【容祖儿演唱会】古巨基现身大爆Joey酒后瘀事　原来马桶好好玩？

容祖儿《Pretty Crazy》要馆骚踏入第十八场，每晚特别嘉宾都为大家送上惊喜，昨晚邀请到古巨基上台，大爆Joey饮醉酒做过的傻事，笑到观众肚痛之外，连Joey都笑到碌地。

基仔上到台先打招呼：“阿祖，系咪要摸下我湿滑只手先？”祖儿反问:“你个枝嘢咩嚟？”基仔答得相对暖昧：“我枝野又黑鼆鼆，又毛鬙鬙……”当大家以为他要开黄腔，实情他在形容那个咪套：“系羽毛球柄嘅毛巾套呀！因为我呢几年整坏左好多支咪，每支都成八万几蚊㗎。因为手汗太大，一挥手成枝咪飞走咗。”

Joey本身想拉开话题继续“质问”基仔，岂料被大爆饮醉酒“发功”的事。基仔说：“我哋识咗十几年，系近几年先特别熟，多咗好多聚会。”Joey即刻紧张起来：“你又爆料？乜成公司都系咁㗎……”基仔笑话：“大家想唔想听容祖儿平时生活啲傻瓜嘢呀？”观众反即起哄和应：“事缘系咁，阿祖系一个好乖唔识饮酒嘅女仔，同我一样……”他续说：“有一次Mani(霍汶希)同你嚟我屋企食饭，你有啲事迟咗到。喺楼下个保安话‘容小姐你可以入去喇’，你讲咗几次‘你点知我姓容架！？吓到Mani即刻拉你走！”

你以为咁就完？未！基仔再爆Joey一上到去就双手向天“发功”：“我以为你整整下成个人可以飞起！”此时Joey已经笑到碌地，但基仔冇停过再讲：“仲有呀，跟住你入咗厕所好耐，Mani不停敲门。过咗阵个门锁松开咗，大家见到你揽住个屎塔！当我哋扶你起身，你就话‘ 基仔！我发誓呢度系我嚟过最好玩嘅地方！’我都唔知个马桶咁好玩㗎！早知我都玩下啦！”基仔再下一城问观众：“各位想唔想睇片呀？ 其实我有当晚条片，我对朋友好好，我唔会出卖朋友嘅，除非佢系fans叫啦！我有带手机，有冇air drop呀？不如一次过啦！”笑完一大轮两人正经合唱《狂串乐基儿》，全场当正红馆系K房一样大合唱。

Joey笑到碌地逐格睇！