【任噏影评‧星际特工】大爱累事变烂尾　Rihanna吴亦凡高低之分

《星际特工：千星之城》作为一套宇宙科幻电影，仲要用成两亿美金去拍摄，啲人话特技靓到哗哗声，睇落又真系唔错嘅。作为一套科幻电影特技当然重要，尤其系一开戏就出场嘅珍珠族的雷尔星，整到成个世外桃园咁嘅款，而当个星球被毁灭嘅时候，𠮶阵世界末日嘅感觉做得好迫真、好震撼，呢一种相信都系出名拍科幻戏嘅洛比桑导演功力。

除咗景靓，故事入面有一场戏在市场捉复制兽，虽然话套戏系改篇自漫画，不过要将呢部份嘅剧情拍出嚟都真系一啲都唔易。一个本来乜都无嘅沙漠，原来戴一个装置就可以变成一个喧闹的市镇，感觉就好似戴咗VR眼镜咁。当然宇宙上面嘅飞船画面都做好得美伦美奂，尤其是𠮶座喺宇宙集合多个外星族的阿尔法城市，每一个位都做得好细致，有一种魔界兽人地下城嘅高科技版。讲画面，紧系要讲埋女主角Cara Delevingne坐潜水艇落深海捉水母𠮶一幕，𠮶几只海兽大得嚟唔假，移动得嚟又够震撼，如果出多几幕呢啲大型星种相信观众们会更加过瘾。

喺画面上基本上都真系赢晒，尤其除咗画面，女主角Cara Delevingne实在比画面更要吸引。对上一次留意佢演出喺《自杀突击队》入面做女巫一角，𠮶阵其实就唔太睇得清佢个样，不过做戏就愈来愈有味道。喺呢套戏上面有少少冷酷嘅佢更加有令人捉不著的媚惑感，靓女不嬲都容易成为焦点，佢仲要得25岁咁年轻，大把世界。不过讲起女角色，我就好唔明Rihanna嘅出现系为乜？佢嘅艺术成就当然系无可否认系好鬼死劲，近年开始多咗拍电影，不过对上一套对佢有印象嘅戏系仲系《超级战舰》，饰演一个过份矫情嘅海军军人，𠮶阵已经觉得佢唔太适合做戏。今次呢套戏其实系比较无咁难睇，如果佢出场有一半时间系跳舞，或者CG咗个样，不过一讲对白就出事，始终都仲系好生硬。不过佢都算好惨，剧情毫无交代到佢点受伤就死咗，仲要死得好快，好似隔硬要佢死制造摧泪位，不过可惜佢死咗完全唔感动，只系觉得死得好胶。其实戏中都有另一个空降明星，就系呢排因为《中国有嘻哈》而爆红的吴亦凡，又系一个歌而优则演嘅角色。戏入面佢同Rihanna戏份差唔多，不过更加自然，而且仲搣甩咗佢平时Hip-Hop风格𠮶阵嚣张味。当然佢嘅成就无得同Rihanna比，不过如果只以呢套戏嚟论，我觉得吴亦凡会系高少少。

其实套戏系几紧凑，由珍珠族个星球被毁灭，再到市场揾神兽，去到要查珍珠族案途中遇到嘅刧难，其实一直都去得好顺好靓。可惜去到最尾，讲到基乎被灭族嘅珍珠族终于现真身，正当我谂紧佢地会点样报仇，会唔会系毁灭阿尔法再歼灭人类，男女主角又点样运用机智才能去拯救人类嘅时候，原来我一切都谂多咗！珍珠族话佢哋已经好大爱咁原谅咗个罪魁祸首，仲话佢哋只系想想建立另一个星球之后走人就算。哗大佬唔系嘛，你俾人毁灭咗个星球，仲争啲灭咗族，连星球入面嘅神兽复制兽呢啲无限金钱制造器都只系死剩一只，你竟然乜都无争取过或者报仇过就话原谅？系嘅，要happy ending嘛，唔可以宣扬邪恶讯息嘛，咁以后《复仇者联盟》都唔好打架喇，大家俾人打完咪算啰，灭族都无乜所谓喇。其实成套戏都真系几好睇，可惜呢个位真系做得唔够过瘾，起码都打埋场交睇吓，又或者用吓啲智谋啩？宣扬完大爱之后，套戏就系两位主角嘅亲吻中同大家讲bye bye，我真系有啲失落。