【专访】亲证Boy’z正式解散　关智斌：只不过无正式对外公布

歌手关智斌（Kenny）2003年与张智恒（Steven）以组合Boy’z出道。当年他们初出道已得到不少的关注，而且也曾推出多首k房大热的合唱歌曲。近年两位成员已单飞发展，成员关智斌（Kenny）更靠自己双手开拓内地市场。他坦言：“Boy’z已经解散，只不过无正式对外公布。”

摄影：黄永俊

场地：Vesper Bar

Make up: Elaw Wong assisted by Crystal@thelook-studio.com

Hair: Keith Wong & Alan Chan @Orient4

Wardrobe: 5 cm

“我以前出道嘅时候曾经做过好多唔成熟嘅事，自己当时紧系唔觉啦。后来大个回望以前自己先知道。好似上年有次上Do姐（郑裕玲）节目做访问，Do姐都有同我讲话我哋Boy’z好嚣张，以前喺TVB见到人都唔识打招呼。其实我哋点敢嚣张，只不过以前细个唔识主动同人打招呼，无呢个习惯。我又唔识去感激身边嘅人。依家回望以前嘅自己我真系可以用‘得啖笑’嚟形容。其实Boy’z一出道比起同期歌手，真系几顺利，所以真系唔会学到做人道理。我当时唔会知道其他人喺背后帮咗自己几多，自己开口埋口讲嘅努力，比起其他人真系差好远。我有时会谂，如果以前嘅Boy’z一早明白呢啲道理嘅话可能已经好唔同。以前我哋有真系会‘是但啦’嘅态度得过且过。”Kenny坦言。

提到之前有报导指Boy’z未能一直合作，是因为Steven的工作态度未能配合，现在的Kenny却不认同：“以前我哋都太自我膨胀，而且身边又无人会出声，不过就算有我哋都唔会听得入耳。我当时觉得自己唔需要出力都已经会有工作机会，点解我要出力呢。当然依家紧系知道其实所有嘢都系公司嘅光环先有。所以每次我谂起呢个问题我都会觉得自己好蠢。如果当初Boy’z肯加入自己嘅想法，多一啲创意，多一啲个性，我觉得会好唔同。因为无人会钟意一队傀儡组合，何况我哋系男仔。我哋Boy’z算系一个无咩自己谂法嘅一个组合，咩都唔谂，你叫我做咩就做咩。而公司都做得无错，佢哋见呢两个后生仔咩都唔谂，自然佢哋就要帮我哋谂埋。而Steven方面，我觉得自己无尽到最大嘅努力同佢沟通，我认为自己应该可以喺呢件事上再做好啲。”

Kenny自从到内地发展后工作重心都放在拍剧及电影上，除2016年曾推出新曲加精选《角色》之外，要再数上一张音乐专辑已经是2008年的时候，虽然他有在音乐上投放很多时间去宣传，但依然有一班死忠粉丝希望Kenny可以在广东乐坛重新出法，毕竟现年36岁的他曾是80后的童年回忆：“哈哈，其实我都有见过啲留言‘原来Kenny仲未死’、‘以为Kenny唔再唱歌’。其实我一直都好钟意音乐，所以有机会我一定会做。2016年嘅时候公司同我讲话我好耐无出歌，所以就帮我出一张新曲加精选《角色》，其实我都好钟意，收录3首国语新歌《次要角色》、《塑造角色》、《终生角色》都系我自己填词，入面主要想同大家分享我对以前、现在、将来嘅睇法。”

Kenny虽然在今年未有推出新专辑的打算，但先后推出与电影及剧集主题曲《习惯说谎》、《江湖就这样》，虽然有新的国语歌，但依然有不少乐迷希望Kenny可再唱广东歌，毕竟他在香港单飞出歌时，的确有不少热门作品如《眼红馆》、《再见·美惠》、《预言书》、《雪女》等：我好开心咁多年都仲会记得，我一直有留意大家嘅留言，大家叫我再唱广东歌。我一直有好认真去考虑呢件事。我发觉唔单止系香港歌迷，有时我去内地或者台湾工作原来佢哋都好留意我嘅广东歌。佢哋会掉转问我，点解唔唱广东歌，其实佢哋就算唔识广东话都好钟意听广东歌。而我系有打算去做一张EP，我心入面已经有一个主题，而歌已经录咗两首，不过我想时间再充裕啲先推出，因为一入剧组就做唔到其他宣传，而我今年嘅工作已经排到年底。”