【专访】无视网上“负皮”进军乐坛　颜卓灵：总之就系做自己！

相信大家对颜卓灵这个名字都不会陌生，由《狂舞派》再到不同幕前演出，大家都习惯了她演员的身份。今年她跳出框框进军乐坛做新人，却引来不少网民留负评。面对种种声音，颜卓灵依然忠于自己，希望成为歌手多过成为明星：“我唔想做假啰！好辛苦，我唔得㗎！总之就系要做自己！”到底何事令颜卓灵如此执着？

摄影：江智骞

以实力反击“负皮”

由演员转变成歌手，总要面对不同声音，例如“唱功一般”、“声线似某某歌手”等等，面对种种抨击颜卓灵态度乐观，打趣道：“其实初初出道总会俾人话似边个边个，我啱啱做演员𠮶阵都俾人话似薛凯琪、汤唯，话我似靓女梗系正啦！依家话我似一啲劲嘅歌手仲正啦！哈哈！”

虽然颜卓灵乐观面对，但面对网上“负皮”，甚至一些未曾听过她歌曲的人无理留言，可有想过要反击？颜卓灵表示：“反击就梗系用作品去反击啦！要努力唱多啲好歌！冇理由因为一啲未听惯我把声，或者一啲唔钟意呢种声线嘅人，而阻止自己尝试，因为所有创作都系会面对好多意见，由争议去开始。”她续道：“加上我见有好多成功，而且声线独特嘅歌手初初都系面对好多抨击，一谂到呢样就即刻打咗支强心针！我不是孤单的！哈哈！”

想做歌手多过做明星？

颜卓灵今年推出了三首歌曲，都算是“多产新人”，而且每首歌的声线控制各有不同，虽说可塑性高，但会否担心太可塑缺乏了个人特质？她却不着急要“揾自己把声”：“我唔会心急，因为仲年轻有好多空间会去试，同埋如果好急去到𠮶个位，我惊件事就唔够特别。”她续道：“如果唱每首歌都系同一把声……睇下你想做歌手定系想做明星？我就唔perfer后者。”

到底何事令颜卓灵对“做明星”抗拒？因为她希望保留自己真摰的一面：“第一我想多啲私人空间，第二系唔想做假啰！好辛苦，我唔得㗎！唔知点解，个性格就系咁。”原来歌曲《恶女》就是在诉说她的心声：“《恶女》就系讲呢样嘢，我有好多面，唔系每个时候都嘻嘻哈哈，韩国式微笑打招呼㗎嘛。做嘢时咪会啰！哈哈！平时就……如果我唔保有呢个可能性，就做唔到表演艺术。”

“我唔想去做好单一、好表面嘅嘢，同埋好多人都做紧就唔使多一个人去做。”

忽然变成大热新人？

入行5年再做“新人”自然引起大家关注，又有传媒形容颜卓灵为大热新人，对此她也变成“黑人问号”：“点解嘅？好神奇！可能系大家加俾我嘅期望，都开心嘅，即系大家都有留意。”既然外界呼声高，那颜卓灵对年尾颁奖礼有何期望？她却觉得似去party：“其实我冇谂太多，反而能够一次过见晒今年咁多位新人觉得好开心，好热血，感觉好似去O Camp咁！完全冇敌人嘅感觉，最期待当晚大家都着靓衫自拍！”

虽然颜卓灵今年才做乐坛新人，但她《狂舞派》中阿花的形象深入民心，与她歌曲所走的文青风格大相迳庭，是否要刻意摆脱大家的既有印象？其实颜卓灵纯粹想做自己：“冇话刻意去摆脱，因为阿花同颜卓灵根本就系两个人，总之就系做自己！同埋好似唔系好多人认识颜卓灵，希望透过歌曲令更多人认识我。”

《Baby Stop》小故事

颜卓灵新歌《Baby Stop》以Acoustic风格为主再带点Dream Pop的元素，予人一种窃窃私语，与自己内心读白的感觉，原来缘自一个忽发奇想的故事。

颜卓灵话：“首歌系讲一对年纪相约嘅男女喺异国相遇，大家都为咗逃避令自己迷失嘅事情离开家乡。虽然身处异地可以揾到自由释放嘅感觉，但无人可以分享。佢哋各自喺家乡都钟意深夜到街上跑步，一次偶遇发现原来对方都系咁，之后佢哋一齐喺马路中间无视所有事情去跑。佢哋唔系恋人关系，呢次相遇大家都好似有啲得着，但又冇resolve到任何嘢。”

听完颜卓灵解释，会唔会令你更代入到《Baby Stop》之中呢？