无晒斗志，无晒方向，又无钱，我咪日日喺屋企睇戏，睇到有边个镜头边场戏觉得好就即刻自己练，对住块镜练，又会出街观察啲人，做演员真系要做好多功课。”
机会永远留给有准备的人，就是因为Justin一直努力下苦功，才能让招积一角大放异彩：“开头播𠮶两集会见到有网民会话如果揾吴镇宇，张耀扬嚟演招积咪仲好睇，都会有hard feeling，但啲人竟然拎我同呢两位反派代表人物去比较，其实系我嘅光荣。之后当套剧继续播落去就无人再咁讲，而系会觉得我演嘅招积已经成新一代反派代表，真系好开心。我可以真真正正咁话畀人知，我系一个演员，有用功用心去演戏。”
Justin凭着这个角色获网民激赞他的演技出色，虽然是大反派，却深网民喜爱，不是喜欢他这个角色，而是喜欢看他怎去演活这个角色，纷纷赞他演得入型入格，角色前后反差极大，内心戏劲好睇，有影帝级甚至神级演技，相当耀眼，亦成为了大家追看该剧的主要原因之一。这套剧于香港和内地都有得播，内地网民收看时可以即时打弹幕分享感受，每当见到招积出场都会看得份外投入和肉紧。
对于外界一致的好评，Justin当然好开心，不过并没有感到飘飘然，清楚明白演好戏是一个演员最基本的：“我唔会畀人赞就觉得升咗上天，自觉仍然有好多不足，可以做得更好。我想一步一步去感受去领会，我唔系要做明星，我系做演员，对我嚟讲演戏大过天，如果个人唔红但一直有戏拍，我都愿，我情愿系咁样，可以一直演落去演到老，我个人好低调，净系想专注演戏。今次真系好感恩，入行六年以嚟终于有人觉得呢个0靓仔系识演戏。啲网民真系记得晒我喺戏入面做过啲咩，我好appriciate佢哋原来真系会咁留意我，记得我啲戏之余仲要咁钟意，自己作为演员最开心系呢啲位。”
Justin在《反黑》中演技大爆发，不过他却不敢睇返自己初入行时的作品，更曾经好惊演戏：“我做model出身，之后入行就拍三级片，我好多谢老板萧定一畀咁多机会我，令我可以从经验中学习。我自己从来无学过演戏，只系去过一个街坊福利会教话剧嘅地方上过堂，𠮶度系6岁到50岁嘅人都有。当时嘅心态并唔好受，我话晒都做过男主角吖，竟然要同啲街坊一齐学戏？我𠮶时好害怕拍戏，从无话一心想做明星，只系当时做咗两年model觉得系时候要转一转。我亦唔敢睇返自己以前啲戏，𠮶时自己真系张白纸，咩都唔识，仲要一嚟就做男主角，极大压力。但系反而有网民话钟意我以前好pure𠮶种感觉。”
而因为街坊福利会一位导师的一句话令Justin开窍了：“佢教我话‘What is art，art is life’我听完之后感觉即刻明白咗演戏同生活嘅关系，亦挑起咗我条戏瘾。”这句说话也是在他入行后的低潮期时听到：“接拍《壹狱》之前足足一年无嘢捞，无任何工作，老板咪叫我去学下嘢增值下自己。𠮶年我爸爸因癌症走咗，喺佢住院期间我日日都要去照顾佢，帮佢换片帮佢冲凉，第一次有亲人离世，系慢慢咁陪住佢睇住佢走，好难过。呢段经历亦令我急速咁成长，喺演戏上开咗窍，人生多咗阅历多咗体会对演技真系有帮助。观众同网民赞我梗系开心，做到行内人都赞赏我嘅演技，我仲开心。”
Justin坦言今次所演的招积，是他从影以来最大挑战的一次，唔讲唔知，原来这个角色是想向“Joker”(小丑) 致敬，咁的确系向高难度挑战㖞：“招积系我同导演一齐度出嚟嘅角色，原本系得三组戏，结果变成贯穿晒成个故仔嘅人物。我同中仔 (该剧导演宋本中) 太熟喇，系好兄弟嚟，佢知我好钟意小丑，又知我一直都想演精神病人，佢对我好有信心，我哋都开咗好多次会，好认真咁去研究招积嘅行为心态，例如眼神同点笑，当然都有参考小丑啦。”