【专访】乐队野佬打工做音乐够随心：搞骚蚀钱当去个旅行！

港产歌曲于大家心目中，来来去去也离不开情歌、励志歌，再细分下可能有一些讲述宅男心声、港女心声的题材，却好像缺乏一些比较真诚直接的声音。经常都说音乐的维度应该更广阔，不过又有多少歌手、乐队敢于面向自己，想唱就唱，不顾形象把自己麻甩一面表露无遗？由2002年组成雏型野仔，再到2012年改名为野佬，似是看著几位初出茅庐的年青人转眼间蜕变成在职场打滚多年，不时要饮酒抒发闷气的中佬，麻甩中带点可爱。即将举行《大约在冬至》音乐会，就似是衬年尾前与乐迷一起做节，聊聊近况，又回忆一下当年。
摄影：陈顺祯

近年在大大小小的音乐会中也不乏野佬的身影，不过大多也是与乐坛好友一起合办，今次《大约在冬至》难得打正旗号是属于自己的晚上，终于可以释放一下，想点玩就点玩。所以今次乐队成员特意打造主题，他们表示：“Book场嘅时候都觉得奇怪，而家咁难Book场，都咁好彩比我哋Book到12月22号星期五，后尾先发现，原来𠮶日系冬至，唔怪得无人Book啦。然后我哋开始Brainstorm，既然都系冬至，不如就用嚟做主题啦，大家谂谂吓就谂起齐秦首《大约在冬季》，最后就决定成个音乐会都环绕九十年代嘅歌去玩。”虽然乐队几位成员听歌各有口味，不过一提起九十年代的歌曲，他们又再次起哄：“我哋喺Band房每人都唱啲九十年代嘅歌，睇吓边啲啱开骚唱啦，点知一首接一首，原来首首大家都识嘅。唔知系咪细个嘅记忆力特别好，一首歌又听好多次，所以一哼就记得晒。”

今次演唱会，除了翻唱九十年代作品，当然野佬的私家歌也是不可或缺。身处乐坛，歌手找到自己的歌曲风格，甚至是系列是相当重要，例如陈奕迅有“男人玩物四部曲”，周柏豪会有“兵歌”系列。至于队名亦称Yellow！的野佬，其实也有属于代表著他们自身的系列，当中最为出位的，应该也要数到“黄色三部曲”，《著袜浸温泉》、《夫目前饭》、《时间静止器》，可说是香港乐坛中，少之又少有人敢做的题材(男仕们看到歌名也大概会明白当中意思，不明白便很好很纯真，不要踏进这领域)。主音小胡笑言：“其实我哋平时都几咸湿吓㗎！写呢几首歌嘅时候都系由麻甩嘅心态做出发点，不过麻甩唔一定要好核突或者成个阿叔咁，所以用呢啲小小甜、古灵精怪嘅主题去认真做歌，一样可以系一件有型事。就算唔谂吸唔吸引人先啦，起码自己钟意嘛！”鼓手阿铭则表示：“其实我最细胆，初时我会话讲咸湿嘢好似唔系咁好㖞，佢哋同我讲要做返真正嘅自己，唔好有偶像包袱！”小胡即答咀问阿铭：“咁你会唔会上咸网呀？”阿铭笑言：“咁都有嘅！”所以大家抱持著玩乐心态把歌曲写下来：“我哋唔系鼓吹色情，其实大家都会有呢啲习惯，上网都会睇吓靓女，点解要怕做自己呢？”小胡续道：“其实呢啲音乐好正常，而家少咗人敢做啰。以前八、九十年代，刘美君都有好多呢类情欲嘅歌词。去到而家冇乜人做，不如我哋去写吓啦，大家都觉得过瘾，反正呢个年代冇嘢系估计到成效，做返真实嘅自己系我哋最需要做嘅嘢。”

现时玩Band的圈子虽然百花齐放，不过跟八、九十年代的光辉期，总是好像缺少一些棱角。Bass手何兆基直言：“而家啲Band全部都好保守，可能好多现实因素影响，如果你走得太前太偏激，人哋可能唔揾你做骚，或者去唔到某啲地方做表演。我明白嘅，但乐队真系要有啲棱角喺度，有自己嘅睇法先系乐队嘅价值所在。”结他手Wilson补充：“又同媒体嘅模式唔同咗有关，而家主要都系网上买歌，乐队要生存，音乐方向就要民粹，要近大众口味。不过我哋野佬无乜所谓，因为我哋个个都有正职有人工，反而成为咗一个优势去做自己想做嘅嘢。”

野佬成员夹Band为兴趣，打工为糊口，反而这种模式成为他们最舒适的状态，亦创作出多首“打工仔心声”，由早几年的《上面话OK》、《鬼叫我穷牙》，再到今年的《老佛爷》，乐队成员一直在控诉职场上的畸型生态，尽诉一众食物链最低层的打工仔心声。阿铭表示：“我哋几个都有返工，其实每个行业都有呢啲负能量，有人唔知自己失败嘅原因，有人唔明点解隔离𠮶个升职但系自己冇份。而今年我哋都出咗首《老佛爷》都好写实。”Wilson补充：“其实呢首歌系讲办公室入面嘅刷鞋仔，某程度上呢类人系放错重点，将个工作焦点放咗喺人际关系上面。就好似我哋做音乐嘅，应该系将个重点放喺音乐入面，但如果我哋走去做一啲同自己工作完全唔相称嘅嘢，咁件事都好无稽。”