【任噏影评．原谅他77次】爱情电影男人无好人　带女友睇绝对中伏

《原谅他77次》一睇个他字系用男仔他，就知又系一套讲个男仔点得罪女仔，之后个女嘅点样忍气吞声咁原谅佢嘅戏。呢啲戏作为一个男生其实系唔应该去睇，因为套戏好可能就系讲紧你做过嘅嘢，更加唔应该带埋你女朋友去睇，因为佢只会好似戏入面嘅阿Sa咁，将一件本来唔应该连埋嘅事一次过讲晒出嚟，到最后唔只周柏豪俾人话，连你自己都会身受其害。

当然，如果你系作为一个自信嘅男人，觉得自己好完美，系一个满分嘅男朋友，以为自己可以带埋女友入场睇，耻笑周柏豪嘅时候，其实你已经错得好交关。因为你女朋友只会同你讲：“你而家无做过唔代表之后唔会做啰，你睇吓周柏豪同埋黄秋生都系偷偷地背住自己𠮶个flirt其他女仔㗎，你要呃住我我点会知啫！”结果你又系被人莫须有地宣布罪名成立，因为喺你女朋友眼中天下男人系一样黑，你而家无，但系你将来会有。现今大部份嘅爱情电影，男人好似已经成为反派，永远都要做衰人。叶念琛系列讲到好似每个男人都会偷食，志明春娇系列张志明永远都系长唔大嘅细路，今次呢套其实都系差唔多，柏豪不停俾阿Sa话佢唔成熟。当佢听到柏豪唔做律师走去教拳，𠮶个反应大到以为唔做律师系会死，虽然佢有兜返话系要尊重柏豪老豆嘅意愿，不过明眼人都睇得出佢系觉得教拳系无前途，认为放弃律师呢份高薪厚职系十分不智嘅行为。当然戏中讲到嘅唔成熟行为唔只呢样喇，例如去旅行要plan，点解去旅行一定要plan？你唔俾人钟意自由自在想去边就去边？点解唔plan一定系唔成熟嘅行为呢？

喺套戏入面，惠英红大概有一句咁样嘅说话：“女人系咁㗎喇，就系要忍。”听到之后真系觉得好委屈，咩叫女人就系要忍？点解要讲得呢个世界得男人先会犯错？唔通男人就唔使忍嘅？而家嘅戏将男人标签为反派，女人就变成充满大爱而又悲情嘅主角，虽然话而家兴女权主义啫，都唔使去到咁尽下嘛？我唔敢讲周柏豪做嘅嘢唔系错，不过喺戏入面佢做嘅每一件事都唔会系啱，郁啲就俾阿Sa写落小气簿（即系𠮶本原谅他77次）。可能佢的确系会犯错、唔细心，不过又俾阿Sa连人带波射入网，将以前错嘅事又拎返出嚟讲。睇到呢度，我醒起子华神曾经讲过：“从来其实系有个实质嘅次数，当你衰到第三次，你就从来都系咁衰。”本来我都系当笑话听吓就算，不过睇完呢套戏真系有好深刻嘅体会，即使柏豪曾经做过咩好事，只要有一样喺阿Sa眼中嘅衰嘢出现，佢就会俾阿Sa话从来都系咁衰：

买梳化尺寸错咗，衰！

唔记得阿Sa食提子但唔食提子干，衰！

送礼物送云端呢啲喺阿Sa眼中无用嘅礼物，衰！

去旅行唔识路，衰！

朋友迟到无问题，柏豪落雨塞车迟到，衰！

好彩套戏无讲足77次系衰咩，如果唔系我真系会觉得男士们系会当场自杀，因为原来男人呢种生物系衰到咁嘅地步，不如都系快啲投胎做女人。当然，现实中唔会所有男人都似柏豪，亦都唔会所有女人都好似阿Sa咁，只系电影嘅世界就系咁，我建议男士们无咩事都唔好去睇爱情片喇。