【美食博览】李家鼎即场教秘技师奶围实　鼎爷瘦足9磅：停唔到！

鼎爷李家鼎同谭玉瑛今日杀入湾仔美食博览宣传第二辑《阿爷厨房》，吸引咗过百位老友记捧场及试食鼎爷手势。鼎爷透露拍《阿爷厨房》令佢瘦咗9磅，而下月开张嘅私房菜馆投资咗7位数，及向TVB请假一个月，未知有冇时间拍第三辑。鼎爷今日可以话将成个《鼎爷厨房》搬咗入美食博览，即席教现场观众煮咗一味杂锦凉拌，现场七成系上咗年纪嘅妈妈级观众，好畀心机听鼎爷教煮𩠌。虽然呢道菜唔使用明火煮，但鼎爷一样传授到秘技：“切皮蛋用刀会黐住咁点切？”秘技系用牙线，鼎爷更示范用牙咬住牙线一边，用手揸住另一边，然后将皮蛋𠝹开，全场拍手赞赏。鼎爷又即场传授刀功，妈妈级观众都非常受落。问到鼎爷几时开始入厨，谭玉瑛就代答：“初初佢爸爸系叫鼎爷阿妈煮啦，但系鼎爷好孝顺，以前冇冷气又用火水炉，佢见妈妈咁辛苦就帮下手，慢慢就喺妈妈度学到嘢，就成就到今日嘅鼎爷。”原来鼎爷拍摄时经常向谭玉瑛“呻”所以至知咁多嘢。

鼎爷接受访问时透露已向TVB请咗一个月假，因为要打理佢投资嘅私房菜，下月3号就会开张，选址铜锣湾登龙街，现时客人预订已去到出年1月，佢话有TVB前高层一早就订位“罗仲炳𠮶班呀、周梁淑怡都嚟。（会唔会收平啲？）冇得平，一视同仁，呢啲嘢规规矩矩，但会有啲优惠嘅，唔系钱方面。”佢话会坚持自己买料同下厨，如果要拍剧或做节目的话唯有就时间。

《阿爷厨房》嚟到第二辑，谭玉瑛就话拍摄过程几辛苦，因为好赶，但自己肥咗3磅，佢解释：“因为我冇佢咁大压力。”鼎爷则反而瘦咗：“我瘦咗9磅几呀，11个钟头，1个钟头食饭，佢唔系刻薄而系个节目系咁做，停唔到嘅，一停就冇咗个heart。”事后鼎爷将锦绣凉拌分畀现场观众，十几位家庭主妇排队品尝，食得津津有味。其中陈太太大赞好味：“我专程嚟见下鼎爷，我细个睇佢做戏觉得佢好恶，原来佢识煮嘢食又咁好人，佢个节目教𠮶啲菜都系我细个食过嘅，勾起咗好多回忆呀！我会跟佢煮畀啲仔女食。”